2 Timotiyu 3:1-17
3 Nyenya suwela ela, wi mmahiku ookuchula inamphiya ilukuluku sa sookacamiha, soovila ovilela.
2 Tiwi achu enarwa ekhala awiisivela mukhataaya, oosivela ikhorowa, awiirumiha, awiikhoma, amunyemu, oohiwiiwelela awaayara, oohithamalela, oohiroromeleya,
3 oohikhalano osivela wooyariwano, oohaataanyiheya, awootha, oohiwerya wiihiiha, oowali, amwiicani a saphaama,
4 ooweerela akhwaaya soonanara,* oohiwiriyana miruku, awiirumiha, oosiveliwa opuha ohiya omusivela Muluku,
5 elocaka wi annamulapa Muluku, nyenya ehooniheryaka moorweela wa mukhalelo wa okumi aya; nave wa yaala, wiivalaanyeno.*
6 Mwa yaala annakhumelela achu yaawo aniipunyeerya mu ichoko mwa mavyakelo, nave enaaphara athiyana ooceecheya, oosareya soocheka, ookuxiwa ni soochunachuna soohiyana hiyana,
7 yaawo anatitelela ohuserya, nave ehiweryaka okhalano masuwelelo awaakhwanela eeparipari.
8 Hiiha ntoko Yane ni Yampre yaamvannyaaya Mose, yaala tho annatitelela ovaanya eparipari. Alopwana yaala, muupuwelo aya wohuutuweleya moomalela nave vooloca sa nroromelo, hari aweemereryiwa.
9 Nto hewerya ophiya ociiwene, woona wi ololo* aya onarwa osuweliwa mookwakwaleya ni achu oothene, hiiha ntoko yeeren’yaaya ni alopwana ale eeli.
10 Nyenya weyo, woochariha vakhivirukhiviru mahusiheryo aka, mukhalelo aka wa okumi, yookhwela aka, nroromelo naka, opixa waka murima, osivela waka, ovilela waka,
11 wiikariwa ni ohooxeya waka, ntoko seihe kaakumannaakano o Antiyokeya, o Ikoniyu, ni o Listra. Koovilela ni wiikariwa wuuwu nave Apwiya aakivuluxa mu soothesene.
12 Mweeparipari, oothene yaale anachuna omulapa Muluku, mwawiiwanana ni Kristu Yesu, enarwa tho yiikariwa.
13 Nyenya achu oonanara murima ni oowoka, ekaamvira etepaka, yaawokaka achu nave ewokiwaka.
14 Vano weyo, otitelele mu ichu ohusenryaawe ni weemerenryaawe, waasuwelaka yaawo yoohusinhe
15 nave ovinyerya oyemve woosuwela soorepa saweela, seiho inawerya oweeriha okhala a miruku ntakhara ovuluxa moorweela wa nroromelo mwa Kristu Yesu.
16 Soorempwa soothene iveereliwe ti Muluku nave ti samphurelo mu ohusiha, osamela, weereryanya ichu,* olaka mwawookololowa,
17 wi muchu a Muluku akhale oophwanelela, ni ooreheryeya mwawaakhwanela weerano miteko soothene saphaama.
Inoota
^ Naari: “amakhuce.”
^ Naari: “waarapele; waasepe.”
^ Naari: “okhamiruku; olosowa.”
^ Naari: “wookolola.”
