Salmu 103:1-22
Salmu a Tavite.
103 Okumi aka omucicimihe Yehova;Soothene iri mwa miyo icicimihe nsina nawe naweela.
2 Okumi aka omucicimihe Yehova;Ohirwe ocuwale soothene owo enreiye.
3 Owo onnalevelela soohesa saka sootheneNave onnapenuxa ireca saka soothene;
4 Owo onnoopola okumi aka wa nlici.*
Nave onnakiwariha korowa a osivela woororomeleya ni ikharari.
5 Owo onnakihakalaliha ni ichu saphaama mu okumi aka woothene,Nave kinnatitelela okhala mmiravo ni a ikuru ntoko enaka.
6 Yehova onneerano ichu mwawookololowa ni mweekhaikhaiWa oothene yaale anahooxiwa.
7 Owo aahisuweliha iphiro sawe wa Mose,Saweera sawe wa anamwane a Isarayeli.
8 Yehova ta ikharari ni a niphwanya,*Oopisa murima* ni oosareya osivela woororomeleya.*
9 Owo hanansamela moohihiyererya,Naari mano otitelela oonyeenyeya okhala wookhala.
10 Owo hananikhaliha mwawiiwanana ni soocheka sahu,Naari mano onikookiherya yeeyo enaniphwanela wa soohesa sahu.
11 Hiiha ntoko erimu eryaaya osuluxa opwaha elapo yavathi,Hiiha tho, osivela wawe woororomeleya otokweene wa yaawo anamoova yoowo.
12 Hiiha ntoko onakhumawo nsuwa orakamelannaaya ni nnaneelaayawo,Hiiha tho owo onnakuha ocai wa hiyo soohesa sahu.
13 Hiiha ntoko tiithi onooniheryeiye ikharari wa anaawe,Yehova onnooniherya ikharari wa yaale anamoova.
14 Tiwi owo oosuwela phaameene mukhalelo nipakiwaahu,Onnuupuwela wi hiyo na nchupi.
15 Mahiku a muchu ari ntoko munyepu;Owo onnataphuruwa* ntoko ethutu ya mmacani,
16 Yeeyo enacakanela echeku yoopa,Ekhala ntoko wi hiyintonko okhala.*
17 Nto osivela woororomeleya wa Yehova onnalekela okhala wookhala*Wa yaawo anamoova yoowo.
Nave wookololowa wawe wa anamwane a anamwane aya.
18 Wa yaale anakhapelela waataana waweNi wa yaale aniilipixerya wiiwelela malamulo awe.
19 Yehova ootikitherya moolipa munyukhu awe wirimu,Owo onnalamulela soothene.
20 Mmucicimihe Yehova, nyuwo ankeelo awe oothene, akuru ni oowerya,Mwaakhwaniheryeke masu awe, mwiiwelelaka yeeyo owo onaloceiye.*
21 Mmucicimihe Yehova, anakhoco awe oothene,Alapeli* awe, yaawo anapaka yookhwela awe.
22 Simucicimihe Yehova, miteko sawe soothene,Mmapuro oothene owo onalamuleleiyemo.*
Omuchu* aka woothene omucicimihe Yehova.
Inoota
^ Naari: “nihiye.”
^ Naari: “oothananela.”
^ Naari: “Oohaakuvela onyeenyeya.”
^ Naari: “ooreera murima.”
^ Naari: “onnaaluwa.”
^ Mu Ehepiri, “Nave nipuro naya hinnasuwela tho yeeyo.”
^ Naari: “opacerya ilukuluku sihirino mapacereryo ophiyerya ilukuluku soohimala.”
^ Mu Ehepiri, “nwiriyanaka oruma wa nsu nawe.”
^ Naari: “Anamuteko.”
^ Naari: “Mmapuro oothene a otokweene awe.”
^ Naari: “Okumi.”
