Kɛ́ okɛ Biblia mli gbɛtsɔɔmɔi miitsu nii, ni okɛ Nyɔŋmɔ miibɔ naanyo lɛ, belɛ oosusu baptisimɔ he ji no. Te obaafee tɛŋŋ ole akɛ oshɛ kɛhã baptisimɔ lɛ? a

Nɔ ni wɔbaasusu he yɛ sane nɛɛ mli

•  Mɛni kɛ mɛni esa akɛ male?

•  Mɛni esa akɛ mafee?

•  Nɔ ni otipɛŋfoi kɛɔ

 Hesaamɔ kɛhã baptisimɔ etsɔɔɔ akɛ obaakpe anɔkwalei komɛi owo oyitsoŋ tamɔ bɔ ni mɛi komɛi feɔ koni amɛbɔ mɔdɛŋ yɛ skul kaa mli lɛ. Kɛ̃lɛ, ehe baahia ni okɛ ojwɛŋmɔ atsu nii kɛwaje hekɛnɔfɔɔ ni oyɔɔ akɛ nɔ ni Biblia lɛ tsɔɔ lɛ ji anɔkwale lɛ. (Romabii 12:1) Akɛ nɔkwɛmɔnɔ lɛ:

•   Ani oheɔ oyeɔ waa akɛ Nyɔŋmɔ yɛ, ni lɛ ji mɔ ni esa akɛ ojá lɛ?

   Biblia lɛ kɛɔ akɛ: “Mɔ fɛɛ mɔ ni bɛŋkɛɔ Nyɔŋmɔ lɛ, esa akɛ ehe eye akɛ eyɛ, ni eji mɛi ni kɛ hiɛdɔɔ taoɔ esɛɛ gbɛ lɛ ajwerelɔ.”​—Hebribii 11:6.

   Bi ohe akɛ: ‘Mɛni hewɔ miheɔ Nyɔŋmɔ nɔ miyeɔ?’ (Hebribii 3:4) ‘Mɛni hewɔ lɛ ji mɔ ni sa akɛ majá lɛ?’​—Kpojiemɔ 4:11.

   Ani ootao yelikɛbuamɔ yɛ enɛ gbɛfaŋ? Kwɛmɔ sane ni ji “Adebɔɔ Aloo Sutsakemɔ?​—Fã 1: Mɛni Hewɔ Esa Akɛ Ohe Nyɔŋmɔ Nɔ Oye?” lɛ.

•   Ani oheɔ oyeɔ waa akɛ sane ni yɔɔ Biblia lɛ mli lɛ jɛ Nyɔŋmɔ ŋɔɔ?

   Biblia lɛ kɛɔ akɛ: “Ŋmalɛ muu lɛ fɛɛ jɛ Nyɔŋmɔ mumɔ lɛŋ, ni ehe yɛ sɛɛnamɔ kɛhã nitsɔɔmɔ, kɛhã mɔjajemɔ, kɛhã nibii ajajemɔ, kɛhã tsɔsemɔ yɛ jalɛ mli.”​—2 Timoteo 3:16.

   Bi ohe akɛ: ‘Mɛni hewɔ miheɔ miyeɔ akɛ Biblia lɛ jeee wolo ko ni gbɔmɛi asusumɔ yɔɔ mli lɛ?’​—Yesaia 46:10; 1 Tesalonikabii 2:13.

   Ani ootao yelikɛbuamɔ yɛ enɛ gbɛfaŋ? Kwɛmɔ sane ni ji “Mɛɛ Gbɛ Nɔ Biblia Lɛ Baanyɛ Aye Abua Mi?​​—Fã 1:​​—Kanemɔ O-Biblia Lɛ.”

•   Ani oheɔ oyeɔ waa akɛ Yehowa kɛ Kristofoi asafo lɛ miitsu nii kɛmiitsu eyiŋtoi ahe nii?

   Biblia lɛ kɛɔ akɛ: “[Nyɔŋmɔ] atsɔ asafo lɛ kɛ agbɛnɛ hu Kristo Yesu nɔ akɛ anunyam lɛ ahã yɛ yinɔi fɛɛ amli kɛya naanɔi anaanɔ.”​—Efesobii 3:21.

   Bi ohe akɛ: ‘Ani minaa nibii ni mikaseɔ yɛ Biblia lɛ mli yɛ asafoŋ kpeei ashishi lɛ akɛ ejɛ adesai aŋɔɔ aloo ejɛ Yehowa ŋɔɔ?’ (Mateo 24:45) ‘Kɛ́ mifɔlɔi eyaaa asafoŋ kpee po lɛ, ani miyaa (kɛ́ amɛŋmɛɔ mi gbɛ ni mafee nakai)?’​—Hebribii 10:24, 25.

   Ani ootao yelikɛbuamɔ yɛ enɛ gbɛfaŋ? Kwɛmɔ sane ni ji “Mɛni Hewɔ Esa Akɛ Oya Kpeei Ni Afeɔ Yɛ Maŋtsɛyeli Asa Lɛ Nɔ Lɛ?”

 Jeee ja oye emuu dani obaanyɛ ohã abaptisi bo. Shi, esa akɛ okɛ onifeemɔ atsɔɔ akɛ oobɔ mɔdɛŋ ni ‘otsi ohe kɛje efɔŋ he, ni ofee ekpakpa.’ (Lala 34:14) Akɛ nɔkwɛmɔnɔ lɛ:

•   Ani oohi shi yɛ Yehowa gbɛtsɔɔmɔi anaa?

   Biblia lɛ kɛɔ akɛ: “Nyɛyaa nɔ nyɛhiɛa henilee kpakpa mli.”​—1 Petro 3:16.

   Bi ohe akɛ: ‘Mɛni mifeɔ kɛtsɔɔ akɛ “mitsɔse mijwɛŋmɔ lɛ koni ele ekpakpa kɛ efɔŋ mlikpamɔ”?’ (Hebribii 5:14) ‘Ani manyɛ makai shihilɛi pɔtɛɛ komɛi amli ni mikpoo akɛ mafee efɔŋ ko ni minanemɛi nyɛɔ minɔ akɛ mifee lɛ? Ani nanemɛi ni mikɛbɔɔ lɛ woɔ mi hewalɛ ni mafee nɔ ni ja be fɛɛ be?’​—Abɛi 13:20.

   Ani ootao yelikɛbuamɔ yɛ enɛ gbɛfaŋ? Kwɛmɔ sane ni ji “Mɛni Esa Akɛ Mafee Kɛtsɔse Mihenilee?”

•   Ani ole akɛ obaabu bɔ ni ohiɔ shi ohãa lɛ he akɔntaa ohã Yehowa?

   Biblia lɛ kɛɔ akɛ: “Wɔteŋ mɔ fɛɛ mɔ baabu lɛ diɛŋtsɛ ehe akɔntaa ehã Nyɔŋmɔ.”​—Romabii 14:12.

   Bi ohe akɛ: ‘Ani miyeɔ mi diɛŋtsɛ mihe, kɛ mɛi krokomɛi anɔkwa?’ (Hebribii 13:18) ‘Ani mikpɛlɛɔ mitɔ̃mɔi anɔ, aloo mitsĩmɔɔ nɔ, ni kɛ́ mitɔ̃ lɛ, ani mishwãa mɛi krokomɛi moŋ yɛ he?’​—Abɛi 28:13.

   Ani ootao yelikɛbuamɔ yɛ enɛ gbɛfaŋ? Kwɛmɔ sane ni ji “Te Mafee Tɛŋŋ Matsu Mitɔmɔi Ahe Nii?” lɛ.

•   Ani oowaje okɛ Yehowa teŋ naanyobɔɔ lɛ?

   Biblia lɛ kɛɔ akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.”​—Yakobo 4:8.

   Bi ohe akɛ: ‘Mɛni mifeɔ bɔ ni afee ni manyɛ matsi mabɛŋkɛ Yehowa kpaakpa.’ Akɛ nɔkwɛmɔnɔ lɛ, ‘Ani mifɔɔ Biblia lɛ kanemɔ?’ (Lala 1:1, 2) ‘Ani misɔleɔ daa?’ (1 Tesalonikabii 5:17) ‘Ani minyɛɔ mijɛɔ mitsuiŋ misɔleɔ? Ani mɛi ni mikɛbɔɔ lɛ, Yehowa nanemɛi ni?’​—Lala 15:1, 4.

   Ani ootao yelikɛbuamɔ yɛ enɛ gbɛfaŋ? Kwɛmɔ sane ni ji “Mɛɛ Gbɛ Nɔ Biblia Lɛ Baanyɛ Aye Abua Mi?​​—Fã 2: Okɛ Miishɛɛ Akane Biblia Lɛ?”

 ŊAAWOO: Kanemɔ wolo ni ji Questions Young People Ask​—Answers That Work, Volume 2 lɛ, Yitso 37 lɛ, koni eye ebua bo kɛsaa ohe kɛhã baptisimɔ. Titri lɛ, kadimɔ nifeemɔ wolo ni yɔɔ baafa 308 kɛ 309 lɛ.