Saweeriwa ti Arummwa 15:1-41
-
Ovaanyihana o Antiyokeya vooloca sa othikiliwa (1, 2)
-
Mwaha onnakerihiwa o Yerusalemu (3-5)
-
Atokweene ni arummwa annathukumana vamoha (6-21)
-
Ekaarata yoorweela o nikhuuru noolamulela (22-29)
-
Othanya nikhami (28, 29)
-
-
Miloko sinnalipihiwa moorweela wa ekaarata (30-35)
-
Paulo ni Parnape annamwalamwala iphiro (36-41)
15 Alopwana akina yaakhuruwa erwaaka o Yuteya nave epacerya waahusiha anna eriki: “Mwaahithikiliwa ntoko mu yookhoveleliha ya Mose, nyuwaano hamuwerya ovuluxiwa.”
2 Nto, Paulo ni Parnape emanle ovaanyihana ni waakasihana vatokotoko ni yaawo, yaalakeleliwa wi Paulo, Parnape ni akina ewele eyaaka o Yerusalemu wi yavarerye mwaha yoola* ni arummwa ni atokweene.
3 Hiihaa, muloko omanle waahoola vakhaani, alopwana ala yaatitelela mukwaha aya eviraka ilapo so Fenisiya ni Samariya, wa achu a maloko elokohaka orukunuwa murima wa achu a maloko nave yaahakalalihakaxa anna oothene.
4 Yaaphiyalaaya o Yerusalemu, awo yaahaakheliwa phaama ti muloko, arummwa ni atokweene; nave awo yaahaaleela ichu soothene Muluku enreiye moorweela wa yaawo.
5 Nto akina a nikhuuru na Afarisi, yaawo yaaroromenle, yaaheemela enaloca eriki: “Ti woochuneya chiri wi ethikiliwe ni waalamulela wi echariheke Malamulo a Mose.”
6 Mwawiihiiha, arummwa ni atokweene yaathukumana vamoha wi ethokororye mwaha yoola.
7 Emanle ovaanyihanaxa mu elukuluku yincipale, Petru aavinya nave aloca ariki: “Alopwana, anna, nyuwaano moosuwela phaameene wi ovinyerya mmahiku oopacerya, Muluku aakithanla wa nyuwo wi achu a maloko yiiwe michaka saphaama ikhumaka mwaano mwaka nave wi eroromele.
8 Nave Muluku, yoowo onasuwela mirima, aaweerela onamoona moorweela wa waavaha munepa waweela, ntoko eenreiyeno tho wa hiyaano.
9 Nave owo haahiyaninhe yaawo ni hiyo, nto aaheeliha mirima saya moorweela wa nroromelo.
10 Vano ntakhara heeni nyuwaano munamweereryaanyu Muluku, mukuhaka muxikoni mwa oohuserya nipisi nenlo naari makholo ahu naari hiyaano nihiwenryaahu oteexa?
11 Moohiyana, ninnaroromela wi noovuluxiwa moorweela wa mahala matokweene a Apwiya Yesu hiihaa ntoko yaawo.”
12 Mwawiihiiha, nikhuuru noothene naamaala, nipacerya onwiriyana Parnape ni Paulo elokohaka sa ineneeryo ni sootikhiniha sincipale seiho Muluku eenreiye mwa yaawo, veeri va achu a maloko.
13 Yaamalinhaaya oloca, Tiyaku aahaakhula ariki: “Alopwana, anna, mukiwiriyane.
14 Simiyone aanleela mookwakwaleya mukhalelo Muluku, mu ekwaha yoopacerya, aakookenleiye wa achu a maloko wi iithanlele achu yii ekuxe nsina nawe.
15 Nave masu a alipa a miririmu aacicimiherya yeela tho, ntoko erempwaaya wi:
16 ‘Evinre yeela, kinamukooka; kinarwa kiviiha muxakala* wa Tavite wuuwale. Kinarwa kiteka tho milepe sawe, kirehererye,
17 wi achu ahanle emwaavye Yehova moowetha, vamoha ni achu a maloko oothene, achu yaawo aniichaneliwa nsina naka, onaloca ti Yehova, yoowo oneerano ichu seiha,
18 isuweliwe ovinyerya khalai.’
19 Mwa yeela, yoolakelela aka* tahi waaruuhela makacamiho achu yaala a maloko anarukunuwela wa Muluku,
20 nto naarepele wi ethanyeke* soothene inaveleeliwa wa soophwaniherya, ocapaheya,* axinama oonyopocholiwa,* ni nikhami.
21 Ovinyerya khalai, Mose ookhalano achu yaawo analaleerya masu awe epooma ti epooma, woona wi annaalakhanyiwa mmapuro a malapelo* a Sapata oothene.”
22 Voocharela, arummwa ni asitokweene, vamoha ni muloko woothene, yaalakelela waarumiha wa Antiyokeya alopwana yaathanlilaaya variyari va yaawo, vamoha ni Paulo ni Parnape; awo yaamurumiha Yutasi yoowo iichaniwa Parsapa ni Sila, alopwana yaawo yaahoolela variyari va anna.
23 Awo yaarepa nave yaarumiha ekaarata ela moorweela wa yaawo:
“Hiyo, arummwa ni asitokweene, asinninyu, wa anna oothene o Antiyokeya, o Siriya, ni o Silisiya yaawo anarweela mmaloko: Ninnoovonyeryaani mooni!
24 Nohiiwa wi akina akhumme mwa hiyo annatannya makacamiho wa nyuwo wa yeeyo analocaaya, nave anneererya owaakanyeryaani;* nyenya hiyo hinaalamulenle yaawo.
25 Wa nthowa na yeela, noolakelela ni murima mmoha, waathanla alopwana wi noorumiheleeni nyuwo vamoha ni oosiveliwa ahu Parnape ni Paulo,
26 yaawo alemve okumi aya mu nsina na Apwiya ahu Yesu Kristu.
27 Mwawiihiiha, ninnoorumihelaani Yutasi ni Sila, yaawo eni ecicimiherye ni eyano ichu imohamoha.
28 Vawi munepa waweela vamoha ni hiyo tho nohoona wi nihoovaheeni nyuwo murici mukina, voohikhala ichu iha sookhweleya:
29 Wi mutitelele othanya ichu siveleeliwe wa soophwaniherya, nikhami, axinama oonyopocholiwa,* ni ocapaheya.* Wakhala wi mootitelela orapela ichu seiha, ichu inanweecelakaani phaama. Mwaakhele mooni ahu.”*
30 Mwawiihiiha, vaavaa alopwana ala yaalaannyaaya, yaakhuruwela wa Antiyokeya, ethukumanya nikhuuru noothene nave yaannya ekaarata.
31 Emanle waalakhanya, awo yaahakalala nthowa na waakhela masu oolipiha.
32 Yutasi ni Sila, woona wi yaari alipa a miririmu, yaahaaceenyerya anna ni miyaha mincipale nave yaahaalipiha.
33 Yaamalinhaaya elukuluku eri weiwo, anna yaahaarowiha mmureceleni wi ekookele wa anna yaawo yaarumme.
34 *——
35 Nto Paulo ni Parnape yaakhala o Antiyokeya, vamoha ni akina ancipale, ehusihaka ni elaleyaka michaka saphaama sa masu a Yehova.
36 Evinre mahiku, Paulo aaloca wa Parnape: “Haya* nikookele wa anna wi naaxekurye mu ipooma soothene nlaleenryaahumo masu a Yehova, wi nawoone okhala waya.”
37 Parnape aalakelela omukuxa Yohani, yoowo iichaniwa Marko.
38 Nyenya Paulo, heemerenrye omukuxa yoowo wi echaanane, woona wi aahaahiya o Panfiliya, nave haahoonle omutekoni.
39 Mwa yeela, waakhalavo ovaanyihana* otokweene, ophiyerya wi emwalamwala mmoha ni mukhwaawe. Hiihaa, Parnape aamukuxa Marku nave elapuwa eyaaka o Xipre.
40 Paulo aamuthanla Sila nave anna emanle omveleela wa Yehova ni mwa mahala awe matokweene, owo aapwaha.
41 Owo aavira o Siriya ni o Silisiya, alipihaka miloko.
Inoota
^ Naari: “Ovaanyihana yoola.”
^ Naari: “nramaacha; empa.”
^ Naari: “moonelo aka.”
^ Naari: “esepeke.”
^ Mu Ekriki, porneiya. Moone Masu Atharihiwe.
^ Naari: “yiiphiwe ehihitiwe.”
^ Mu Ekriki, “mu asinakooka.”
^ Naari: “waakanyerya okumi anyu.”
^ Naari: “yiiphiwe ehihitiwe.”
^ Mu Ekriki, porneiya. Moone Masu Atharihiwe.
^ Naari: “Mukhaleno ekumi yaphaama.”
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
^ Naari akhweya: “moohikhwa minikwa.”
^ Naari: “onyenyeihana vatokotoko; ohiiwanana.”
