Saweeriwa ti Arummwa 3:1-26
3 Petru ni Yohani yaawela eyaaka o empa ya Muluku mu elukuluku ya mavekelo, yaari ewora yaneethanu naxexe,*
2 nave mulopwana oorakala oyariwa wooyariwa aateexiwa. Mahiku oothene aanakuhiwa waacamela mulako wa empa ya Muluku wiichaniwa Wooreera, wi avekeke samahala sa ikharari wa oothene yaale yaavolowa mu empa ya Muluku.
3 Vaavaa aamonneiye Petru ni Yohani evolowaka mu empa ya Muluku, aahaaveka echu.
4 Nto Petru ni Yohani yaanweha yoowo, nave Petru aalocano ariki: “Oviihe muru, onaniweha.”
5 Mwawiihiiha, owo aanaawehaxa uupuwelaka wi awo yaahaala omvaha echu.
6 Nto Petru aaloca: “Miyaano nkaano eparata naari ooru, nto yeeyo kiryaakano kinamoovaha. Mu nsina na Yesu Kristu o Nasareti, vinya weece!”
7 Mwawiihiiha, Petru ampharela ntata nawe noolopwana amviiha. Moohilekela, inaani ni ikosa sawe saalipa;
8 aacupha eemela, apacerya weeca nave avolowa ni yaawo mu empa ya Muluku, eecaka, acuphaka ni amuthamalaka Muluku.
9 Achu oothene yaamoona eecaka ni amuthamalaka Muluku.
10 Nave oothene yaamusuwela wi aari mulopwana yoole aaveka samahala sa ikharari akiranthe va Mulako Wooreera wa empa ya Muluku, nave awo yaatikhiniheya ni ehalenle vanthowa na yeeyo yeeren’ye ni yoowo.
11 Mulopwana ole aamwaakeelela Petru ni Yohani nave muloko woothene wa achu ohaleelihen’ye, waahaachimakela o nipuro nawiichaniwa Nipithela na Solomoni.
12 Vaavaa Petru onneiye yeela, aaloca ni muloko wa achu ariki: “Achu nyu o Isarayeli, ntakhara heeni muryaanyu ootikhiniheya ni yeela? Nave, ntakhara heeni munaniwehaanyu hiiha ntoko wi hiyaano nimweecinhe mulopwana ola moorweela wa ikuru sahu ni omulapa wahu Muluku?
13 Muluku a Aparahamu, a Isaki, ni a Yakopo, Muluku a makholo ahu, oomucicimiha Kapuro awe, Yesu, yoowo mwaamveleenlaanyu nave mmukhooca vamiithoni va Pilatu, naamwi owo aalakelenle omutaphula.
14 Aa, nyuwo mwaamukhooca aweela murima ni awookololowa, nave mveka wi ataphuliwe muchu awiipha,
15 mmwiipha Muhooleli Mutokweene a okumi. Nto Muluku omviiha mookhwani nave na anamoona a yeela.
16 Nave moorweela wa nsina nawe, ni mwa nroromelo nryaahuno mwa nsina nawe, tinimulipinhe mulopwana ola munamoonaanyu nave munamusuwelaanyu. Nroromelo nenlo nnarwa mwa Yesu, tinimvanhe mulopwana ola okumi wawaakhwanela vamiithoni wa nyuwo oothene.
17 Nyuwo anna, koosuwela wi yeela mweenreno muhisuwelaka hiihaa ntoko ahooleli anyu yeenraaya.
18 Nto mmukhalelo yoola, Muluku ohaakhwaniherya yeeyo aalonceiye khalai mwa alipa a miririmu oothene wi Kristu awe onarwa ahooxiwa.
19 “Mwawiihiiha, charuwani nave murukunuxe murima wi ixipihiwe soocheka sanyu, hiihaa, munamwaakhela ilukuluku sookurumuxa murima sinarweela wa Yehova*
20 nave oorumiheleeni Yesu, yoowo othanleliwe wa nyuwo okhala Kristu.
21 Ola onnaphwanela otitelela okhala wirimu, ophiyerya ilukuluku seiho Muluku oneereiye arehererye ichu soothene, ntoko aalonceiye khalai moorweela wa alipa a miririmu awe aweela.
22 Mweeparipari, Mose aaloca: ‘Mwa asinninyu, Yehova Muluku anyu onammuthanla mulipa a miririmu oolikana ni miyo. Muwiriyaneke soothene oneereiye ooleelekeeni.
23 Chiryene, oothene yoole* oni ahinwiriyaneke Mulipa a Miririmu yoowo, onarwa atoloxiwa variyari va nloko.’
24 Nave alipa a miririmu oothene, opacerya wa Samuwele ni oothene oocharela, alonce emohamoha, chiri yaalokoha sa mahiku yaala.
25 Nyuwo mwa anamwane a alipa a miririmu nave munnaakhela tho waataana weiwo Muluku aapankeiye ni makholo anyu, alocaka wa Aparahamu ariki: ‘Maloko oothene a veelaponi ya vathi enarwa ereelihiwa moorweela wa muyareriwo* aa.’
26 Muluku amanle omviiha mookhwani kapuro awe, woopacerya aahoorumihelaani nyuwaano wi ooreeliheeni moorweela wa oviihavo wa mmoha ti mmoha a nyuwo soonanara sawe.”
Inoota
^ Ela tiwi, variyari va ewora ya 15.
^ Mu Ekriki, “sinarweela wiithoni wa Yehova.”
^ Naari: “muchu ti muchu.”
^ Mu Ekriki, “mmiso.”
