RA TAROGA NA ITABAGONE

Na Cava Mo Gole Kina ina Vale ni Soqoni?

SARAVA/ROGOCA

Era soqoni vakarua ena dua na macawa na iVakadinadina i Jiova ena nodra vanua ni sokalou, e vakatokai na Vale ni Soqoni. Na cava e caka e kea? Ena yaga vakacava nomu gole kina?

Na cava e caka ena Vale ni Soqoni?

Na Vale ni Soqoni e vakabibitaki kina na vulici ni iVolatabu. Na veika e vakayacori kina ena vukei iko:

mo vulica na ka dina me baleta na Kalou.
mo kila na ibalebale ni veika e yaco tiko ena gauna qo.
me vinaka na nomu itovo.
mo kunea na itokani vinaka.

Na cava mo gole kina?

Ena yaga vei iko na ka e veivosakitaki. Na ivakavuvuli vakaivolatabu e veivosakitaki ena soqoni ni iVakadinadina i Jiova ena vukei iko “mo rawata na vuku.” (Vosa Vakaibalebale 4:5) Kena ibalebale qo ni na vukei iko sara ga na iVolatabu mo dau vakatulewa vinaka. E sauma tale ga na taro bibi, me vaka:

Qo eso na ulutaga ni vunau e dau vakarautaki ena soqoni ena muanimacawa:

Cava me Dusimaki Iko Kina na iVolatabu?
Mo Qara Veivuke Vei Cei ena Gauna ni Rarawa?
Cava sa Cakava Tiko na Matanitu ni Kalou Vei Keda Nikua.

“E dua noqu lewe ni kalasi e gole mai na soqoni. E dabe kei na noqu vuvale, keitou raica vata na ivola. Ni oti e tukuna vei au ni taleitaka sara ga nodra ivakamacala na lewe ni ivavakoso. E kaya tale ga ni sega ena nona valenilotu na ivola ni vuli, me vakataki keda.”—Brenda.

O bau kila? E sega ni saumi na idabedabe ena Vale ni Soqoni, e sega tale ga na soli.

Ena uqeti iko na veimaliwai. E kaya na iVolatabu ni dua na vuna mera soqoni vata kina na lotu vaKarisito oya mera “veivakayaloqaqataki.” (Iperiu 10:24, 25) E veivakacegui nida veimaliwai kei ira na vakaliuca na Kalou, era qai kauaitaki ira tale eso nida bula tu ena vuravura tawaveinanumi qo.

“Ni oti e dua na siga, au na rarawa qai oca tu, ia era dau vakacegui au o ira na tiko ena Vale ni Soqoni. Ni oti na soqoni, au vakila na marau qai rai vakanamata ena dua tale na siga.”—Elisa.

O bau kila? E tiko e sivia ni 120,000 na ivavakoso ni iVakadinadina i Jiova e veiyasa i vuravura, era soqoni tiko ena sivia na 60,000 na vanua. E veiyabaki e tara e rauta ni 1,500 na Vale ni Soqoni ni tubu tiko na kedra iwiliwili na gole yani. a

Ka era kaya nomu icaba

“Niu se vuli ena sekeneri, e tomani au e dua noqu lewe ni kalasi ina vica na soqoni. Dua na ka nona qoroi ira na vulica vata tiko na iVolatabu, ni duidui na nodra yabaki. Dua na gauna sa oti e gole mai noqu boso ina soqoni. E qoroya tale ga noda vakayagataka wasoma na iVolatabu. Niu raica nona taleitaka na soqoni, e vakavuna meu marautaka vakalevu na soqoni!”—Jessica.

“Au raica ni vukei au na soqoni meu kua ni leqataka vakalevu na bula ni veisiga kei na nuiqawaqawa. Eda vulica na sala me vakainaki kina noda bula, me vinaka noda itovo, kei na levu tale. Au dau vakila na vakacegu kei na marau niu biubiu mai ena Vale ni Soqoni.”—Timothy.

“E dua na turaga au sureta ina soqoni e kaya: ‘Au gole ga meu vakacala nomuni vakabauta. Ia na kena dina ni cala ga na ka au vakabauta!’ E qoroya tale ga nodra veikauaitaki na iVakadinadina i Jiova. E kaya: ‘Au sa qai sotavi kemuni ga, ia oni kauaitaki au me vaka ga eda sa veikilai tu mai vakadede!’”—Jacob.

“Eso na gauna au dau vakasamataka, ‘Au na biubiu ga ni oti na soqoni.’ Ia e dau seavu yani na rai qori ena gauna ni soqoni. Ni oti na soqoni, au dau veitalanoa kei ira tale eso, au sa guilecava na vuna e va kina ya noqu rai. Ke sega na soqoni keu sega ni kunea na itokani vinaka ena gauna qo.”—Madison.