Aroma 14:1-23
14 Mmwaakheleke muchu yoowo ori ooceecheya mu nroromelo nawe, nto muhaathoriheke yaale arino moonelo woohiyana ni wawinyu.*
2 Muchu mmoha ookhalano nroromelo wi alyeke soothene, nto muchu mukina ooceecheya, onalya pahi makukhu.
3 Yoole onalya soothene, ahimunyemuleke yoole ohinalya, nave yoole ohinalya soothene ahimunyemuleke yoole onalya soothene, woona wi Muluku oomwaakhela yoowo.
4 Weyo waani wi omuthorihe kapuro a muchu mukina? Waakhanle wi onahaala weemela naari wuuwa, eyo yoolakelela ya pwiya awe. Mweeparipari, owo onarwa eemela, woona wi Yehova onanwerya omweemesa.
5 Muchu mmoha onoona nihiku nimoha okhala noochuneya opwaha nikina; nto muchu mukina onoona mahiku oothene okhala oolikana; muchu ti muchu akhale oolekecheya mmuupuweloni mwawe.
6 Yaale anoona nihiku nimoha okhala noochuneya opwaha nikina aneerano wi emucicimihe Yehova. Nave tho, yaale analya soothene, analya wi emucicimihe Yehova, woona wi annamuthamalela Muluku; nave yaale ahinalya, annamucicimiha tho Yehova, nave naamwi hiihaa annamuthamalela Muluku.
7 Mweeparipari, haavo a hiyo onakhala mukumi mwa meekheiye pahi, nave haavo onakhwa mwa meekheiye pahi.
8 Tiwi, naakhalaka akumi, nnakhala ntakhara Yehova, nave naakhwaaka, nnakhwa ntakhara Yehova. Mwawiihiiha, naari nri akumi naari nikhwile, hiyo nri a Yehova.
9 Vawi Kristu ookhwa nave akookela okhala mukumi ni yoolakelela ela: Wi akhale Pwiya aalipa ookhwa ni a akumi.
10 Nto vano, ntakhara heeni onamuthorihaawe munnaa? Naari ntakhara heeni weyo tho onamunyemulaawe munnaa? Tiwi oothene ahu nnarwa neemela vanipuro noothoriha na Muluku.
11 Ntakhara yoorempwa: “Yehova onnaloca: ‘Kinnalipela okumi aka, makutha oothene enarwa ekokhora vamiithoni vaka, nave malumi oothene enarwa emusuwela Muluku mwawaakhwanela.’”
12 Hiihaa, mmoha ti mmoha a hiyo onarwa amwaakhula meekheiye Muluku.
13 Mwawiihiiha, nihithorihaneke tho mukina ni mukhwaawe, nto moohiyana, nikhale oolakelela ohikuha nluku nookwaculiha naari yookwaculiha ekina variyari va munna.
14 (Koosuwela nave koolekecheya mwa Apwiya Yesu wi hiyaavo enakhala yoothanyeya mwa meekhaaya; pahiru wakhala wi muchu onoona echu okhala yoothanyeya, hiihaa wa yoowo ti yoothanyeya.)
15 Tiwi, wamuthananiha munnaa wanthowa na yoolya, weyaano honeeca mwawiiwanana ni osivela. Ohimurimeelihe* yoowo Kristu omukhwenleiye wanthowa na yoolyaa.
16 Mwawiihiiha, muheemererye wi yaphaama yeeyo muneeraanyu elociweke moonanara.
17 Omwene wa Muluku tahi echu vooloca sa yeeyo nnalyaahu naari yeeyo nnawuryaahu; echu eri yoochuneyaxa ori okhala awookololowa murima, okhalano murecele ni ohakalala mwa munepa waweela.
18 Tiwi yoole onalapa mmukhalelo yoola ntoko kapuro a Kristu, onnamuhakalaliha Muluku nave onneemereryiwa ni achu.
19 Vano, niilipixerye opaka ichu inatikitherya murecele, ni soolipihana mukina ni mukhwaawe.
20 Ohiye onyaanya* muteko wa Muluku pahiru wanthowa na yoolya. Eparipari, soolya soothene sinneemereryiwa olya,* nyenya ti yoonanara olya echu, wakhala wi weerano yeeyo yaahaala omukwaculiha muchu mukina.
21 Ti yaphaama ohikhuura emece, ohiwurya eviinyu, naari weera echu ekina yaahaala omukwaculiha munnaa.
22 Nroromelo oryaaweno, okhapelele wa weyo meekhaa vamiithoni va Muluku. Oohakalala muchu yoowo ohiniithoriha mwa yeeyo eemerenryeiye.
23 Nto, wakhala wi muchu onnakhwa minikwa nave alya, oothorihiwa, ntakhara onalya ahirino nroromelo. Nave soothene ihinathipeleya mu nroromelo, yoocheka.
Inoota
^ Naari akhweya: “yaale anaakaaya erino yoolakelela.”
^ Naari: “ohimpahule.”
^ Naari: “omwarya; otoloxa.”
^ Mu Ekriki, “ichu soothene ti saweela.”
