Tiyaku 2:1-26
2 Asinnaka, apwanne nyuwaano munnaaroromela Apwiya ahu Yesu Kristu, Apwiya a ncicimiho, eniiha tho mooniheryaka nthalu?
2 Vano, wakhala wi oovolowa mmithukumanoni mwanyu muchu aawanre amuneela a ooru mu ikatha sawe ni ikuwo sawaarya, nave avolowa tho muchu oohaawa awanre ikuwo soothaala,
3 apwanne munamwaakhela phaama ole owanre soowara sawaarya, mulocaka muriki: “Mukiraathi nipuro nla nooreera,” nave wa ole oohaawa muriki: “Weemele va” naari, “Okiraathe vacheyani vale waacamela kinanyikalaakavo”?
4 Yaari hiiha, apwanne himwaano nthalu variyari va achu ooreela ni oohaawa, ni okhala athoriha anapaka soolakelela soonanara?
5 Asinnaka oosiveliwa, mukiwiriyane. Apwanne hamunasuwela wi Muluku aathanlile achu oohaawa mmoonelo wa elapo, wi ereele mu nroromelo ni okhala mikelampa sa Omwene, yoowo ororomelinheiye wa yaale anamusivela?
6 Nto nyuwo munnaathanya oohaawa. Mano, tahi achu ooreela yaawo anoohooxaani ni woopurulelaani wa alipa oothoriha?
7 Tahi yaawo tho ananyemula nsina naphaama nenlo muniichaneliwaanyu?
8 Vano, wakhala wi munnaakhwaniherya nlamulo ntokotoko na Mwene, nenlo nnaphwanyeya mu soorepa: “Omusiveleke mwaacamani aa ntoko oniisivelaawe weyo mwaneene,” munneerano phaama.
9 Vano, wakhala wi mootitelela wooniherya nthalu, munapaka yoocheka, nave nlamulo ninnoosomelaani* wi mwa alipa oocheka.
10 Tiwi, muchu yoowo oniiwelela Malamulo oothene, nto akwacula nimoha, oochekela Malamulo oothene.
11 Ntakhara yoowo olonce ariki: “Ohiraruwe,” ooloca tho ariki: “Ohiiphe.” Vano, wakhala wi honararuwa, nto onniipha, weyo onakhala mulipa oochekela Malamulo.
12 Hiihaa, muloceke nave mweerekeno ichu, ntoko achu anahaala othorihiwa ni nlamulo na achu ootaphuwa.*
13 Woona wi yoowo ohinamoriwa ikharari, onarwa athorihiwa ahimoreliwe ikharari. Ikharari sinnavootha woothorihiwani.
14 Asinnaka, muchu onaphuramvo, aloca wi ookhalano nroromelo, nto ahikhanleno miteko sene? Apwanne nroromelo nlo nnanwerya omvuluxa?
15 Wakhala wi munna naari murokora vyakala oothaaleliwa* naari haano yoolya ya nihiku,
16 nave mmoha a nyuwo amuleela ariki: “Hawe, onarowa mmureceleni; wiikhuneele ni walye phaama,” nto ahimvaha yeeyo enamuthowa, mphurelo aya ene tuuvi?
17 Hiihaa tho, nroromelo pahi, nihirino miteko, ti nookhwa nene.
18 Nyenya mukina onamuloca ariki: “Weyaano wookhalano nroromelo, nave miyo kookhalano miteko. Okoonihe nroromelo naa nihirino miteko, nave miyaano kinanwooniha nroromelo naka moorweela wa miteko saka.”
19 Apwanne onneemererya wi orivo Muluku mmoharu? Onneerano phaama. Nave tho masololo anneemererya nave annathukumela.
20 Mulolo we, onachuna osuwela wi nroromelo noohikhalano miteko ti nasiiyo?
21 Aparahamu atiithi ahu, apwanne hiyeeriwe awookololowa moorweela wa miteko, emanle omveleela mwanaya Isaki va altare?
22 Woone wi nroromelo naya naacharihiwe ni miteko saya nave nroromelo naya naahikhala nawaakhwanela moorweela wa miteko saya,
23 nave saahaakhwanela soorepa saaloca wi: “Aparahamu aamuroromela Yehova, hiihaa, aaheeriwa okhala awookololowa,” nave aahiichaniwa nthamwene a Yehova.
24 Vano mohiiwexexa wi muchu oneeriwa awookololowa moorweela wa miteko, ohiya ni nroromelo pahi.
25 Moolikana tho, apwanne Rahapi, capaheya yoole, heeriwe awookololowa moorweela wa miteko amanle owaakhela phaama anamichaka ni waarowiha eviraka mphiro mukina?
26 Chiryene, hiihaa ntoko mwiili woohikhalano nwiya wa okumi* oryaaya wookhwa, hiihaa tho nroromelo noohikhalano miteko nri nookhwa nene.
Inoota
^ Naari: “munnasameliwa.”
^ Mu Ekriki, “nlamulo nnataphula.”
^ Mu Ekriki, “ori eepwitikiri ene.”
^ Mu Ekriki, “munepa.”
