ምስ ስርዓታት መጽሓፍ ቅዱስ ተሰማሚዕካ ትነብር፡ ምስ ኣምላኽ እውን ዕርክነት ተማዕብል እንተ ኣሊኻ፡ ብዛዕባ ጥምቀት ክትሓስብ ትጅምር ኢኻ። እሞ ደኣ ነዚ ስጕምቲ እዚ ኸም እተዳሎኻ ብኸመይ ክትፈልጥ ትኽእል፧ a

ኣብዛ ዓንቀጽ እዚኣ፦

•  ክንደይ እየ ኽፈልጥ ዘሎኒ፧

•  እንታይ እየ ኽገብር ዘሎኒ፧

•  መዛኑኻ እንታይ ይብሉ፧

 ንጥምቀት ክትዳሎ ኸለኻ፡ ከምቲ ገሊኦም ኣብ ቤት ትምህርቲ ንዚውሃቦም መርመራ ዚገብርዎ ኽትገብር፡ ማለት መጽሓፍ ቅዱሳዊ ሓቅታት ክትሽምድድ የብልካን። እንተዀነ ግና፡ ትምህርትታት መጽሓፍ ቅዱስ ሓቂ ምዃኑ ምእንቲ ኽትኣምን፡ ‘ንኣእምሮኻ ኽትጥቀመሉ’ ኣሎካ። (ሮሜ 12:1) ንኣብነት፦

•   ኣምላኽ ከም ዘሎን ከተምልኾ ኸም ዚግብኣካን ትኣምን ዲኻ፧

   መጽሓፍ ቅዱስ ከምዚ ይብል፦ “እቲ ናብ ኣምላኽ ዚቐርብሲ፡ ንሱ ኸም ዘሎን ነቶም ኣጸቢቖም ዚደልይዎ ዓስቢ ኸም ዚህቦምን ኪኣምን ይግብኦ እዩ።”—እብራውያን 11:6።

   ገዛእ ርእስኻ ሕተት፦ ‘ስለምንታይ እየ ብኣምላኽ ዝኣምን፧’ (እብራውያን 3:4) ‘ስለምንታይ እዩ ኣምልኾ ዚግብኦ፧’—ራእይ 4:11።

   ሓገዝዶ ትደሊ፧ “ፍጥረትዶ ወይስ ፍልቀት፧—1ይ ክፋል፦ ስለምንታይ እየ ብኣምላኽ ዝኣምን፧” ርአ።

•   ኣብ መጽሓፍ ቅዱስ ዘሎ መልእኽቲ ኻብ ኣምላኽ ከም ዝመጸስ ትኣምን ዲኻ፧

   መጽሓፍ ቅዱስ ከምዚ ይብል፦ “ኵሉ ቕዱስ ጽሑፍ ብድራኸ መንፈስ ኣምላኽ እተጻሕፈ፡ ንምምሃርን ንምግናሕን ንምቕናዕን ብጽድቂ ንምግሳጽን ከኣ ዚጠቅም እዩ።”—2 ጢሞቴዎስ 3:16።

   ገዛእ ርእስኻ ሕተት፦ ‘መጽሓፍ ቅዱስ ካብ ሰብ ከም ዘይኰነ ዝኣምን ስለምንታይ እየ፧’—ኢሳይያስ 46:10፣ 1 ተሰሎንቄ 2:13።

   ሓገዝዶ ትደሊ፧ “መጽሓፍ ቅዱስ ብኸመይ ኪሕግዘኒ ይኽእል፧—1ይ ክፋል፦ ንመጽሓፍ ቅዱስካ ፍለጦ” ርአ።

•   የሆዋ ፍቓዱ ንምፍጻም ብክርስትያናዊት ጉባኤ ኸም ዚጥቀምሲ ትኣምን ዲኻ፧

   መጽሓፍ ቅዱስ ከምዚ ይብል፦ “ንዕኡ [ንኣምላኽ] በታ ጉባኤን ብክርስቶስ የሱስን ንዅሉ ውሉድ ወለዶ ንዘለኣለመ ኣለም ክብሪ ይኹኖ።”—ኤፌሶን 3:21።

   ገዛእ ርእስኻ ሕተት፦ ‘ኣብ ክርስትያናዊ ኣኼባታት ዝምሃሮ ትምህርትታት ካብ ሰብ ከም ዝመጸ ገይረ ድየ ዝርእዮ፡ ወይስ ካብ የሆዋ፧’ (ማቴዎስ 24:45) ‘ወለደይ ኣብ ዘይክእሉሉ ኣጋጣሚታት እኳ፡ ናብ ኣኼባታት እኸይድ ድየ (ማለት ዚፍቀደልካ እንተ ዀይኑ)፧’—እብራውያን 10:24, 25።

   ሓገዝዶ ትደሊ፧ “ኣብ ኣዳራሽ መንግስቲ ኣምላኽ ኣብ ዚግበር ኣኼባታት ክትእከብ ዘሎካ ስለምንታይ ኢኻ፧” ርአ።

 ናብ ጥምቀት ንምብጻሕ፡ ፍጹም ክትከውን ኣየድልየካን እዩ። ኰይኑ ግና፡ ‘ካብ ክፉእ ንምርሓቕ፡ ሰናይ ድማ ንምግባር’ ብሓቂ ድሌት ኪህልወካ ኣለዎ። (መዝሙር 34:14) ንኣብነት፦

•   ምስ መለክዒታት የሆዋ ተሰማሚዐ ድየ ዝመላለስ፧

   መጽሓፍ ቅዱስ ከምዚ ይብል፦ “ሰናይ ሕልና ይሃሉኹም።”—1 ጴጥሮስ 3:16።

   ገዛእ ርእስኻ ሕተት፦ ‘“ልቦናይ ቅኑዕን ጌጋን ንምፍላይ ከም ዝሰልጠነ” ብኸመይ ኣርእየ፧’ (እብራውያን 5:14) ‘ካብ መዛኖይ ንዚወርደኒ ኣሉታዊ ጸቕጢ እተጻረርኩሉ ኣጋጣሚታት ኣሎዶ፧ ኣዕሩኸይ ቅኑዕ ኽገብር ድዮም ዜተባብዑኒ፧’—ምሳሌ 13:20።

   ሓገዝዶ ትደሊ፧ “ንሕልናይ ብኸመይ ከሰልጥኖ እኽእል፧” ርአ።

•   ብተግባራትካ ተሓታቲ ምዃንካስ ትቕበሎ ዲኻ፧

   መጽሓፍ ቅዱስ ከምዚ ይብል፦ “ነፍሲ ወከፍና ብዛዕባ ርእሱ ንኣምላኽ ጸብጻብ ኪህብ እዩ።”—ሮሜ 14:12።

   ገዛእ ርእስኻ ሕተት፦ ‘ንገዛእ ርእሰይ ኰነ ንኻልኦት ብቕንዕና እግምግም ድየ፧’ (እብራውያን 13:18) ‘ጌጋታተይ እእመን ድየ፡ ወይስ ክሓብኦን ናብ ካልኦት ክልጥፎን እየ ዝጽዕር፧’—ምሳሌ 28:13።

   ሓገዝዶ ትደሊ፧ “ንጌጋታተይ ብኸመይ ክሕዞ እኽእል፧” ርአ።

•   ምስ የሆዋ ዕርክነት ኣሎካዶ፧

   መጽሓፍ ቅዱስ ከምዚ ይብል፦ “ንኣምላኽ ቅረብዎ፡ ንሱ እውን ኪቐርበኩም እዩ።”—ያእቆብ 4:8።

   ገዛእ ርእስኻ ሕተት፦ ‘በየናይ መገድታት እየ ንየሆዋ ዝቐርቦ ዘለኹ፧’ ንኣብነት፡ ከምዚ ኢልካ ሕተት፦ ‘ክሳዕ ክንደይ እየ መጽሓፍ ቅዱስ ዘንብብ፧’ (መዝሙር 1:1, 2) ‘ኣዘውቲረ እጽሊ ድየ፧’ (1 ተሰሎንቄ 5:17) ‘ኣብ ጸሎተይ ንጹር ነጥብታት እጠቅስ ድየ፧ ምስ ፈተውቲ የሆዋ ድየ ዝተዓራረኽ፧’—መዝሙር 15:1, 4።

   ሓገዝዶ ትደሊ፧ “መጽሓፍ ቅዱስ ብኸመይ ኪሕግዘኒ ይኽእል፧—2ይ ክፋል፦ ንንባብ መጽሓፍ ቅዱስካ ባህ ዜብል ግበሮ” ኸምኡ ድማ “ስለምንታይ እየ ኽጽሊ ዘሎኒ፧” ርአ።

 ምኽሪ፦ ንጥምቀት ንምድላው፡ ኣብታ መንእሰያት ዚሓትዎ ሕቶታትን ተግባራዊ መልስታቱን፡ 2ይ ጥራዝ ዘርእስታ መጽሓፍ፡ ምዕራፍ 37 ኣንብብ። ምናዳ ነቲ ኣብ ገጽ 308ን 309ን ዚርከብ ወረቐት ዕዮ ኣስተብህለሉ።