RA TAROGA NA ITABAGONE
Na Cava e Bibi Kina na Masu?
E laurai ena dua na vakadidike nira dau masu e 80 na pasede na itabagone e Merika. Ia veimama ni iwiliwili qori era dau masu e veisiga. De dua era veinanuyaka eso na itabagone: ‘E dua wale ga na sala ni veivakacegui na masu se tiko eso tale na kena yaga?’
Na cava na ibalebale ni masu?
Na masu e dua na sala drau veitalanoa sara ga kina kei koya a bulia na ka kece. Vakasamataka mada ya! E cecere sara vei keda o Jiova, ia e “sega ni yawa o koya vei keda yadua.” (Cakacaka 17:27) Eda uqeti ena iVolatabu: “Toro voleka vua na Kalou ena qai toro voleka mai vei kemuni o koya.”—Jemesa 4:8.
O rawa vakacava ni toro voleka vua na Kalou?
Ni drau veivosaki ena masu.
Ni o vulica na iVolatabu, qai vakalaiva me “vosa” vei iko na Kalou.
Ena dei nomudrau veitokani kei na Kalou ni o vosa vua ena masu, qai vosa vei iko o koya ena gauna o vulica kina na iVolatabu.
“Dua dina na ka dokai meda veivosaki kei koya e Cecere Duadua o Jiova.”—Jeremy.
“E vakavolekati au vei Jiova na noqu dau talaucaka vua na lomaqu ena masu.”—Miranda.
Ena rogoca na Kalou noqu masu?
De dua o vakabauta na Kalou, o dau masu tale ga vua. Ia ena rairai dredre mo vakabauta ni na rogoci iko. E tukuna na iVolatabu ni o Jiova “na Daurogo masu.” (Same 65:2) E sureti iko tale ga mo ‘biuta vua na nomu lomaocaoca kece, ni kauaitaki iko o koya.’—1 Pita 5:7.
Vakasamataka mada: O dau veitalanoa vakalevu kei ira nomu itokani voleka? Qori na ka o rawa ni cakava tale ga kei na Kalou. Ni o masu wasoma vakayagataka na yacana, o Jiova. (Same 86:5-7; 88:9) E veiuqeti na iVolatabu mo “kua ni cegu ena masu.”—1 Cesalonaika 5:17.
“Ni keirau veivosaki kei na Tamaqu vakalomalagi ena masu, au dau talaucaka sara ga vua na lomaqu.”—Moises.
“Niu talaucaka vei Jiova na lomaqu, e vaka ga niu vosa tiko vei noqu Na se dua noqu itokani voleka.”—Karen.
Na cava soti au rawa ni masulaka?
E kaya na iVolatabu: “Na ka kece me vakaraitaki vua na Kalou ena masu kei na kerekere salavata kei na vakavinavinaka.”—Filipai 4:6.
O rawa tale ga ni masulaka nomu leqa, ni kaya na iVolatabu: “Biuta vei Jiova na nomu icolacola bibi, ena tokoni iko o koya.”—Same 55:22.
Kua ni talaucaka ga vua na Kalou na nomu leqa. E kaya e dua na goneyalewa o Chantelle: “Au sega ni itokani vinaka keu kere veivuke ga vei Jiova ena masu. Au vakabauta ni dodonu meu dau vakavinavinaka tale ga me levu na ka meu vakavinavinakataki koya kina.”
Vakasamataka mada: Na cava soti o rawa ni vakavinavinakataka? Na cava e tolu na ka o rawa ni vakavinavinakataki Jiova kina nikua?
“Noda qoroya mada ga eso na ka lalai me vaka na senikau totoka, e rawa ni uqeti keda meda vakavinavinaka vei Jiova ena masu.”—Anita.
“Vakasamataka vakatitobu e dua na ibulibuli o nanuma ni vakatubuqoroqoro, se dua na tikinivolatabu e tara na lomamu, qai vakavinavinakataki Jiova.”—Brian.
Rawa ni o Wilika Tale ga
ME VAKALEWENI
Sala Mo Vakavinakataka Kina Nomu iVakarau ni Masu
Na ka me vakaleweni qo ena vukei iko mo dikeva tale na ivakarau ni nomu masu vua na Kalou.
KA ERA KAYA NOMU ICABA
Vu ni Vakabauta—Na iVakatagedegede ni Kalou se Noqu
Rau vakamacalataka na itabagone qo na sala rau sega ni sotava kina na leqa ni vakatauvatani kei ira na lewe ni nodrau kalasi.
ESSENTIAL BIBLE TEACHINGS
E Rogoca na Masu Kece na Kalou?
Vakacava ke dua e nanumi koya ga ena nona masu? Vakacava ke vakalolomataki watina e dua na tagane, oti qai kerea me vakalougatataki koya na Kalou?
SAUMI NA TARO VAKAIVOLATABU
Cava Meu Masu Kina? Ena Rogoca na Kalou?
Me rogoca na Kalou na nomu masu se sega ena vakatau vei iko.
NA VALE NI VAKATAWA
E Dau Rogoca na Kalou Noda Masu?
E tukuna vei keda na iVolatabu ni rogoca na Kalou na noda masu ena sala e vakadonuya.
NA VALE NI VAKATAWA
