Salmu 146:1-10
146 Mmucicimihe Yehova!*
Omuchu aka woothene* omucicimihe Yehova.
2 Kinammucicimiha Yehova mu okumi aka woothene.
Kinamwiipa macipo oomucicimihano* Muluku aka vaavaa kiryaaka mukumi.
3 Muhaaroromeleke ahooleli*Naari mano anamwane a achu, yaawo ahinawerya oruuha nivuluxo.
4 Nwiya aya onnapwahamo, nave awo annakookela vanchupini;Mu nihiku nene nenlo muupuwelo aya onnamala.
5 Oohakalala muchu yoowo orino Muluku a Yakopo ntoko mukhaviheryi awe,Yoowo onatikitherya ewehereryo awe mwa Yehova, Muluku awe,
6 Yoowo opanke erimu ni elapo yavathi,Ephareya ni soothene siri mwemmo,Yoowo ilukuluku soothene ori oororomeleya,
7 Yoole onapaka wookololowa wa achu oolyeliwa,*Yoole onaavaha yoolya achu oovoliwaYehova onnaataphula achu oophariwa.*
8 Yehova onnahula miitho a achu oohoona;Yehova onnaaviiha achu ookulama;Yehova onnaasivela achu awookololowa.
9 Yehova onnaakhapelela anamarwa;Onnamukhaviherya naamukhwele ni ekwaasuni,*Nto onnaakanyerya marehereryo a achu oonanara murima.*
10 Yehova onamukhala Mwene okhala wookhala;Muluku aa, weyo Siyoni, onamulamulela wa muyareriwo ti muyareriwo.
Mmucicimihe Yehova!*
Inoota
^ Mu Ehepiri, “Aleluya!” Nsu nla nookhalano marepeliwo ookhuveya a nsina, Yehova.
^ Naari: “Okumi aka.”
^ Naari: “Kinammupakela macipo.”
^ Naari: “achu oocicimiheya.”
^ Naari: “awiiyeriwa.”
^ Mu Ehepiri, “oomakiwa.”
^ Naari: “mwaana ohirino apapa awe.”
^ Naari: “onnakhoromanyiha ephiro ya achu oonanara murima.”
^ Mu Ehepiri, “Aleluya!” Nsu nla nookhalano marepeliwo ookhuveya a nsina, Yehova.
