E sega ni vakatabuya na iVolatabu me gunuvi vakalailai na alakaolo ke vakatarai vakalawa mo gunu. E vakatabuya ga na mateni.​—Same 104:15; 1 Korinica 6:​10.

Ia vakacava ke o vakasaurarataki mo gunu ni se sega ni vakatarai vakalawa se ni rau sega ni vakadonuya nomu itubutubu?

•  Kua ni lekaleka nomu rai

•  Vakatulewa rawa

•  Ka era kaya nomu icaba

Era na rairai nanuma eso nomu icaba ni dodonu mo gunu mo marau kina. Ia na cava e rawa ni yaco ni sa oti na gunu?

• Totogi. Ke o gunu ni se sega ni vakatarai vakalawa, o rawa ni totogitaki, beitaki ena basulawa, kau laivi nomu laiseni ni draiva, tukuni mo cakava eso na cakacaka ena itikotiko, se bala sara e valeniveivesu.​—Roma 13:3.

• Ca kemu irogorogo. Na alakaolo e dau vakawaicalataka na vakasama. E rawa ni vakavuna mo kaya se cakava eso na ka o na veivutunitaka e muri. (Vosa Vakaibalebale 23:31-33) Na levu ni sala ni veitaratara ena internet sa tu nikua, ena totolo wale ga na tete ni itukutuku ena vakacacana na kemu irogorogo.

• Malumu na tataqomaki. Ni sa vodo toka o alakaolo, ena rawarawa sara me vakayacori vei iko na ivalavala kaukaua se veivakasagai tawakilikili. Ena rawarawa tale ga mera lewa eso tale na ka o cakava, rawa sara ga ni o cakava eso na ka e rivarivabitaki kina na bula se tabu vakalawa.

• Bobula ina gunu. E laurai ena so na vakadidike ni rawarawa sara mo bobula ina alakaolo ke o sa tekivu gunu ni o se gone. Ke o dau gunu me seavu kina nomu lomaocaoca, galili se vucesa, sa na matau sara toka ga vei iko na ivakarau qori qai dredre mo biuta.

• Mate. Dua na gauna lekaleka sa oti, e mate e dua ena veiya 52 na miniti e Merika nira gunu alakaolo eso ra qai draiva. Ena loma ni lima na yabaki, na alakaolo e vakavuna nodra mate ena vakacalaka e sivia na le 1,500 era se bera ni yabaki 21. Ke o se sega mada ga ni bau gunu alakaolo, o se rawa ga ni sotava na leqa ke o vodo kei na dua e gunu qai draiva.

E rerevaki qai vakavu leqa ke o gunu alakaolo ni sega ni vakatarai vakalawa. E vinaka gona mo sa vakatulewataka rawa tu na ka mo cakava.

iVakavuvuli Vakaivolatabu: “O koya e yalomatua e raica na ca qai vunitaki koya.” (Vosa Vakaibalebale 22:3) E ka vakalialia mo gunu o qai draiva se ni o vakarau cakava e dua na ka ena vinakati me tu vinaka kina nomu vakasama.

Vakatulewa: ‘Au na qai gunu alakaolo ga ke sa vakatarai vakalawa, au na vakalewa vinaka tale ga na ituvaki.’

iVakavuvuli Vakaivolatabu: “Oni sa nona bobula ni oni talairawarawa vua.” (Roma 6:16) Ke o gunu baleta wale ga nira gunu nomu icaba, o sa solia tiko vei ira na galala mera lewai iko. Nomu gunu mo kua kina ni vucesa se me seavu kina nomu lomaocaoca, ena sega ni vukei iko mo walia na nomu leqa.

Vakatulewa: ‘Au na sega ni vakamalumalumu vei ira noqu icaba ke ra vakasaurarataki au meu gunu.’

iVakavuvuli Vakaivolatabu: ‘Kua ni maliwai ira na gunu vakasivia.’ (Vosa Vakaibalebale 23:20) Na vakailala cala ena vakadredretaka mo dei ena nomu vakatulewa. E rawarawa sara nomu sotava na leqa ke o vakailala kei ira era dau gunu sivia.

Vakatulewa: ‘Au na sega ni veitokani voleka kei ira era dau gunu sivia.’