Mateyu 19:1-30
19 Aamalinheiye ooloca ichu seiha, Yesu aavinya o Kalileya ayaaka okhopela* wa Yortano makupa o Yuteya.
2 Navetho, muloko* muncipale wa achu waamuchara, nave aahaapenuxa achu awiiceliwa.
3 Afarisi echunaka omweeha, yaamwaacamela Yesu emukoha eriki: “Apwanne onneemereryeya wi mulopwana amwalane ni mwaariye ni mathowa vyakala?”
4 Owo aawaakhula: “Apwanne himwaalakhannye wi yoole aapatunxe woopaceryani, aahaapaka yaawo mulopwana ni muthiyana,
5 nave aloca: ‘Va nthowa nenla mulopwana onamwaahiya apapa awe ni amama awe wi aphitaane ni mwaariye, nave oopiili anamukhala mwiili mmoha’?
6 Mwawiihiiha hari eeli, nto mwiili mmoha. Vanthowa nenla, yeeyo Muluku ophitaannyeiye mu nipisi nimoha, muchu ahimwalanye.”
7 Awo yaamukoha: “Vano ntakhara heeni Mose aalamulela wi mulopwana amwiinnye muthiyana ekaarata ya omwalana ni omurowiha?”
8 Owo aawaakhula: “Mose aaweemerenryeeni omwalana ni asaarinyu va nthowa na wuuma wanyu murima. Nyenya woopaceryani hiyaari hiiha.
9 Hiihaa, kinnooleelaani wi yoole onamwalana ni mwaariye, voohikhala nthowa na ocapaheya,* nave amuthela mukina, onamuraruwa.”
10 Oohuserya awe yaaloca wa yoowo: “Waakhanle wi ti yeeyo eneereya wa mulopwana ni mwaariye, ti yaphaama ohithelaru.”
11 Yesu aaloca wa yaawo: “Tahi wi oothene annawerya waakhwaniherya yeela kiloncaaka, pahiru yaale avahiwe yamahala yeela.*
12 Vawi aakhalavo achu ahivahiwe mukhalelo wa othela* oyariwa wooyariwa, akina hanathela* nthowa na ohuliwa ti achu, nave tho aakhalavo akina arinono mukhalelo wa othela nto yiihiiha* nthowa na Omwene wa wirimu. Yoole onawerya okhala mmukhalelo yoola, eereno.”
13 Voocharela achu yaanamuruuhela Yesu anamwane wi aakuherye matata awe* ni waavekelela, nto oohuserya yaanaasamela.
14 Mwawiihiiha, Yesu aahi wa yaawo: “Mwaahiye anamwane awo, nave muhaahiihe orwa wa miyo, woona wi Omwene wa wirimu ti wa yaale ari ntoko anamwane yaala.”
15 Amanle waakuherya matata awe, owo aapwahavo.
16 Mmiravo mmoha aamwaacamela Yesu, amukoha: “Muhusiha, echu taani yaphaama kinaphwanelaaka weera wi kaakhele okumi woohimala?”
17 Owo aamwaakhula: “Ntakhara heeni onakikohaawe sa yeeyo eri yaphaama? Aphaama orivo mmoharu pahi. Nyenya, waachunaka waakhela ekumi yoohimala, wiiweleleke malamulo.”
18 Mmiravo aakoha: “Malamulo taani?” Yesu aamwaakhula: “Ohiiphe, ohiraruwe, ohiiye, ohimootherye mukhwaa,
19 waacicimiheke apapaa ni amamaa, nave omusiveleke mwaacamani aa ntoko oniisivelaawe weyo mwaneene.”
20 Mmiravo aahi wa Yesu: “Kinniiwelela malamulo oothene yaala; vano tiheeni enakihalela?”
21 Yesu aahi wa yoowo: “Waachunaka okhala oophaameya,* hawe watumihe soothene oryaaweno nave ikhorowa sene waavahe achu oohaawa, hiihaa, onamukhalano muhakhu wirimu; ohoolo waya, orwe okichareke.”
22 Vaavaa mmiravo iiwaleiye yeela, aarowa athananaka, woona wi aakhalano muhakhu muncipale.
23 Voocharela, Yesu aaloca wa oohuserya awe: “Chiri kinnooleelaani wi onamukhala woovila muchu ooreela ovolowa mu Omwene wa wirimu.
24 Kinnooleelaani tho wi, ti wookhweya ekamelu ovira va ephaka ya sikano, opwaha mulipa ooreela ovolowa mu Omwene wa Muluku.”
25 Vaavaa oohuserya yiiwalaaya yeela, yaatepa otikhiniheya, eloca: “Vano taani chiryene oni awerye ovuluxiwa?”
26 Aawehaka oohuserya awe, Yesu aahi: “Wa achu ela henaweryeya, nto wa Muluku, soothene ti sooweryeya.”
27 Petru aahaakhula: “Onani! Noohiya ichu soothene nnoocharaani; vano, tiheeni nnahaalaahu waakhela?”
28 Yesu aahi wa yaawo: “Chiri kinnooleelaani wi, elukuluku yeeyo ichu ineeraaya ikhale ivyaani, nave Mwaana a muchu akiranthe vamunyukhuni vawe woocicimiheya, nyuwo munakichara munarwa mukiraathi mminyukhu khumi napiili, muthorihaka mahimo khumi napiili a Isarayeli.
29 Nave oothene yoole ohin’ye ipa sawe, naari asinnawe, naari arokorawe, naari apapa awe, naari amama awe, naari anamwane awe, naari imaca sawe, vanthowa na nsina naka, onarwa aakhela opwaha ikwaha nsana hiihaano, nave muhoolo ekumi yoohimala.
30 “Nyenya ancipale ari oopacerya anamukhala ookuchula, nave ookuchula anamukhala oopacerya.
Inoota
^ Naari: “minlaano.”
^ Naari: “mucici.”
^ Mu Ekriki, “porneiya.” Moone Masu Atharihiwe.
^ Ela tiwi, ya ociye.
^ Mu Ekriki, “ari eunuku.”
^ Mu Ekriki, “akina ari ma eunuku.”
^ Mu Ekriki, “aakhalavo akina ari ma eunuku.”
^ Ela tiwi, wi aareelihe.
^ Naari: “awaakhwanela.”
