Oblanyo ko ni atsɛɔ lɛ Will lɛ wie akɛ: “Kɛ́ oleee gbɛ ni esa akɛ otsɔ nɔ okane Biblia lɛ, obaanu he akɛ ekanemɔ bɛ miishɛɛ.”

Ani obaasumɔ ni ole nibii ni kɛ́ ofee lɛ obaanya Biblia lɛ kanemɔ he? Sane nɛɛ baawa bo.

•  Feemɔ sane ni okaneɔ lɛ he mfoniri

•  Taomɔ nii amli jogbaŋŋ!

•  Nɔ ni otipɛŋfoi kɛɔ

Feemɔ ohe mfoniri ni ofata mɛi ni yɔɔ sane ni okaneɔ lɛ mli lɛ ahe. Obaanyɛ ofee lɛ yɛ nɛkɛ gbɛ nɔ:

1. Halamɔ Biblia mli sane ko ni obaasumɔ ni okase. Obaanyɛ ohala shihilɛ ko ni tee nɔ ni abɔ he amaniɛ yɛ Biblia lɛ mli, loo sane ko kɛjɛ Sanekpakpai lɛ amli, loo obaanyɛ ohala saji ni yɔɔ Biblia kanemɔ ni afee lɛ drama ni yɔɔ jw.org lɛ nɔ lɛ eko.

2. Kanemɔ sane lɛ. Obaanyɛ okane ohã bo pɛ ohe, loo okane lɛ waa ni onanemɛi loo owekumɛi abo toi. Mɔ kome baanyɛ afee sanejajelɔ, ni mɛi krokomɛi lɛ baafee mɛi ni yɔɔ sane lɛ mli lɛ.

3. Kaa ŋaawoi ni nyiɛ sɛɛ nɛɛ ateŋ ekome loo nɔ ni fe nakai okwɛ:

   • Tɛŋmɔ sane lɛ he mfoniri. Loo tɛŋmɔ mfoniri kɛtsɔɔ bɔ ni sane lɛ fã fɛɛ fã tee nɔ ehã lɛ mli. Okɛ mfonirii atsɔɔ nɔ ni yaa nɔ lɛ mli yɛ fã fɛɛ fã mli.

   • Kɛ́ okane mɔ ko ni ye anɔkwa lɛ he sane lɛ, ŋmalamɔ sui ni ejie amɛ kpo kɛ nibii ni efee kɛ jɔɔmɔi ni ená lɛ ofɔ̃ shi.

   • Feemɔ sane ni okane lɛ tamɔ sane ko ni eba ni aabɔ he amaniɛ aatsɔɔ mɛi. Bɔɔ he amaniɛ yɛ gbɛi srɔtoi anɔ, ni ofee lɛ tamɔ oobibii mɛi titrii ni yɔɔ sane ni okane lɛ mli lɛ kɛ mɛi ni na nibii ni tee nɔ yɛ mli lɛ saji.

   • Kɛ́ mɛi ni yɔɔ sane lɛ mli lɛ ateŋ mɔ ko kpɛ yiŋ ni nilee bɛ mli lɛ, feemɔ nɔ ni kulɛ esa akɛ efee lɛ he mfoniri. Akɛ nɔkwɛmɔnɔ lɛ, kanemɔ be ni Petro kwa Yesu lɛ he sane. (Marko 14:66-​72) Kulɛ, te esa akɛ Petro ajie saji lɛ anaa ehã tɛŋŋ?

   • Kɛ́ ootao ni bo diɛŋtsɛ ofee nɔ ko ní onya he waa lɛ, daamɔ saji ni abɔ he amaniɛ yɛ Biblia lɛ mli lɛ eko nɔ oŋma drama. Tsɔɔmɔ nibii ni abaanyɛ akase yɛ drama lɛ mli.​—Romabii 15:4.

Kɛ́ okane amaniɛbɔɔ ko ni opɛi mli jogbaŋŋ lɛ, obaana saji otii komɛi ni tamɔ jwetri yɛ mli. Anɔkwa, bei komɛi lɛ, wiemɔ kome loo enyɔ ko baafee nɔ ko ni sa kadimɔ waa yɛ amaniɛbɔɔ ni okane lɛ mli.

Akɛ nɔkwɛmɔnɔ lɛ, kanemɔ Mateo 28:7 lɛ ni okɛto Marko 16:7 lɛ he.

•   Mɛni hewɔ be ni Marko kɛɛ akɛ etsɛŋ Yesu baajie ehe kpo etsɔɔ ekaselɔi lɛ, etsĩ Petro hu tã ekɛɛ, “kɛ Petro” lɛ?

• Nɔ ni baawa bo: Marko bɛ jɛmɛ be ni sane nɛɛ tee nɔ lɛ, eeenyɛ efee akɛ Petro ji mɔ ni bɔ lɛ amaniɛ lɛ.

• Sane oti ni ji jwetri ni yɔɔ mli: Mɛni hewɔ ekolɛ, Petro ná nɔmimaa akɛ Yesu baasumɔ ni ena lɛ ekoŋŋ lɛ? (Marko 14:66-​72) Mɛni Yesu fee kɛtsɔɔ akɛ eji naanyo kpakpa kɛhã Petro? Mɛni obaanyɛ ofee kɛkase Yesu koni otsɔ naanyo kpakpa ohã mɛi krokomɛi?

Kɛ́ ookane Ŋmalɛ lɛ ni ofee he mfoniri tamɔ eji nɔ ko ni miiya nɔ diɛŋtsɛ, ni otao nii amli jogbaŋŋ lɛ, Biblia lɛ kanemɔ baafee nɔ ko ni yɔɔ miishɛɛ waa diɛŋtsɛ!