Ke o sa muria tiko na ivakatagedegede vakaivolatabu qai saga mo veitokani kei na Kalou, de dua o sa vakasamataka tiko mo papitaiso. Ia o na kila vakacava ni o sa rawa ni papitaiso? a

Ena ulutaga qo

•  Me vacava na levu ni ka au kila?

•  Cava e dodonu meu cakava?

•  Ka era kaya nomu icaba

 Nomu vakavakarau ena papitaiso, e sega vinakati mo katona na ka o vulica me vaka nomu vuli lesoni me rawa ni o pasi ena veitarogi. Ia ena vinakati ga mo vakayagataka nomu “vakasama kei na yalomatua.” Mo vakadeitaka kina ni dina ka e vakavuvulitaka na iVolatabu. (Roma 12:1) Kena ivakaraitaki:

•   O vakadeitaka ni bula tiko na Kalou e dodonu tale ga mo sokaloutaki koya?

   Ka e kaya na iVolatabu: “O koya e torova na Kalou e dodonu me vakabauta ni bula dina tiko o koya, ni na vakaicovitaki ira tale ga era vakasaqarai koya ena yalogu.”—Iperiu 11:6.

   Mo taroga: ‘Cava meu vakabauta kina na Kalou?’ (Iperiu 3:4) ‘Cava na vuna meu sokaloutaki koya kina?’—Vakatakila 4:11.

   Mo kila eso tale na ka—Raica na “Creation or Evolution?—Part 1: Why Believe in God?”

•   O vakadeitaka ni vakavuna na Kalou na iVolatabu?

   Ka e kaya na iVolatabu: “E vakavuna na Kalou na iVolatabu kece, e yaga me veivakavulici, me veivunauci, me veivakadodonutaki, me veidusimaki ena ka e dodonu.”—2 Timoci 3:16.

   Mo taroga: ‘Cava au vakabauta kina ni iVolatabu e sega ni yavutaki ena vakasama vakatamata?’—Aisea 46:10; 1 Cesalonaika 2:13.

   Mo kila eso tale na ka—Raica na ulutaga “Ena Yaga Vakacava Vei au na iVolatabu?—Wase 1: Kila Nomu iVolatabu.”

•   Au vakabauta ni o Jiova e vakayagataka na ivavakoso vaKarisito me vakayacora nona inaki?

   Ka e kaya na iVolatabu: “O koya gona, ena vuku ni ivavakoso, ena vuku i Karisito tale ga, me vakalagilagi mada ga [na Kalou] ena itabatamata kece me tawamudu.”—Efeso 3:21.

   Mo taroga: ‘Au dau raica na ka e vakarautaki ena soqoni vaKarisito ni vu mai vei Jiova se vu vakatamata?’ (Maciu 24:45) ‘Au dau tiko ena soqoni ke rau sega mada ga ni gole na noqu itubutubu, se ke rau vakadonuya?’—Iperiu 10:24, 25.

   Mo kila eso tale na ka—Raica na ulutaga, “Na Cava Mo Gole Kina ina Vale ni Soqoni?”

 Sega ni vinakati sara mo uasivi mo qai papitaiso. Ia e dodonu mo vakaraitaka ni o via “gole tani mai na ka ca, qai cakava na ka vinaka.” (Same 34:14) Kena ivakaraitaki:

•   O muria tiko na ivakatagedegede i Jiova?

   Ka e kaya na iVolatabu: “Me vinaka tiko ga na nomuni lewaeloma.”—1 Pita 3:16.

   Mo taroga: ‘Au vakaraitaka tiko vakacava niu sa ‘vakavulica noqu vakasama me vakaduiduitaka na ka e donu mai na ka e cala’?’ (Iperiu 5:14) ‘Au rawa ni vakasamataka eso na sala au sa vorata tiko kina na veimurimuri? Era dau uqeti au noqu itokani meu cakava na ka e donu?’—Vosa Vakaibalebale 13:20.

   Mo kila eso tale na ka—Raica na ulutaga, “Au na Vakavulica Vakacava Noqu Lewaeloma?”

•   O kila ni o na saumitaro vei Jiova ena ka o cakava?

   Ka e kaya na iVolatabu: “Eda na dui saumitaro gona vua na Kalou.”—Roma 14:12.

   Mo taroga: ‘Au dau dina ena ka kece keu cala mada ga?’ ‘Au dau dina vei ira eso tale?’ (Iperiu 13:18) ‘Au dau vakaraitaka noqu cala, seu dau vunitaka, se beitaki ira kina eso tale?’—Vosa Vakaibalebale 28:13.

   Mo kila eso tale na ka—Raica na ulutaga, “Cava Meu Cakava Niu Cala?”

•   O sa saga tiko me dei nomu veiwekani kei Jiova?

   Ka e kaya na iVolatabu: “Toro voleka vua na Kalou ena qai toro voleka mai vei kemuni o koya.”—Jemesa 4:8.

   Mo taroga: ‘Cava au sa cakava tiko meu rawa ni volekati Jiova?’ Kena ivakaraitaki, ‘Vakacava na levu ni gauna au dau wilika kina na iVolatabu?’ (Same 1:1, 2) ‘Au dau masu wasoma?’ (1 Cesalonaika 5:17) ‘Au dau talaucaka na lomaqu vei Jiova? Au dau veitokani kei ira na itokani i Jiova?’—Same 15:1, 4.

   Mo kila eso tale na ka—Raica na ulutaga, “Ena Yaga Vakacava Vei au na iVolatabu?—Wase 2: Marautaka Nomu Wili iVolatabu” kei “Na Cava e Bibi Kina na Masu?”

 VAKATUTU: Mo rawa ni o vakarautaki iko mo papitaiso, wilika na wase 37 ni ivola, Questions Young People Ask—Answers That Work, Volume 2. Raica tale ga na taro (worksheet) ena tabana e 308 kei na 309.