Wupulula 4:1-11
4 Emanle yeela, kaahoona mulako woohuleya wirimu nave kaahiiwa nsu noopacerya ntoko oruma wa nipenka, nlocaka ni miyo nriki: “Owele nno, nave kinanwooniha ichu seiho inaphwanela weereya.”
2 Moohilekela kaakhala mu owerya wa munepa, koona munyukhu wirimu nave ookhala aakiranthe vamunyukhuni.
3 Yoowo aakiranthevo aari oophwanaphwana ni maluku a xaaspe ni maluku a saartiyu,* nave voorukurerya va munyukhu yaakhalavo ekhwiini yaalikana ni esmeralta.
4 Voorukurerya va munyukhu saakhalavo minyukhu makhumi meeli naxexe, nave mminyukhu seiho kaawoona asitokweene makhumi meeli naxexe ekiranthi, ewanre soowara saweela, nave mmuruni mwaya yaawanre akorowa a ooru.
5 O munyukhuni waanakhumawo overunya, masu ni itari. Saakhalawo mithuko mithanu namiili sa mooro saavarela ohoolo wa munyukhu, nave iho inataphulela minepa mithanu namiili sa Muluku.
6 Ohoolo wa munyukhu yaakhalavo echu ntoko ephareya ya eviitru, ntoko kristaale.
Veeri* va munyukhu ni voorukurerya va munyukhu saakhalavo ikumi xexe, isaren’ye miitho ohoolo ni oculi.
7 Ekumi yoopacerya yaalikana ni mwaco, ekumi yanaawiili yaalikana ni mwaasaana a emope, ekumi yaneeraru yaarino ethoi yoolikana ni ya muchu, nave ekumi yaneexexe yaalikana ni enaka evavaka.
8 Ikumi seihe xexe saakhalano moophelo mathanu nammoha. Nave moophelo aya yaasareyano miitho mpuwa ni vaate. Nave othana ni ohiyu sinnatitelela oloca iriki: “Aweela, aweela, aweela ti Yehova Muluku, Aikuru Soothene, yoowo aari, yoowo ori ni yoowo oni arwe.”
9 Ikwaha soothene ikumi iha inamvuwihaaya, omucicimiha ni omuthamalela Yoole okiraanthe vamunyukhuni, Yoowo onakhala okhala wookhala,
10 asitokweene makhumi meeli naxexe annakokhora vamiithoni va Yoole okiraanthe vamunyukhuni, enamulapa Yoowo onakhala okhala wookhala nave annaakuha akorowa aya vamiithoni va munyukhu eriki:
11 “Oophwanelela ti nyuwo, Yehova Muluku ahu, waakhela ovuwa, ncicimiho ni owerya, ntakhara moopatuxa ichu soothene, nave wa nthowa na okhwela wanyu ti ikhanlaaya nave ipatuxiwa.”
