Mateyu 23:1-39
23 Yesu aaloca wa muloko* wa achu vamoha ni oohuserya awe, ariki:
2 “Alipa oorepa ni Afarisi takiranthe mu nipuro na Mose.
3 Mwawiihiiha, mweerekeno ni muchariheke soothene awo anooleelaayaani, nto muhitakiheryeke saweera saya, woona wi anoona oloca, eheerakano.
4 Awo annamaka maphuta oolimela, enawiireiha akhwaaya, nto aneene awo hanateexa naari mano otannya ni ekatha aya.
5 Miteko soothene aneeraayano, aneerano wi yooniweke ti achu, ntakhara wi anninnuwiha ikaaxa sa soorepa anathomeyaaya vayuucini ntoko yawiikhapelelano* nave annarakamiha soowara saya.
6 Waasivela okiraathi mmapuro oocicimiheya mu ifesta, ni mipaco soopacerya* mmapuro a malapelo,*
7 waasivela tho oloceliwa mmapuro awaaciwamo ni wiichaniwa Rapi.*
8 Nto nyuwo muhiichaniweke Rapi, ntakhara wi Muhusiha anyu ori mmoha, nave oothene anyu mwa onna.
9 Nave tho, muhimwiichaneke muchu veelaponi yavathi ntoko tiithi, woona wi Tiithi anyu ori Mmoharu, yoowo ori wirimu.
10 Naari mano muhiichaniweke ahooleli, woona wi Muhooleli anyu ori mmoharu, Kristu.
11 Nyenya mutokweenexa variyari vanyu, onaphwanela okhala namuteko anyu.
12 Yoole oniisinnuwiha onamuyevihiwa, nave yoole oniiyeviha onamwinnuwihiwa.
13 “Ootakhaliwa ti nyuwo, alipa oorepa ni Afarisi, anawiisootherye! Ntakhara munnawala milako sa Omwene wa wirimu vamiithoni va achu; nto nyeenyu ene hamunavolowamo, naari mano hamunaweemererya yaale anachuna ovolowamo.
14 *——
15 “Ootakhaliwa ti nyuwo, alipa oorepa ni Afarisi, anawiisootherye! Ntakhara munnapaka mikwaha mviraka mphareya ni elapo mwaavyaka ompaka oohuserya,* nave mwamphwanya, munnamweeriha okhala oophwanelela oya o Kehena,* ikwaha piili woopwahaani nyuwo.
16 “Ootakhaliwa ti nyuwo, ahooleli eevaasi, muni: ‘Yoowo onalipela aromolaka empa ya Muluku, eyo heechu; nto yoowo onalipela amuromolaka ooru ori mu empa ya Muluku, onaphwanela okhwaaniherya olipela wawe.’
17 Alolo nyu ni eevaasi! Tiheeni eri yoopwahaxa, ooru naari empa ya Muluku enamweeliha ooru?
18 Munnaloca tho: ‘Yoowo onalipela amuromolaka altare, eyo heechu; nto yoowo onalipela aromolaka yoovaha eri va altare, onaphwanela okhwaaniherya olipela wawe.’
19 Alipa eevaasi nyu! Tiheeni eri yoopwahaxa, yoovaha naari altare oneeliha yoovaha eyo?
20 Hiihaa, yoowo onalipela amuromolaka altare, onamulipela altare ni soothene iri vaavale;
21 nave yoole onalipela aromolaka empa ya Muluku, onalipela empa yeeyo ni Yoowo onakhala mummo;
22 nave yoowo onalipela aromolaka erimu, onalipela munyukhu wa Muluku ni Yoowo okiraanthevo.
23 “Ootakhaliwa ti nyuwo, alipa oorepa ni Afarisi, anawiisootherye! Ntakhara munavaha yaneekhumi ya mmacani ntoko hortela, entro ni kominyu,* nto munnahiya ichu soochuneya sa Malamulo, ela tiwi, ekhaikhai, ikharari ni ororomeleya. Ti seiya mwaaphwanelaanyu weeraka, muhihin’ye ichu ikina.
24 Ahooleli eevaasi, munamuxaaxa* tupusi mu yoowurya anyu, nto munamirya ekamelu!
25 “Ootakhaliwa ti nyuwo, alipa oorepa ni Afarisi, anawiisootherye! Ntakhara munamurapiha koopho ni eparatho vaateru, nyenya mpuwa mwaya osaren’yemo oluluwa ni ohaakhwaneliwa.
26 Mfarisi eevaasi, opacerye toko orapiha mpuwa mwa koopho ni eparatho, wi vaate tho ekhale yooreera.
27 “Ootakhaliwa ti nyuwo, alipa oorepa ni Afarisi, anawiisootherye! Ntakhara muri ntoko mahiye eelihiwe ni kaale, vaate anakhala wi tooreera, nto mpuwa mwaya osaren’yemo makhuva a miruchu ni soothene soothanyeya.
28 Moolikana tho, vaate, achu anawoonaani okhala aphaama, nto mpuwa mwanyu moosareya ni soowoka ni soothanyeya soothene.
29 “Ootakhaliwa ti nyuwo, alipa oorepa ni Afarisi, anawiisootherye! Ntakhara munnateka mahiye a alipa a miririmu ni oreeriha mahiye* a achu awookololowa,
30 nave munnaloca: ‘Waakhanle wi naakhala mmahiku a makholo ahu, hinaahaala okhalano nthowa mu owiipha waya alipa a miririmu.’
31 Mwawiihiiha, munniiseerela onamoona wi mwa anamwane a yaale awiiphale alipa a miririmu.
32 Vano, mukhwaaniherye mphimo wa makholo anyu.
33 “Inowa nyu, muyareriwo wa ivili, muni muchawe hai othorihiwa wa o Kehena?*
34 Vanthowa nenla, kinnoorumihelaani alipa a miririmu, alipa a miruku ni ahusiha. Akina a yaawo munanwiipha ni waathomeya va mwiri, akina munamwaawaxula mmapuro anyu a malapelo* ni owiikara muceche ti muceche,
35 wi noorweeleeni nikhami na achu awookololowa niyehiwe veelaponi, ovinyerya nikhami na awookololowa Apele, ophiyerya nikhami na Sakariya, mwaana a Parakiya, yoowo mmwiphalaanyu veeri va nipuro naweela ni altare.
36 Chiri kinnooleelaani wi, ichu soothene seiha sinamwaaphacuwela achu a muyareriwo yoola.
37 “Yerusalemu, Yerusalemu, weyo onawiipha alipa a miririmu ni onaavonya maluku yaale onarumiheliwaawe . . . koheererya ikwaha sincipale waathukumanya anamwane aa, hiiha ntoko mwanakhu onaathukumanyeiye asaana awe mmakupheloni! Nto nyuwo mookhooca.
38 Vano, empa anyu enamunyanyaliwa.*
39 Hiihaa, kinnooleelaani wi: Ovinyerya hiihaano oya ohoolo, hamurwa mukoona, ophiyerya mulonce: ‘Ooreelihiwa ti yoowo onarwa mu nsina na Yehova!’”
Inoota
^ Naari: “mucici.”
^ Naari: “anninnuwiha ifilateriyu saya.”
^ Naari: “mapuro oocicimiheya.”
^ Mu Ekriki, “mmasinakooka.”
^ Naari: “Muhusiha.”
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
^ Mu Ekriki, “Proselitu.” Ela tiwi, eemerenrye okhala Muyuta.
^ Moone Masu Atharihiwe.
^ Hortela, entro ni kominyu, ichu inaphariheliwa wi sinkheliheke yoolya.
^ Naari: “munamuhukula.”
^ Naari: “mahiye anuupuweliwa.”
^ Moone Masu Atharihiwe.
^ Mu Ekriki, “mmasinakooka mwanyu.”
^ Naari akhweya: “enamuthatuwa milepe.”
