Abebbulaniya 10:1-39
-
Ssaddaaka ez’ensolo tezisobola kuggyako muntu bibi (1-4)
-
Amateeka gaali kisiikirize (1)
-
-
Kristo yawaayo ssaddaaka emu emirembe n’emirembe (5-18)
-
Ekkubo eddamu era eriggya (19-25)
-
Obutalekaayo kukuŋŋaana wamu(24, 25)
-
-
Balabulwa beewale okwonoona mu bugenderevu (26-31)
-
Kyetaagisa obuvumu n’okukkiriza okusobola okugumiikiriza (32-39)
10 Okuva Amateeka bwe gali ekisiikirize obusiikirize+ eky’ebintu ebirungi ebigenda okujja,+ so si ebintu ebyo byennyini, tegasobola* kufuula abo abasinza Katonda okuba abatuukiridde+ okuyitira mu kuwangayo ssaddaaka ze zimu buli mwaka.
2 Singa kyali bwe kityo, ssaddaaka zandibadde tezaakoma dda okuweebwayo, olw’okuba abo abazireeta * bandibadde baatukuzibwa omulundi gumu nga tebakyemanyiiko kibi?
3 Naye ssaddaaka ezo zijjukiza abantu ebibi buli mwaka,+
4 kubanga omusaayi gw’ente ennume n’ogw’embuzi tegusobola kuggyawo bibi.
5 N’olwekyo, bw’ajja mu nsi agamba nti: “‘Ssaddaaka n’ebiweebwayo tewabyagala, naye wanteekerateekera omubiri.
6 Ebiweebwayo ebyokebwa n’ebiweebwayo olw’ekibi tewabisiima.’+
7 Awo ne ŋŋamba nti, ‘Laba! Nzize (kyampandiikibwako mu muzingo*) okukola by’oyagala, Ai Katonda.’”+
8 Oluvannyuma lw’okugamba nti: “Tewayagala era tewasiima ssaddaaka, n’ebiweebwayo, n’ebiweebwayo ebyokebwa, n’ebiweebwayo olw’ekibi”—ssaddaaka eziweebwayo okusinziira ku Mateeka—
9 agamba nti: “Laba! Nzize okukola by’oyagala.”+ Aggyawo ekisooka asobole okussaawo eky’okubiri.
10 Olw’ebyo Katonda ‘by’ayagala,’+ tutukuziddwa okuyitira mu kuweebwayo kw’omubiri gwa Yesu Kristo omulundi gumu.+
11 Era buli kabona ayimirira mu kifo kye buli lunaku okuweereza+ n’okuwaayo ssaddaaka ze zimu emirundi mingi,+ ezitasobola kuggirawo ddala bibi.+
12 Naye ye yawaayo ssaddaaka emu olw’ebibi emirembe n’emirembe, n’alyoka atuula ku mukono gwa Katonda ogwa ddyo,+
13 era okuva olwo alindirira okutuusa abalabe be lwe balifuulibwa ng’entebe y’ebigere bye.+
14 Kubanga okuyitira mu ssaddaaka emu eyaweebwayo, afudde abo abatukuzibwa okuba abatuukiridde+ emirembe n’emirembe.
15 Ate era, omwoyo omutukuvu nagwo gutuwa obujulirwa, kubanga bwe gumala okugamba nti:
16 “‘Eno ye ndagaano gye ndikola nabo oluvannyuma lw’ennaku ezo,’ Yakuwa* bw’agamba. ‘Nditeeka amateeka gange mu mitima gyabwe, era ndigawandiika mu birowoozo byabwe.’”+
17 Era gugamba nti: “Siriddamu kujjukira bibi byabwe n’ebikolwa byabwe eby’obujeemu.”+
18 Bwe kityo, ebyo bwe biba nga bibasonyiyiddwa, kiba tekikyetaagisa kuwaayo kiweebwayo olw’ekibi.
19 Kale ab’oluganda, okuyitira mu musaayi gwa Yesu tetutya kukozesa kkubo eriyingira mu kifo ekitukuvu,+
20 ekkubo lye yatuggulirawo,* eriggya, eddamu, era eriyita mu lutimbe,+ kwe kugamba, omubiri gwe,
21 era okuva bwe tulina kabona omukulu ennyo bw’atyo akulira ennyumba ya Katonda,+
22 ka tutuukirire Katonda nga tulina emitima egy’amazima era nga tulina okukkiriza okw’amaanyi, okuva emitima gyaffe bwe gimansiddwako ne giggibwako omuntu ow’omunda omubi+ era n’emibiri gyaffe ne ginaazibwa amazzi amayonjo.+
23 Ka tunywerere ku kwatula essuubi lyaffe mu lujjudde awatali kuddirira,+ kubanga eyasuubiza mwesigwa.
24 Era ka buli omu ku ffe alowoozenga* ku munne, okumukubiriza okwagala n’okukola ebikolwa ebirungi,+
25 nga tetulekaayo kukuŋŋaananga wamu+ ng’abamu bwe bakola, naye nga tuzziŋŋanamu amaanyi,+ naddala nga bwe mulaba nti olunaku lusembedde.+
26 Bwe tukola ekibi mu bugenderevu oluvannyuma lw’okutegeerera ddala amazima,+ waba tewakyaliwo ssaddaaka ndala eweebwayo olw’ebibi byaffe,+
27 naye wabaawo entiisa ey’okulindirira okusalirwa omusango, era wabaawo obusungu obubuubuuka obugenda okusaanyaawo abalabe ba Katonda.+
28 Omuntu yenna amenya Amateeka ga Musa afa awatali kusaasirwa, kasita wabaawo obujulizi bwa bantu babiri oba basatu.+
29 Mulowooza omuntu alinnyiridde Omwana wa Katonda, atatutte musaayi gw’endagaano+ ogwamutukuza ng’ogw’omuwendo, era anyoomodde omwoyo ogw’ekisa eky’ensusso,+ taaweebwe ekibonerezo ekisingawo obunene?
30 Kubanga tumumanyi Oyo eyagamba nti: “Okuwoolera eggwanga kwange; nze ndisasula.” Era nti: “Yakuwa* aliramula abantu be.”+
31 Kya ntiisa nnyo okugwa mu mikono gya Katonda omulamu.
32 Naye mujjukirenga ennaku ezaayita ze mwafuniramu ekitangaala,+ ne mugumiikiriza ensiitaano ey’amaanyi n’okubonaabona.
33 Oluusi mwafuukanga ng’ekyerolerwa nga muvumibwa era nga mubonyaabonyezebwa, ate oluusi mwabanga* wamu n’abo abaabanga boolekagana n’ebintu ng’ebyo.
34 Kubanga mwalumirirwa abo abali mu kkomera era ne mukkiriza okunyagibwako ebintu byammwe naye ne musigala nga muli basanyufu,+ nga mukimanyi nti mulina eky’obusika ekisingawo obulungi era eky’olubeerera.+
35 N’olwekyo, temulekangayo kuba bavumu,* kubanga ekyo kijja kubaweesa empeera ennene.+
36 Mwetaaga okugumiikiriza+ musobole okufuna ekyo kye yasuubiza nga mumaze okukola Katonda by’ayagala.
37 Kubanga wasigaddeyo “akaseera katono nnyo,”+ era “oyo ow’okujja ajja era tajja kulwa.”+
38 “Naye omutuukirivu wange anaabanga mulamu lwa kukkiriza,”+ era “bw’adda ennyuma simusanyukira.”+
39 Tetuli abo abadda ennyuma mu kuzikirira,+ wabula tuli abo abalina okukkiriza okusobola okuwonyaawo obulamu.
Obugambo Obuli Wansi
^ Era kiyinza okuvvuunulwa, “abantu tebasobola.”
^ Oba, “abo abeenyigira mu buweereza obutukuvu.”
^ Obut., “mu muzingo gw’ekitabo.”
^ Laba Ebyong. A5.
^ Obut., “lye yatongoza ku lwaffe.”
^ Oba, “afeeyo; asseeyo omwoyo.”
^ Laba Ebyong. A5.
^ Oba, “mwayimiriranga.”
^ Obut., “kwogera na buvumu.”
