SAJI NI OBLAHII KƐ OBLAYEI BIƆ
Mɛni Mafee Kɛ́ Minaanyo Ko Fee Mi Dɔlɛ Nii?
Nɔ ni esa akɛ ole
Naanyobɔɔ ko kwraa bɛ shikpɔŋ lɛ nɔ ni naagba bɛ mli. Akɛni wɔyeee emuu hewɔ lɛ, onaanyo ni osumɔɔ esane fe fɛɛ lɛ po baanyɛ afee nɔ ko, loo ewie nɔ ko ni baagba onaa waa. Anɔkwa, bo hu oyeee emuu. Yɛ anɔkwale mli lɛ, ani okaiii akɛ ofee nɔ ko loo owie nɔ ko ni egba mɔ ko naa pɛŋ?—Yakobo 3:2.
Intanɛt lɛ baanyɛ ahã omli afu yɛ gbɛ ni waaa nɔ. Oblanyo ko ni atsɛɔ lɛ David lɛ kɛɛ akɛ: “Kɛ́ otee intanɛt lɛ nɔ ni ona mfonirii komɛi ni tsɔɔ akɛ onanemɛi lɛ fee paati ko lɛ, ekolɛ obaabi ohe akɛ ‘mɛni hewɔ amɛtsɛɛɛ mi?’ Kɛkɛ lɛ, obaanu he akɛ amɛsumɔɔɔ osane, ni ebaadɔ bo waa.”
Obaanyɛ okase bɔ ni obaafee otsu naagba lɛ he nii.
Nɔ ni obaanyɛ ofee
Pɛimɔ omli. Biblia lɛ kɛɔ akɛ: “Kaahã omli fu oya, ejaakɛ mlifu lɛ, no akɛyoɔ buulu.”—Jajelɔ 7:9, shishigbɛ niŋmaa.
“Bei komɛi lɛ, sɛɛ mli lɛ oyɔseɔ akɛ kulɛ nɔ ni ba lɛ jeee nɔ ko ni esa akɛ omli afu kwraa.”—Alyssa.
Kɛhã he susumɔ: Ani ohãa sane dɔɔ bo fe nine? Ani obaanyɛ okase bɔ ni obaafee okɛ mɛi atɔmɔi ake amɛ yɛ emuu ni amɛyeee lɛ hewɔ?—Jajelɔ 7:21, 22.
Kɛ́ okɛ tɔmɔi ke lɛ obaaná he sɛɛ waa. Biblia lɛ kɛɔ akɛ: “Ehiɛ ni ekuɔ efɔ̃ɔ tɔmɔ nɔ lɛ, ehiɛnyam ni.”—Abɛi 19:11.
“Kɛ́ oyɛ nɔ ko ni obaanyɛ odamɔ nɔ omli afu po lɛ, ehi akɛ obaajɛ otsui mli okɛke kwraa, ni no tsɔɔ akɛ owieŋ he dɔŋŋ, ni no hã be fɛɛ be lɛ enu he akɛ esa akɛ ekpa bo fai. Kɛ́ okɛke lɛ, kaawo nɔ dɔŋŋ.”—Mallory.
Kɛhã he susumɔ: Ani ehe miihia kwraa ni mimli afu? Ani obaanyɛ oŋmɛɛ he koni toiŋjɔlɛ ahi nyɛteŋ?—Kolosebii 3:13.
Naanyo ni hiɛɔ sane fɛɛ sane mli be fɛɛ be lɛ, etamɔ mɔ ko ni gbeleɔ tsũ ni mli efee kulɔkulɔ shinaa yɛ fɛ̃i be mli koni fɛ̃i aye mɔ ni yɔɔ tsũ lɛ mli lɛ
Susumɔ mɔ lɛ he. Biblia lɛ kɛɔ akɛ: “Nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ.”—Filipibii 2:4.
“Kɛ́ suɔmɔ kɛ bulɛ yɛ nyɛnaanyobɔɔ lɛ mli lɛ, no lɛ ewaŋ akɛ nyɛkɛ tɔmɔ baake nyɛhe kɛ́ nyɛteŋ mɔ ko tɔ̃, ejaakɛ nyɛbɔ naanyo etsɛ. Nyɛbɔ mɔdɛŋ nyɛbaa nyɛnaanyobɔɔ lɛ yi, ni osumɔŋ ni nɔ ko afite lɛ.”—Nicole.
Kɛhã he susumɔ: Kɛ́ okwɛ lɛ, ani nɔ ko kpakpa ko kwraa bɛ nɔ ni onaanyo lɛ wie lɛ mli?—Filipibii 2:3.
Sane lɛ nɔŋŋ ji akɛ: Kɛ́ okase bɔ ni obaafee onii ohã kɛ́ mɔ ko tɔ̃ onɔ lɛ, ebaaye ebua bo waa kɛ́ oda. Mɛni hewɔ okaseee bianɛ?
Ekolɛ Obaasumɔ Enɛ Hu
SAJI NI OBLAHII KƐ OBLAYEI BIƆ
Ani Esa Akɛ Mikɛ Mɛi Krokomɛi Hu Abɔ Naanyo?
Kɛ́ oyɛ mɛi pɔtɛɛ komɛi ni okɛbɔɔ naanyo lɛ obaaná miishɛɛ, shi jeee be fɛɛ be obaaná he sɛɛ. Mɛni hewɔ?
SAJI NI OBLAHII KƐ OBLAYEI BIƆ
Mɛni Hewɔ Esa Akɛ Makpa Fai?
Kanemɔ koni ona yiŋtoi etɛ ahewɔ ni esa akɛ okpa fai, kɛ́ onu he akɛ otɔ̃ko po.
NITƐŊMƆI NI TSƆƆ MƆ NII
Namɔ Ji Naanyo Kpakpa?
Ewaaa kwraa akɛ obaaná nanemɛi gbohii, shi te obaafee tɛŋŋ oná naanyo kpakpa?
SANEBIMƆI NI BIBLIA LƐ EHÃ HETOO
Mɛni Ji Eshaifaa?
Biblia lɛ tsɔɔ wɔ gbɛ́i enumɔ ni wɔbaanyɛ wɔtsɔ nɔ wɔkɛ mɔ ko tɔmɔ ake lɛ.
