Mateyu 24:1-51
-
ENENEERYO YA ORWA WA KRISTU (1-51)
24 Yesu akhumaka mu empa ya Muluku, oohuserya awe yaamwaacamela wi emoonihe mapakeliwo a empa ya Muluku.
2 Yesu aawaakhula ariki: “Mano, hamunoona ichu soothene iha? Chiri kinnooleelaani wi: Vaava, hinrwa nikhalavo nluku vasulu va nikhwaaya nni nihipiculiwe.”
3 Yesu aakiraantheiye va Mwaako wa Asitona, oohuserya yaamwaacamela vameekhaaya, emukoha: “Munleele, ichu iha inaya weererya liini, nave tiivi eni ekhale eneneeryo ya orwa* wanyu ni makuchuwelo a mukhalelo yoola wa ichu?”*
4 Yesu aawaakhula ariki: “Mwiikasoopeke wi ahikhale ani oowokeeni,
5 woona wi ancipale anamurwa mu nsina naka, eriki: ‘Miyaano ka Kristu,’ nave anamwaawoka achu ancipale.
6 Munamwiiwa sa ikhoco ni soolokoha vooloca sa ikhoco. Nyenya muhituthuwe, woona wi ichu iha sinnaphwanela weereya, nto makuchuwelo nlelo haphiyale.
7 “Ntakhara nloko nnanwana ni nloko nikina nave omwene ni omwene okina, nave tho enamukhalavo etala ni ocikinyeya wa elapo nipuro nnipuro.
8 Ichu soothene iha, mapacereryo a soohooxa.
9 Elukuluku yeeyo, achu anamooveleelaani mu soohooxa ni owiiphaani, nave nyuwo munarwa mwiiciwa ni maloko oothene vanthowa na nsina naka.
10 Nave tho ancipale anamukwaculiwa, oveleelana mukina ni mukhwaawe ni wiicana mukina ni mukhwaawe.
11 Anamurwa alipa a miririmu ancipale oowoka, yaawo eni yaahuwelihe achu ancipale;
12 nave nthowa na waaceereryeya wa ohiiwelela malamulo, osivela wa ancipale onahaala oriirya.
13 Nyenya yoole oni avilele* ophiyerya omakuchuwelo, toni avuluxiwe.
14 Nave michaka saphaama seiha sa Omwene sinarwa silaleeryiwa veelaponi yoothene yavathi, wi sivahe onamoona wa maloko oothene, voocharela anamphiya makuchuwelo.
15 Wakhala wi mohoona echu yoothanyeya enatoloxa, yeeyo mulipa a miririmu Taniyeli aalonceiye, yeemenle va nipuro naweela (mulipa a waalakhanya uupuwelele*),
16 hiihaa, yaale eni ekhale o Yuteya epacerye ochawela mmiyaakoni.
17 Yoole oni akhale vasulu va empa awe, akhuruwa, ahivolowe mpa wi akuxe ichu sawe,
18 nave yoole oni akhale omaca, ahikookele owaani wi akuxe yawiikhuneelano awe.
19 Ootakhaliwa eni ekhale athiyana oorupala ni yaale eni ewaamwiheke anamwane mmahiku yaawo!
20 Mutitelele ovekela wi ochawa wanyu oheereye mu elukuluku ya nakhutu naari nihiku na Sapata;
21 tiwi enarwa ekhalavo yoohooxa etokotoko, yeeyo ehitonko weereya ovinyerya omapacereryo wa elapo ophiyerya hiihaano, nave herwa tho yeereya wanaawiili.
22 Chiryene, yahaavukuliwe mahiku yaale, haavo aahaala ovuluxiwa, nyenya vanthowa na oothanliwa mahiku awo anamvukuliwa.
23 “Nto, akhalavo oni aloce ariki: ‘Onani! Kristu ori va,’ naari, ‘Ori vale!’ muheemererye yeeyo.
24 Ntakhara anamooneya akristu oowoka ni alipa a miririmu oowoka, yaawo anahaala opakaka ineneeryo ni sootikhiniha itokotoko wi yaahuwelihe achu, wakhala wooweryeya, anamwaahuweliha tho oothanliwa.
25 Onani! Kihooleelaani woosiilo ene.
26 Mwawiihiiha, achu yaloca wa nyuwo eriki: ‘Onani! Kristu ori otakhwani,’ muhiyewo; naari: ‘Orimwiipitha mpa,’ muheemererye yeeyo.
27 Hiihaa ntoko overunya onaaryaaya ovinyerya weiwo onakhumawo nsuwa ophiyerya weiwo nnaneelaayawo, orwa* wa Mwaana a muchu oni weereye hiihaa.
28 Weiwo oni okhalewo muruchu, inaka tho inamuthukumana weiwo.
29 “Yaviraru yoohooxa etokotoko mmahiku yaawo, nsuwa nnarwa nriipa, mweeri horwa waarya, itheneeri inarwa imora wirimu, nave ikuru sa wirimu inarwa icikinyiwa.
30 Wirimu onamooneyawo eneneeryo ya Mwaana a muchu, nave maloko oothene a veelaponi yavathi enarwa yiinla vancipale,* nave enarwa emoona Mwaana a muchu arwaaka mmeekuni a wirimu arino owerya ni ncicimiho ntokotoko.
31 Nave owo onamwaarumiha ankeelo awe ni oruma otokotoko wa nipenka, awo anamwaathukumanya oothanliwa awe orweela makupa maxexe a elapo,* ovinyerya weiwo enapaceryawo erimu ophiyerya weiwo ekotenlaayawo.
32 “Vano huseryani sa niphwanaphwaniho nla na mwiri wa mukuukhu: Vaavaa mirai saya sinapaceryaaya ophuwela makukhu mavyaani, nyuwaano munnasuwela wi elimwi yohaacamela.
33 Moolikana tho, moona ichu soothene iha, musuwele wi owo* ori vakhiviru, va milako.
34 Chiri kinnooleelaani wi, muyareriwo ola horwa ovira ichu soothene iha siheeren’ye.
35 Erimu ni elapo enamvira, nyenya masu aka herwaru evira.
36 “Vooloca sa nihiku nenlo ni elukuluku ene, haavo muchu onasuwela, naari ankeelo a wirimu naari Mwaana, pahiru Atiithi.
37 Ntoko yeeren’yaaya mmahiku a Nowa, orwa* wa Mwaana a muchu oni weereye hiiha.
38 Hiihaa ntoko yeeren’yaaya mmahiku yaale, ehaakumve orwa Maahi Mancipale, achu yaanalya ni yaanawurya, alopwana yaanathela ni athiyana yaanatheliwa, ophiyerya nihiku nenlo Nowa aavolonweiye mmwaaceyani,
39 nave hiyeenrevo echu, ophiyerya Maahi Mancipale eruule yaatoloxa oothene yaawo, orwa wa Mwaana a muchu oni weereye hiiha.
40 Alopwana apiili enarwa ekhala mmacani; nto onamukuxiwa mmoha nave mukina onamuhiiwa.
41 Athiyana apiili enarwa enaxila vanxiloni; nto onamukuxiwa mmoha nave mukina onamuhiiwa.
42 Mwawiihiiha, titelelani olipelela, woona wi hamunasuwela nihiku nene oneereiye arwe Pwiya anyu.
43 “Nyenya musuwele ela: Waakhanle wi mwaneene a vaate onnasuwela elukuluku* mpava onahaaleiye orwa, aamulipelelaka ni oheemererya wi empa awe ekhuculiwe.
44 Vanthowa nenla, khalani ooreheryeya, woona wi Mwaana a muchu oni arwe elukuluku yeeyo muhinuupuwelaanyu.
45 Taani ori kapuro oororomeleya ni amiruku* yoowo pwiya awe omuthanlileiye wa alapeli awe akina, wi aavaheke yoolya mu elukuluku yoophwanelela?
46 Oohakalala kapuro yoowo onaphwanyiwa ti pwiyawe eerakano yeeyo!
47 Chiri kinnooleelaani wi, pwiya awe onammweera mutokweene a othokororya muhakhu awe woothene.
48 “Nto, wakhala wi kapuro ole toonanara murima, aloca mmurimani mwawe ariki: ‘Pwiyaka onnalekela,’
49 apacerya waamana akapuro akhwaawe, olya ni owurya ni alipa oohapaliwa,
50 pwiya a kapuro ole oni arwe mu nihiku ohinamuweheryeiye, ni elukuluku yeeyo ohinasuweleiye,
51 nave pwiya awe onarwa amulaka ni olaka otokweene, nave onammukeriha o nipuro na anawiisootherye. Weiwo toni okhalewo winla ni okhuuriha miino awe.
Inoota
^ Moone Masu Atharihiwe.
^ Naari: “elapo yeela yoonanara.” Moone Masu Atharihiwe.
^ Naari: “yoole onavilela.”
^ Ela tiwi, yooloherya ya Taniyeli.
^ Moone Masu Atharihiwe.
^ Naari: “wiimana va naakhoopeni.”
^ Mu Ekriki, “icheku xexe.”
^ Ela tiwi, Mwaana a muchu.
^ Moone Masu Atharihiwe.
^ Naari: “elukuluku taani ya ohiyu.”
^ Naari: “oovyaka; awiisuwela.”
