Ntoko Anamoona a Yehova, ninniilipiserya opaka ichu mwawiiwanana ni Okristu yoowo Yesu ohusinheiye ni yoowo arummwa awe yeecelaaya. Mwaha ola onnaloca mwa mukwasu sa soororomela sahu sookhweleya.

1.   Muluku. Nnamulapa Muluku mmoharu eeparipari ni Aikuru Soothene, Mpatuxa, yoowo nsina nawe ori Yehova. (Salumu 83:18; Wupulula 4:11) Owo ti Muluku a Aparahamu, Mose ni Yesu.—Mukwaha 3:6; 32:11; Yohani 20:17.

2.   Piipiliya. Hiyaano ninneemererya wi Piipiliya michaka sooveereliwa sa Muluku wa achu. (Yohani 17:17; 2 Timóteo 3:16) Soororomela sahu inathipeleya mu aliivuru oothene a Mpiipiliyani awaakhwana 66, yaawo anaphitaanyerya “Nlakano Nakhalai” ni “Nlakano Nahiihaano.” Muhusiha Jason D. BeDuhn oothariha phaameene vaavaa aarempeiye wi Anamoona a Yehova “soororomela ni saweera saya inathipeleya Mpiipiliyani eheerenrye olakelela tiheeni Piipiliya aaphwaneleiye oloca.” *

    Naamwi neemereryaka soothene sa Mpiipiliyani eyo henooniherya wi noosuwela soothene. Ninneemererya wi makupa a Piipiliya arepiwe mmukhalelo woosiphela nave hanaphwanela wiiwexexiwa ntoko arepeliwaaya.—Wupulula 1:1.

3.   Yesu. Ninnachariha mahusiheryo ni yootakiherya ya Yesu Kristu nave ninnamucicimiha yene ntoko Mvuluxa ahu ni Mwaana a Muluku. (Mateu 20:28; Saweriwa T’arummwa 5:31) Mwawiihiiha, hiyaano na Akristu. (Saweriwa T’arummwa 11:26) Nto, noohuserya Mpiipiliyani wi Yesu tahi Muluku a Ikuru soothene nave wi haavo mathipelo mu Soorempwa sinakhaviherya nihusiheryo nawi Muluku ori mmikhalelo miraru.—Yohani 14:28.

4.   Omwene wa Muluku. Ola chiri olamulelo ori wirimu, ohiya mukhalelo ori mmurimani wa Akristu. Olamulelo owo onahaala oraceela olamulelo wa achu ni waakhwaniherya yookhwela ya Muluku ntakhara elapo ya vathi. (Daniyeli 2:44; Mateu 6:9, 10) Owo onahaala weeravo echu moohilekela, woona wi mwawiiwanana ni Piipiliya, nnakhala mu “mahiku ookuchula.”—2 Timóteo 3:1-5; Mateu 24:3-14.

    Yesu ti Mwene a Omwene wa Muluku. Owo opacenrye olamulela wirimu mu 1914.—Wupulula 11:15.

5.   Ovuluxa. Woopoliwa mu yoocheka ni okhwa ti wooweryeya moorweela wa mukucho wa woopola wa Yesu. (Mateu 20:28; Saweriwa T’arummwa 4:12) Wi ephure mukucho yoola, achu hanaphwanela pahiru okhalano nroromelo mwa Yesu nyenya tho otoroka mukhalelo aya wa okumi ni opatisiwa. (Mateu 28:19, 20; Yohani 3:16; Saweriwa T’arummwa 3:19, 20) Miteko sa muchu sinnooniherya wi nroromelo nawe nikumi. (Tiyako 2:24, 26) Nyenya ovuluxiwa honathummwa. Nto ti wooweryeya moorweela wa “mahala a Muluku.”—Galasya 2:16, 21.

6.   Erimu. Yehova Muluku, Yesu Kristu ni ankeelo oororomeleya anakhala wirimu. * (Salumu 103:19-21; Saweriwa T’arummwa 7:55) Achu avakhaani awaakhwana 144.000, anahaala oviihiwa mookhwani wi yaakhele okumi wirimu wi yalamulele ni Yesu mu Omwene.—Daniyeli 7:27; 2 Timóteo 2:12; Wupulula 5:9, 10; 14:1, 3.

7.   Elapo ya vathi. Muluku oopatusa elapo ya vathi wi ekhale nipuro na achu okhala wookhala. (Salumu 104:5; 115:16; Eklesiyaste 1:4) Muluku onahaala waareeliha achu awiiwelela ni ekumi yoophaameya ni yoohimala mparataiso veelaponi ya vathi.—Salumu 37:11, 34.

8.   Masooso ni makacamiho. Ala yaapacenrye vaavaa munkeelo mmoha a Muluku aamwaren’yeiye. (Yohani 8:44) Munkeelo yoola, aavahiwe nsina nawi “Satana” ni “Musaserya,” aahinwoka mutheli oopacerya wi ekhale vamoha nave sookhumelela saari soothananiha wa anamwane aya. (Maphatxuwelo 3:1-6; Aroma 5:12) Ni yoolakelela ya orehererya mwaha waatannyiwe ni Satana, Muluku onneemererya masooso ni makacamiho, nyenya Owo heemererya wi etitelele okhala wookhala.

9.   Okhwa. Achu yaawo anakhwa hanakhala tho. (Salumu 146:4; Eklesiyaste 9:5, 10) Awo hanahooxeya mu cukuca a mooro.

    Muluku onahaala waakookiha mapilyawu a achu yaawo akhwile moorweela wa ovinya mookhwani. (Saweriwa T’arummwa 24:15) Nyenya yaale anakhooca ohuserya iphiro sa Muluku emanle oviihiwa mookhwani anahaala otolosiwa okhala wookhala ehirino ewehereryo ya ovinya mookhwani.—Wupulula 20:14, 15.

10.   Emusi; echoko. Hiyaano ninnachariha nlamulo noopacerya ntikitheryiwe ni Muluku na othela ntoko ophitaana wa mulopwana mmoha ni muthiyana mmoha. Nave mararuwo ari mathipelo mamoharu aweemereryiwa a omwalana. (Mateu 19:4-9) Hiyaano ninnaroromela wi miruku inaphwanyeya Mpiipiliyani sinnakhaviherya imusi naari ichoko okhumelela phaama.—Éfeso 5:22–6:1.

11.   Malapelo ahu. Hiyaano hinnalapela mwiikimanyo naari yoophwaniherya ekina. (Malamulo 4:15-19; 1 Yohani 5:21) Ipontu soochuneya sa malapelo ahu ti iha:

    •   Ovekela wa Muluku.—Filipi 4:6.

    •   Omwaalakhanya ni omuhuserya Piipiliya.—Salumu 1:1-3.

    •   Wuupuwelela yeeyo nihusenryaahu Mpiipiliyani.—Salumu 77:12.

    •   Othukumana wi nivekele, omuhuserya Piipiliya, wiipa, oloca sa nroromelo nahu, waalipiha anna ni arokorahu ni akina.—Kolosi 3:16; Ahebri 10:23-25.

    •   Olaleerya “michaka [yaphaama] ya Omwene.”—Mateu 24:14.

    •   Ninnaakhaviherya oothoiwa.—Tiyako 2:14-17.

    •   Ninnateka ni orehererya Ipa sa Omwene ni mapuro makina yaawo nnapharihelaahu wi nivuwihe mahusiheryo a Mpiipiliyani orukurerya elapo.—Salumu 127:1.

    •   Ninnapaka makupa mmuteko wa okhaviherya variyari va ipahu.—Saweriwa T’arummwa 11:27-30.

12.   Marehereryo ahu. Nri ooreheryeya mmiloko, nave muloko ti muloko onahooleliwa ni nikhuuru na atokweene. Nyenya atokweene tahi oohiyana ni akina nave hanaakhelihiwa ikhorowa. (Mateu 10:8; 23:8) Hannamveka tiisimu, nave hasinavekiwa ikhorowa mmithukumano sahu. (2 Korinto 9:7) Miteko sahu soothene sinakhaviheryiwa moorweela wa sooveleela sa muchu mukhateiye.

     Nikhuuru Noolamulela, nikhuuru nikhaani na Akristu awiichwelavo omunepani yaawo anarumeela o nipuro ntokweene, annavahererya ohoolela ntakhara Anamoona a Yehova orukurerya elapo.—Mateu 24:45.

13.   Wiiwanana wahu. Hiyaano nri awiiwanana mu soororomela sahu. (1 Korinto 1:10) Ninniilipiserya tho wi nihikhaleno okawanyeya wa mahimo, ilapo naari ilocelo. (Saweriwa T’arummwa 10:34, 35; Tiyako 2:4) Wiiwanana wahu onnaneemererya opaka soothanla sa muchu mukhateiye. Mmoha ti mmoha onapaka soolakelela mwawiiwanana ni yawuupuxerya-ya-murima awe evyakihiwe ni Piipiliya.—Aroma 14:1-4; Ahebri 5:14.

14.   Meecelo ahu. Ninniilipiserya ohikhala a nrima, nto okhala oosivela mu saweera sahu soothene. (Yohani 13:34, 35) Ninnasepa saweera sihinamuhakalaliha Muluku, ophitaanyerya opharihela nikhami moohiphwanelela moorweela wa ovaha ni waakhela nikhami. (Saweriwa T’arummwa 15:28, 29; Galasya 5:19-21) Naachu a murecele nave hinniivoliiherya mu ikhoco. (Mateu 5:9; Isaiya 2:4) Ninnaacicimiha alamuleli ni malamulo aya wakhala wi malamulo awo hanavuhana ni malamulo a Muluku.—Mateu 22:21; Saweriwa T’arummwa 5:29.

15.   Waataana wahu ni akina. Yesu oonilamulela: “Omukhweleke mukhwaa ntoko oniikhwelelaa weyo mwaneene.” Owo tho aaloca wi Akristu “hari a elapo ya vathi.” (Mateu 22:39; Yohani 17:16) Mwawiihiiha, naamwi nihipakaka makupa vyakala a miyaha sa epoliitika ni ohiivoliiherya mmakhuuru makina a malapelo, ninniilipixerya oweerela “saphaama achu oothene.” (Galasya 6:10; 2 Korinto 6:14) Nto ninnacicimiha soolakelela sa akina vooloca sa miyaha seiha.—Aroma 14:12.

 Wakhala wi mookhalano nikoho vooloca sa soororomela sa Anamoona a Yehova, munanwerya waalakhanya sincipale vooloca sa hiyaano mu esaiti ahu, mwaacamele emoha ya ikupweete sahu, mphwanyeye va muthukumano mu Empa ya Omwene waacamela munakhalaanyuwo naari muloce ni mmoha a Anamoona a Yehova mmukumaanyu.