Ahepri 10:1-39
10 Tiwi, woona wi Nlamulo nookhalano murusi wa ichu saphaama saahaala orwa, nyenya tahi eruku yeeparipari ya ichu seiho, nlo hinrwa niweeriha* yaale anamulapa Muluku okhala oophaameya moorweela wa mikucho mimohamoha sinavahiwa moohihiyererya eyaakha ti eyaakha.
2 Moohiyana, apwanne hisaahaala omaala oveleeliwa mikucho? Woona wi yaale analapa muteko waweela, emanle weelihiwa, hiyaahaala osuwela wi aakhalano soocheka.
3 Nto mikucho seiho sinnawuupuxerya achu eyaakha ti eyaakha wi alipa oocheka.
4 Woona wi honaweryeya wi nikhami na imope ni nikhami na ipuri oviihavo soocheka.
5 Wa nthowa nenla, Kristu avolowaka mweelaponi, owo aahi: “‘Mikucho ni sooveleela nyuwo himwaachunne nto mwaakireheryela mwiili.
6 Nyuwo hamweemerenrye soovaha soopahiwa naari mano soovaha ntakhara yoocheka.’
7 Voocharela kaariye: ‘Miyo kiri va* (mu eroolu* yoorempwa vooloca sa miyo) wi keere yookhwela anyu, khwoo Muluku.’”
8 Owo aahi voopacerya: “Nyuwo himwaachunne naari weemererya mikucho, soovaha, soovaha soopahiwa naari soovaha ntakhara yoocheka.” Mikucho seiho saavahiwa mwawiiwanana ni Nlamulo.
9 Voocharela owo aahi: “Miyo kiri va* wi keere yookhwela anyu.” Owo onnaviihavo yeeyo yaari yoopacerya wi atikitherye yanaawiili.
10 Mwa “yookhwela” yeela noheelihiwa moorweela wa yoovaha ya mwiili wa Yesu Kristu ekwaha emoha wa ilukuluku soothene.
11 Nave tho, alipa a mukucho oothene annakhala mmapuro aya a muteko nihiku ti nihiku wi ephare muteko waweela* ni opaka mikucho imohamoha ikwaha sincipale, seiho ihinawerya oviihavo soocheka moomalela.
12 Nyenya owo oovaha mukucho wa soocheka okhala wookhala nave ookiraathi omoono woolopwana wa Muluku,
13 ovinyerya vaavo owo onnawehererya ophiyerya amwiicani awe ekuhiwe vathi va inaani sawe.
14 Tiwi, yaari moorweela wa yoovaha emoha pahi ya mukucho aaweerinheiye okhala awaakhwanela yaale aneelihiwa okhala wookhala.
15 Ohiya yeeyoru, munepa waweela tho onnaneerela onamoona, vaavaa owo onalocaaya:
16 “Yehova oni: ‘Ola waataana kineeraaka kipake ni yaawo emanle ovira mahiku yaale. Kinamukuha malamulo aka mmurimani mwaya nave kinamurepa mmuupuweloni mwaya.’”
17 Voocharela oni: “Nave nkirwa tho kuupuwela soocheka saya ni otakhala waya murima.”
18 Weiwo oriwo oleveleliwa wa ichu seiha, hiwaawo tho yoovaha ntakhara yoocheka.
19 Mwawiihiiha, anna, woona wi nookhalano ororomela* yoola wawaakhwanela wi nipharihele ephiro ya ovolowa mu nipuro naweela moorweela wa nikhami na Yesu,
20 ephiro evyaani ni ekumi yeeyo owo ohunleiye* wa hiyo moorweela wa ekuwo, ela tiwi, mwiili awe,
21 nave woona wi nookhalano mulipa a mukucho mutokweene mu empa ya Muluku,
22 hankooni nimwaacamele ni murima weeparipari ni nroromelo nawaakhwanela, nrino mirima saweeliheya ni yawuupuxerya-ya-murima ahu ekhanle yaphaama, nave mwiili ahu orapihiwe ni maahi ooreera.
23 Hankooni nlipiherye olokoha vanlakani ewehereryo ahu nihicikinyen’ye, woona wi yoole ororomelinhe toororomeleya.
24 Nave nuupuwelaneke* mukina ni mukhwaawe, nceenyeryanaka* mu osivela ni mwa miteko saphaama,
25 nihihiyaka othukumana vamoha, ntoko akina akhovelenlaaya, nyenya nlipihaneke mukina mukhwaawe, xaxaxa vaavaa munoonaanyu nihiku naacamelaka.
26 Tiwi, wakhala wi nootitelela ocheka moolakelela, nimanle waakhela masuwelelo awaakhwanela a eparipari, hiwaavo tho mukucho ntakhara soocheka,
27 nyenya yookhalavo yoowehererya yawoopiha ya othoriha, ni esara yeeyo enavarela ntoko mooro, enahaala waatoloxa amwiicani a Muluku.
28 Muchu vyakala ohiniiwelela Nlamulo na Mose onakhwa ahimoreliwe ikharari, va onamoona wa achu eeli naari araru.
29 Munoona hai, apwanne haphwanenle olakiwa vatokotoko muchu yoowo oni amunyikalele vathi Mwaana a Muluku, ohinathokororya esisapo ya nikhami na waataana nenlo eelihiweiyeno, nave oni aruwane ni onyemula munepa wa mahala matokweene?
30 Vawi noomusuwela yoole olonce: “Winla ikuhu ti waaka; kinarwa kaakookiherya.” Nave aaloca tho: “Yehova onarwa aathoriha achu awe.”
31 Ti wawoopiha omorela mmatani mwa Muluku mukumi.
32 Nyenya, mutitelele wuupuwelela mahiku yaale oopacerya, wi mmanle waakhela omwaleela, nyuwo mwaavilela mukhico mutokweene, vamoha ni makacamiho mancipale.
33 Vakina vaya, nyuwo mwaananyemuliwa ni ohooxiwa vamiithoni va achu oothene,* nave vakina vaya tho, nyuwo mwaanaataana* ni yaale yaahooxeya ichu seiha.
34 Vawi nyuwo mwaanuuka masooso a yaale yaawaleliwa mukariposo nave moheemererya moohakalala waakhiwa sookhalano sanyu, musuwelaka wi nyuwo mookhalano muhakhu waphaamasa woohimala.
35 Mwawiihiiha, muhihiye olipa wanyu murima,* yoowo onahaala ochuweliwa vatokotoko.
36 Nyuwo munaphwanela ovilela, wi mmanle weerano yookhwela ya Muluku, mwaakhele waakhwanela wa yoororomeliha.
37 Vawi “ehanle elukuluku vakhaani,” nave “yoole onarwa onahaala ophiya nave halekela.”
38 “Nto awookololowa aka murima onarwa akhala moorweela wa nroromelo,” nave “wakhala wi ookookela muculi, miyo nkinahakalala* ni yoowo.”
39 Hanri a yaale anakookela muculi wi etoloxiwe, nyenya nri a yaale arino nroromelo wi nikhapelele okumi ahu.
Inoota
^ Naari akhweya: “achu herwa eweeriha.”
^ Mu Ekriki, “Miyo koorwa.”
^ Mu Ekriki, “mu eroolu ya liivuru.”
^ Mu Ekriki, “Miyo koorwa.”
^ Naari: “muteko wa vanlakani.”
^ Naari: “ohoovelela.”
^ Mu Ekriki, “opacerinheiye.”
^ Naari: “nuukhuwekeno; nthokororyaneke.”
^ Naari: “nlipiseryanaka; naakuvihanaka.”
^ Mu Ekriki, “mwaanatheteiwa ntoko wi muri va eteyatru.”
^ Naari: “mwaanakhala vamoha ni yaale.”
^ Mu Ekriki, “oloca wanyu mootaphuwa.”
^ Naari: “okumi aka honahakalala.”
