Wolo Ni Akɛmaje Kolosebii Lɛ 3:1-25
3 Shi kɛ́ atee nyɛ kɛ Kristo lɛ fɛɛ shi lɛ,+ nyɛyaa nɔ nyɛtaoa nibii ni yɔɔ ŋwɛi, he ni Kristo lɛ ta Nyɔŋmɔ ninejurɔ nɔ yɛ lɛ.+
2 Nyɛyaa nɔ nyɛhãa nyɛjwɛŋmɔ ahia nibii ni yɔɔ ŋwɛi lɛ anɔ,+ jeee nibii ni yɔɔ shikpɔŋ lɛ nɔ lɛ anɔ.+
3 Ejaakɛ nyɛgboi, ni aŋɔ nyɛwala atee kɛfata Kristo lɛ he yɛ Nyɔŋmɔ suɔmɔ naa.
4 Kɛ́ ajie Kristo lɛ, ni ji wɔwala+ lɛ kpo lɛ, abaajie nyɛ hu kpo afata ehe yɛ anunyam mli.+
5 No hewɔ lɛ, nyɛgbea nyɛgbɔmɔtso lɛ henii+ ni yɔɔ shikpɔŋ lɛ nɔ lɛ, ni ji ajwamaŋbɔɔ,* muji nii, bɔlɛnamɔ he akɔnɔ ni anyɛɛɛ nɔ aye,+ nɔ fɔŋ ni ashweɔ, kɛ amimyeli, ni ji amagajamɔ lɛ.
6 Nibii nɛɛ ahewɔ ni Nyɔŋmɔ mlifu lɛ miiba lɛ.
7 Nakai ji bɔ ni nyɛ hu kulɛ nyɛbaa nyɛjeŋ* yɛ nyɛtsutsu shihilɛ lɛ mli.*+
8 Shi amrɔ nɛɛ, esa akɛ nyɛjie nibii nɛɛ fɛɛ yɛ nyɛhe nyɛshwie: mlifu, mlila, efɔŋfeemɔ,+ wiemɔ fɔŋ,+ ni nyɛjie yakayaka wiemɔ+ kɛje nyɛdaaŋ.
9 Nyɛkamalemalea nyɛhe.+ Nyɛjiea subaŋ* momo+ lɛ kɛ enifeemɔi lɛ yɛ nyɛhe,
10 ni nyɛwo subaŋ* hee+ lɛ ni atsɔɔ nilee krɔŋŋ nɔ ahãa efeɔ ehee daa yɛ mɔ ni bɔ lɛ lɛ subaŋ lɛ naa lɛ,+
11 he ni Greeknyo loo Yudanyo bɛ dɔŋŋ, ketiafoo loo ketia ni afoko bɛ dɔŋŋ, loo maŋsɛɛnyo, loo Skitenyo,* loo nyɔŋ, loo mɔ ni jeee nyɔŋ ko hu bɛ dɔŋŋ lɛ; shi Kristo ji nibii fɛɛ ni eyɛ fɛɛ mli.+
12 No hewɔ lɛ, akɛ mɛi ni Nyɔŋmɔ ehala amɛ,+ ni yɔɔ krɔŋkrɔŋ, ni asumɔɔ nyɛ lɛ, nyɛwoa musuŋtsɔlɛ kpele+ kɛ mlihilɛ kɛ heshibaa*+ kɛ mlijɔlɛ+ kɛ tsuishitoo.+
13 Kɛ́ mɔ ko yɛ sane yɛ mɔ ko he po lɛ,+ nyɛyaa nɔ nyɛnáa tsui nyɛhãa nyɛhe ni nyɛkɛkea nyɛhe tswaa.+ Bɔ ni Yehowa* kɛke nyɛ tswaa lɛ, nyɛ hu nyɛfea nakai nɔŋŋ.+
14 Shi enɛɛmɛi fɛɛ sɛɛ lɛ, nyɛwoa suɔmɔ tamɔ atade,+ ejaakɛ eji kpãa ni feɔ mɛi ekome yɛ gbɛ ni eye emuu nɔ.+
15 Agbɛnɛ hu, nyɛhãa Kristo lɛ toiŋjɔlɛ lɛ ayea nɔ yɛ nyɛtsuii amli,*+ ejaakɛ atsɛ nyɛ yɛ gbɔmɔtso kome mli kɛba nakai toiŋjɔlɛ lɛ he. Ni nyɛfea nyɛhe mɛi ni le shidaa.
16 Nyɛhãa Kristo lɛ wiemɔ lɛ ahia nyɛmli babaoo yɛ hiɛshikamɔ fɛɛ mli. Nyɛkɛ lalai,+ kɛ Nyɔŋmɔ yijiemɔ lalai, kɛ Nyɔŋmɔjamɔ lalai ni akɛ hiɛsɔɔ láa,* ayaa nɔ atsɔa nii ni nyɛkɛwowoo nyɛhe hewalɛ,* ni nyɛláa nyɛhãa Yehowa* yɛ nyɛtsuii amli.+
17 Nɔ fɛɛ nɔ ni nyɛfeɔ yɛ wiemɔ loo nifeemɔ mli lɛ, nyɛfea fɛɛ yɛ Nuŋtsɔ Yesu gbɛ́i mli, ni nyɛtsɔa enɔ nyɛdaa Nyɔŋmɔ, ni ji Tsɛ lɛ shi.+
18 Nyɛ ŋamɛi lɛ, nyɛbaa nyɛhe shi nyɛwoa nyɛwumɛi ashishi,+ ejaakɛ no sa yɛ Nuŋtsɔ lɛ mli.
19 Nyɛ wumɛi lɛ, nyɛyaa nɔ nyɛsumɔa nyɛŋamɛi,+ ni nyɛmli akawoa la nyɛwoa amɛ.*+
20 Nyɛ bii lɛ, nyɛboa nyɛfɔlɔi atoi yɛ nɔ fɛɛ nɔ mli,+ ejaakɛ enɛ sa Nuŋtsɔ lɛ hiɛ jogbaŋŋ.
21 Nyɛ tsɛmɛi lɛ, nyɛkawoa nyɛbii amli la,*+ koni amɛtsui akakumɔ.*
22 Nyɛ nyɔji lɛ, nyɛboa nyɛnuŋtsɔmɛi ni ji gbɔmɛi* lɛ atoi yɛ nɔ fɛɛ nɔ mli,+ jeee be ni amɛmiina nyɛ pɛ koni nyɛkɛsa gbɔmɛi ahiɛ kɛkɛ,* shi moŋ kɛ tsui krɔŋŋ, kɛ Yehowa* gbeyeishemɔ.
23 Nɔ fɛɛ nɔ ni nyɛfeɔ lɛ, nyɛkɛ nyɛsusuma muu fɛɛ* atsua tamɔ Yehowa* nyɛtsuɔ nyɛhãa,+ shi jeee gbɔmɛi,
24 ejaakɛ nyɛle akɛ Yehowa* dɛŋ nyɛbaaná gboshinii lɛ yɛ akɛ jweremɔnɔ.+ Nyɛsɔmɔa Nuŋtsɔ lɛ, ni ji Kristo lɛ akɛ nyɔji.
25 Ekã shi faŋŋ akɛ mɔ ni feɔ efɔŋ lɛ, abaato lɛ najiaŋ yɛ efɔŋ ni efee lɛ he,+ ni hiɛiaŋkwɛmɔ ko bɛ mli.+
Shishigbɛ Niŋmaa
^ Greek mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Loo “kulɛ nyɛnyiɛɔ.”
^ Loo “be ni nyɛhiɔ shi yɛ nakai gbɛ nɔ lɛ.”
^ Greek sht. ŋm., “gbɔmɔ.”
^ Greek sht. ŋm., “gbɔmɔ.”
^ “Skitenyo” tsɔɔ mɔ ko ni hiŋmɛi gbeleko.
^ Loo “heshibaa jwɛŋmɔ.”
^ Kwɛmɔ Saji Krokomɛi A5 lɛ.
^ Loo “akudɔa nyɛtsuii.”
^ Loo “aláa yɛ gbɛ ni yɔɔ nyam nɔ.”
^ Loo “nyɛkɛwiea nyɛtsɔa nyɛhe.”
^ Kwɛmɔ Saji Krokomɛi A5 lɛ.
^ Loo “nyɛyi akawaa yɛ amɛnɔ.”
^ Loo “nyɛkawoa nyɛbii amlifu; nyɛkawoa nyɛbii atsui la.”
^ Loo “amɛnijiaŋ akaje wui.”
^ Greek sht. ŋm., “jeee kɛ hiɛiaŋhiɛiaŋ sɔɔmɔ akɛ gbɔmɛi ahiɛsalɔi.”
^ Kwɛmɔ Saji Krokomɛi A5 lɛ.
^ Greek sht. ŋm., “nyɛheloo gbɛfaŋ nuŋtsɔmɛi.”
^ Kwɛmɔ Wiemɔi Titrii Amligbalamɔ lɛ, “Susuma.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
