RA TAROGA NA ITABAGONE
E ka ni Lasa na Wede?
Na cava na wede?
Era nanuma eso ni wede e laurai ena ka o tukuna se cakava mo vakaraitaka kina ni o domona e dua. Ia, vakacava e cala ke o vakaraitaka ni o domona e dua? Sega. E kaya e dua na goneyalewa o Ann: “Ke o taleitaka tiko e dua qai vinakata mo drau veibuku, o na tekivu ga ena wede.”
Ena vakamacalataki ena ulutaga qo na ivukivuki ni wede e nanumi ni dodomo dina, ia e cala na kena inaki.
“E bibi na vakarorogo ke o via bucina e dua na veiwekani voleka kei na dua. Ia e duatani ke o vakamosia na yalona ni o raica tu ga vakamamada nomudrau veiwekani.”—Deanna.
Na cava era wede kina eso?
Eso era wede mera dokadokai ira. E kaya kina e dua na goneyalewa o Hailey: “Nomu liaca ni o sa rawa ni wedeva e dua ena uqeti iko mo cakava tiko ga.”
Ke sega ni donu nomu inaki ni o domona e dua, o sa vakamosia tiko ga kina na lomana. Ia ke o nakita na ka o cakava mo dokadokai iko kina, e vinaka mo taroga na vuna o cakava kina qori. E tukuna na iVolatabu: “Na yalowai e marautaka na ka lialia.”—Vosa Vakaibalebale 15:21.
E kaya kina o Hailey: “E rairai ka ni lasa na wede, ia e sega ni dau vinaka na kena itinitini.”
Na cava e rerevaki kina?
Na wede ena vakacacana na kemu irogorogo.
“O koya e wede e sega ni nuitaki qai yalowai. O na vakila ni sega ni dau dina qai nanumi koya ga.”—Jeremy.
E tukuni ena iVolatabu: “Na loloma. . . e sega ni kauaitaka ga na ka e baleti koya.”—1 Koronica 13:4, 5.
Vakasamataka mada: Na mataqali ivakarau ni vosa kei na ivukivuki cava ena kilai kina ni o wede?
E vakamosi yalo na wede.
“Keu sotava e dua na dau wede, au sega ni via maliwai koya. E rairai vosa ga vei au niu dua na yalewa. O ira na dau wede era sega ni kauaitaki au dina; ra nanumi ira ga.”—Jaqueline.
E tukuni ena iVolatabu: “Me kua ni dua e qara na ka e yaga ga vua, me qara tale ga na ka e yaga vei ira tale eso.”—1 Koronica 10:24.
Vakasamataka mada: Vakacava ke cala nomu nanuma ni dua e domoni iko tiko? Ke vaka kina, e vakacava na ivakarau ni lomamu ni o kila ni cala nomu nanuma? Cava o na cakava ena ituvaki qori mo kua kina ni vakamosia na yalona e dua tale?
E seva na inaki ni nomu dodomo ni o wede.
“O koya e dau wede e sega ni tamata mo drau veibuku se mo vakamautaka. Ena rawa vakacava niu kila se nuitaka e dua e sega ni vinaka na nona inaki ni veibuku?”—Olivia.
E kaya na daunisame o Tevita: “Au yawaki ira tale ga na vunitaka na kedra roka dina.”—Same 26:4.
Vakasamataka mada: Na mataqali tamata vakacava e taleitaka na dau wede? O na via veitokani kei ira na mataqali tamata va qori?
Rawa ni o Wilika Tale ga
ME VAKALEWENI
Veikauaitaki se Wede?
Ni dua e vakauta na itukutuku e nanuma ni veikauaitaki, ena rairai nanumi ni wede vua e taura na itukutuku. O na qarauna vakacava mo kua ni vakauta na itukutuku cala?
RA TAROGA NA ITABAGONE
Au sa Rawa ni Veibuku?
Qo e lima na vakatutu o na kila kina ke o sa rawa ni veibuku qai vakawati.
RA TAROGA NA ITABAGONE
Veitokani se Dodomo?—Wase 1: Cava e Laurai ena iTukutuku au Ciqoma?
Raica na vakatutu e rawa ni vukei iko mo kila ke domoni iko tiko e dua se via veitokani ga.
RA TAROGA NA ITABAGONE
Na Cava Meu Kila me Baleta na Vakauitukutuku?
Na vakauitukutuku e rawa ni vakaleqa nomu veimaliwai kei na kemu irogorogo. Raica mada.
