Galuega a le ʻAuaposetolo 24:1-27
24 Ua mavae aso e lima, ona alu ifo ai lea o le ositaulaga sili o Anania+ faatasi ma nisi o le ʻautoeaina, ma se failauga tomai* e igoa iā Titulo, ua latou fai atu i le kovana+ ni faamatalaga e taʻusalaina ai Paulo.
2 Ina ua valaauina Titulo, ona ia tuuaʻia lea o ia e faapea:
“Ua matou olioli i le tele o le filemu ona o oe, ma o lau tofā mamao ua faaleleia ai lo matou nuu.
3 E matou te talisapaia pea nei mea uma, ma e matou te matuā faafetai atu ai i lau afioga Filiki.
4 Ae ina neʻi oʻu faalavelave atu iā te oe, ou te talosaga atu ai ina ia e faafofoga mai ma le agalelei i la matou faamatalaga puupuu.
5 E matou te fia faailoa atu iā te oe, o lenei tagata o sē e faatupu vevesi,*+ ma ua ia faatupu fouvalega+ i tagata Iutaia i le lalolagi atoa, ua taulamua foʻi o ia i le lotu a le ʻau Nasareta.+
6 Na taumafai foʻi o ia e faaleaga le malumalu, ma o le mea lea na matou puʻea ai o ia.+
7 * ——
8 Pe a e suʻesuʻeina o ia, o le a e silafia ai nei mea uma ua matou molia ai o ia.”
9 Ona aufaatasi atu ai lea o tagata Iutaia i nei moliaga, ma faapea atu e moni lava nei mea uma.
10 Ina ua geno atu le kovana iā Paulo e tautala, ona ia tali mai lea:
“Ua ou iloa lelei ua tele tausaga o e faamasino i lenei nuu, ma ua ou fiafia lava e tali atu i nei tuuaʻiga e faatatau iā te aʻu.+
11 Ia saʻili ma e silafia ai, ua faatoʻā 12 aso talu ona ou alu aʻe i Ierusalema e tapuaʻi ai;+
12 ma e latou te leʻi maua mai aʻu o finau ma se tagata i le malumalu, pe faatupu vevesi i le motu o tagata i sunako po o le aai.
13 E lē mafai foʻi ona latou faamaonia atu iā te oe, mea ua latou molia ai aʻu i le taimi nei.
14 Ae ou te taʻutino atu iā te oe, e tusa ai ma le ala lea ua latou taʻua o se lotu ese, ua ou avatu ai le auaunaga paia i le Atua o o matou augātamā,+ auā ua ou talitonu i mea uma ua tusia i le Tulafono ma le ʻau Perofeta.+
15 Ou te faamoemoe foʻi i le Atua, ma o le faamoemoe lava lenā o loo tulimataʻia e nei tagata, e toetutū mai+ tagata amiotonu ma tagata amiolētonu.+
16 O le mea lea ou te taumafai ai pea ina ia maua se lotofuatiaifo lelei* i luma o le Atua atoa ma tagata.+
17 O lea, ina ua mavae le tele o tausaga, na ou sau ai e aumai meaalofa+ i loʻu nuu ma ofo atu taulaga i le Atua.
18 A o oʻu faia nei mea, ua latou maua mai aʻu ua uma ona faamamāina i le malumalu,+ ae e leai se motu o tagata po o se vevesi. Peitaʻi, e iai ni tagata Iutaia mai i le itumalo o Asia,
19 e tatau ona ō mai i ou luma, ma molia aʻu pe afai e iai se mea latou te taʻusalaina ai aʻu.+
20 Pe tuu atu foʻi i tagata o loo i inei, e taʻu mai pe e iai se mea sesē na latou maua iā te aʻu, a o oʻu tū i luma o le Faamasinoga Sili,
21 seʻi vaganā ai laʻu faamatalaga na fai a o oʻu tū i o latou luma e faapea: ‘Ua faamasinoina aʻu i le asō i o outou luma, ona o le toetutū o ē ua oti!’”+
22 Peitaʻi, ua silafia lelei e Filiki mataupu e faatatau i lenei Ala,+ ona ia tolopō ai lea o le mataupu ma faapea atu: “Pe a sau Lusia, le alii e pule i ʻau, ona ou faia lea o se faaiʻuga i la outou mataupu.”
23 Ua ia poloaʻi foʻi i le taʻitaʻiʻau ina ia taofia pea le tamāloa, ae ia tuu atu iā te ia sina saʻolotoga ma faataga ona tagata e ō mai e fesoasoani iā te ia.
24 Ua mavae ni nai aso, ona ō mai lea o Filiki ma lana avā o Tusila, o se tamaʻitaʻi Iutaia, ma ua ia aami Paulo ma faalogo atu iā te ia e faatatau i le talitonuga iā Keriso Iesu.+
25 A o talanoa Paulo i le amiotonu, o le amio pulea, ma le faamasinoga i le lumanaʻi,+ ona fefe ai lea o Filiki ma tali atu: “Inā e alu ia i lenei taimi, ae seʻi iai se isi oʻu avanoa ona ou toe aami atu lea o oe.”
26 Ae i le taimi e tasi, ua faamoemoe o ia e avatu e Paulo ni tupe iā te ia. O le mea lea ua ia amia soo ai Paulo e sau e la te talanoa.
27 Peitaʻi ina ua mavae le lua tausaga, ona suia lea o Filiki e Pokio Feso; ae ona ua manaʻo Filiki ina ia fiafia mai tagata Iutaia iā te ia,+ ua ia tuu ai pea Paulo e saisaitia.
