Salmu 37:1-40
-
Yaale anamuroromela Yehova anamukhumelela phaama
Salmu a Tavite
א [Alefi]
37 Ohinyeenyeye* wa nthowa na achu oonanara murimaNaari waakhalela nrima achu ootakhala.
2 Awo anamuuma mwawaakuveya ntoko munyepuNave anamunyaala ntoko munyepu mukithi.
ב [Peti]
3 Omuroromele Yehova nave weereno yeeyo eri yaphaama;Okhale mweelaponi nave weerekeno ichu moororomeleya.
4 Ophwanye ohakalala wawaaca* mwa Yehova,Nave owo onahaala woovaha yeeyo murimaa onachunaaya.
ג [Kimeli]
5 Omunnyererye ephiro aa* Yehova;Omuroromele yoowo, nave owo onamweeravo echu wi ookhaviherye.
6 Owo onamweeriha wookololowa wawe waarya ntoko wooxixelo,Ni ekhaikhai awe ntoko nsuwa na othana.
ד [Taleti]
7 Omaale cuu vamiithoni va YehovaNave onweheryeke yoowo moopixa murima.
Ohinyeenyeye ni muchuYoowo onakhumelela phaama ni miruku sawe soonanara.
ה [He]
8 Ohiye onanariwa ni esara;Ohiphweeleye nave ohikooke wi weere yoonanara.*
9 Tiwi achu aweera soonanara anamutoloxiwa,Nto yaale ananweherya Yehova anahaala waakhela elapo yavathi.
ו [Vawu]
10 Ehanle pahi elukuluku vakhaani, nave aweera soonanara hekhalavo tho;Onamvarerya weiwo awo yaaraayawo,Nave awo hekhala weiwo.
11 Nyenya awiichacala anahaala waakhela elapo yavathi,Nave awo anamukhalano ohakalala otokweene woona wi anahaala okhalano murecele wawaaca.
ז [Sayine]
12 Muchu oonanara murima onnuupuwela omuhooxa awookololowa murima;Owo onnakhuuriha miino ntakhara yoowo.
13 Nto Yehova onahaala omutheya muchu oonanara murima,Woona wi owo oosuwela wi nihiku nawe nnamphiya.
ח [Heti]
14 Achu oonanara murima annahulula malema aya nave annareya minra sayaWi emuuwihe oohooxiwa ni ohaawa,Wi ewiiphe yaale aneeca mu ephiro yawookololowa.
15 Nyenya nlema naya nnahaala ohoma murima aya ene;Minra saya sinahaala onyaanyiwa.
ט [Teti]
16 Saphaama ti ichu savakhaani seiho awookololowa murima oreiyenoOpwahana muhakhu muncipale wa aweera soonanara.
17 Tiwi miwono sa achu oonanara murima sinahaala wintakiwa,Nto Yehova onahaala waakhaviherya awookololowa murima.
י [Yoti]
18 Yehova onnasuwela yeeyo awookololowa murima anakumanaayano,*Nave yoohiyeryiwa aya enamwiikhalelaru okhala wookhala.
19 Awo hiyuulihiwa muru mu elukuluku ya epahu;Mu elukuluku ya etala, awo anamukhalano yoolya yincipale.
כ [Kafe]
20 Nyenya aweera soonanara anahaala okhwa;Amwiicani a Yehova anahaala orimeela ntoko oreera wa munyepu;Awo anamurimeela ntoko mwiisi.
ל [Lameti]
21 Yoole ori oonanara murima onnapoleya nave hanakookiha,Nto awookololowa murima ta mahala* nave toovaha.
22 Yaale anareelihiwa ni Yoowo anamwaakhela elapo yavathi,Nto yaale anuulumeliwa ni Yoowo anahaala otoloxiwa.
מ [Meme]
23 Yehova onnahoolela* meecelo a muchuWakhala wi owo onnahakalalela ephiro awe.
24 Naamwi owo uuwale, hatitelela okhala vachayani,Ntakhara Yehova onnamukhaviherya ni ntata nawe.
נ [Nuni]
25 Kaari mmiravo nave vano kohuuluvala,Nyenya nkintonko omoona muchu awookololowa anyanyaliwe,Naari mano anaawe evekavekaka yoolya.
26 Ilukuluku soothene owo onnapoleiha mootaphuwa,Nave anamwane awe anamwaakhela mareeliho.
ס [Sameki]
27 Osepeke yoonanara nave weereke yeeyo eri yaphaama,Nave onamutitelela okhala, okhala wookhala.
28 Tiwi Yehova onnasivela ekhaikhai,Nave haanyanyala yaale ari oororomeleya wa yoowo.
ע [Ayini]
Ilukuluku soothene awo anamukhapeleliwa;Nto muyareriwo wa aweera soonanara onamutoloxiwa.
29 Awookololowa murima anahaala waakhela elapo yavathi,Nave awo anamukhala mwemmo okhala wookhala.
פ [Pe]
30 Eyano ya muchu awookololowa murima ennalokoha miruku,*Nave nlumi nawe ninnaloca sa ekhaikhai.
31 Nlamulo na Muluku awe nri va murimani vawe;Inaani sawe hisirwa iserekuwa.
צ [Tsate]
32 Aweera soonanara onnamvareryela awookololowa,Aavyaka meerelo a omwiipha.
33 Nyenya Yehova hani amuhiye awookololowa murima mmatani mwa aweera soonanaraNaari mano hamphwanyerya nthowa vaavaa owo oneereiye athorihiwe.
ק [Kofi]
34 Onweheryeke Yehova nave ochareke ephiro awe,Nave owo onanwunnuwiha wi waakhele elapo yavathi.
Vaavaa aweera soonanara aneeraaya etoloxiwe, onahaala woona yeeyo.
ר [Rexi]
35 Koomoona mutakhali ni aweera soonanaraAvathaka ntoko mwiri mukithi omenle mu echaya yawuucelana.
36 Nyenya mootutusa owo aarimeela nave ahiya okhala;Kaatitelela omwaavya, nave owo haawerya ophwanyeya.
ש [Xini]
37 Nkanwehe muchu ohirino nthowa,*Nave omvarerye muchu awookololowa,Tiwi omwaahiyu wa muchu yoowo oni okhale wa murecele.
38 Nyenya anamacheka oothene anamutoloxiwa;Omwaahiyu aweera soonanara anamukwasiwa.
ת [Tawu]
39 Ovuluxiwa wa awookololowa murima onarwa wa Yehova;Owo ti nchawelo naya mu elukuluku ya sawuukhula.
40 Yehova onahaala waakhaviherya ni owoopola.
Owo onanwoopola wa aweera soonanara nave onamwaavuluxa,Woona wi awo anachawela wa yoowo.
Inoota
^ Naari: “Ohuukhuwe.”
^ Naari: “Ohakalale.”
^ Mu Ehepiri, “Opirikixele ephiro aa wa.”
^ Naari akhweya: “Ohiphweeleye, tiwi eyo eni yooruheele makacamiho pahi.”
^ Mu Ehepiri, “onnasuwela mahiku a achu awookololowa murima.”
^ Naari: “onnooniherya mahala.”
^ Naari: “onnalipiha.”
^ Naari: “ennaloca miruku ni nsu na vathivathi.”
^ Naari: “oororomeleya.”
