Na levu ni nomu marautaka nomu gade, o via talanoataka sara ga vei ira na nomu itokani! O na cakava vakacava qori? O na

1. vakauta yadua vei ira na postcard?

2. imeli vei ira kece nomu itokani?

3. biu itaba ena internet?

Ni rau se itabagone o nomu tutu kei nomu bubu, a se rairai dau vakayagataki ga na postcard.

Ni rau se itabagone nomu itubutubu, de dua era sa imeli e levu.

Ia e levu na itabagone nikua era sa taleitaka na biu itaba ena internet. Ke o dau taleitaka tale ga mo biu itaba ena internet, e vakamacalataki ena ulutaga qo eso na leqa mo qarauna.

•  E yaga vakacava na biu itaba ena internet?

•  Cava na ca ni biu itaba ena internet?

•  Ka o rawa ni cakava

•  Ka era kaya nomu icaba

Totolo. “Na itaba e dua na sala totolo mera kila kina eso tale na levu ni noqu marautaka na noqu gade se na veika au cakava vata kei ira noqu itokani, baleta niu se marautaka tu ga sa biu sara na kena itaba.”​—Melanie.

Rawarawa. “Keu via kila na ka me baleti ira noqu itokani, e rawarawa cake meu sara itaba ni veiveisau tu ga na itaba era biuta, e dredre tale na imeli.”​—Jordan.

Sala vinaka ni veitaratara. “Era tu yawa eso na noqu itokani kei na wekaqu. Ke ra biu itaba wasoma, au qai raica wasoma na itaba, e vaka ga au raici ira tu e veisiga!”​—Karen.

Rivarivabitaki nomu bula. De dua e nomu inaki ga mo biu itaba, ia e rawa ni kilai ena itaba o biuta eso tale na ka me vaka na vanua o tiko kina. E kaya na website na Digital Trends: “Na itaba se itukutuku e dau biu ena internet e rawa ni vakatakila eso na itukutuku vuni. E rawa ni vakayagataka na itukutuku qori e dua e ca na nona inaki, se tu vua na porokaramu ni kompiuta e rawa ni vaqara kina na nona itikotiko e dua.”

Era rawa ni kila na daubasulawa na vanua o tu kina. Ena dua na ripote ni website sa cavuti oti mai, e tukuni ni basu e 18 na vale a lala tu. Eratou kila vakacava na le tolu eratou butako ni na sega ni tiko e dua e vale? Eratou raica ena internet eso na itukutuku eratou kila kina na vanua era veitosoyaki kina na itaukeinivale. E sivia na $100,000 (na ilavo ni Merika) na isau ni iyaya eratou butakoca.

Vakasisila eso na ka o rawa ni raica. Eso era sega tu ni kila na madua, na ka kece ga era biuta me saravi. E kaya e dua na goneyalewa o Sarah: “O sureta tiko na leqa ni o vakaraica na ka era biuta eso oni sega ni veikilai. Qori e vaka ga ni o taubale voli ena dua na siti o vulagi kina qai sega tu vei iko na mape. O rawa sara ga ni tini ena dua na vanua o sega ni bau tadra mo butuka.”

Vakalusi gauna. E kaya e dua na goneyalewa o Yolanda: “E rawa ni veivakawelei na nomu sarava na itaba vovou e biu se vakawilika na ka era tukuna eso tale. Koya e ca sara, sa na toka ga e ligamu nomu talevoni mo vuki raica tiko kina na ka vovou e biu.”

E tokona qori e dua tale na itabagone o Samantha, e kaya: “E dodonu meu vakasamataka vinaka na levu ni gauna au vakayagataka ena internet. E vinakati dina mo lewai iko vinaka ke o via biu itaba ena internet.”

• Vakadeitaka mo kua ni raica na ka ca. E kaya na iVolatabu: “Au na sega ni biuta e dua na ka tawayaga e mataqu.”​—Same 101:3.

  “Keu raica ni sega ni vinaka na itaba se itukutuku era biuta eso ena internet, au na sega ni via raica tale e dua na ka era biuta.”​—Steven.

• Kua ni veitokani kei ira e duidui na ka era vakabibitaka, o ira qori era rawa ni vakamuai iko cala. E kaya na iVolatabu: “Ni kua ni vakaisini kemuni. Na ilala ca e vakacacana na itovo vinaka.”​—1 Korinica 15:33.

  “Kua ni veimurimuri, se mo biu itaba nira sa cakava tu e levu. Na biu itaba sara ga va qori o rawa ni raica kina na ka ca, nodra luvawale tu eso, kei na so tale na ka vakasisila.”​—Jessica.

• Yalana na gauna o vakayagataka ena internet, kei na nomu dau biu itaba. E tukuna na iVolatabu: “Ni qarauna matua na nomuni ilakolako, ni kua ni vakataki ira na lialia, ni vakataki ira ga na vuku, ni vakayagataka vakavinaka na nomuni gauna.”​—Efeso 5:15, 16.

  “Au sa sega ni dau sarava na ka era biuta eso ‘sa sivia tale na nodra biu itaba.’ Kena ivakaraitaki, e lako i baravi e dua qai biuta e 20 na itaba ni dua tiko ga na qanivivili. E kania e dua na gauna levu na vakaraica tiko na itaba kece ya!”​—Rebekah.

• Kua ni vakaraitaka ena itaba o biuta ni o nanuma ni o dua na ka. E kaya na dauvola iVolatabu o Paula: “Au tukuna kina vei kemuni me kua ni dua e sivia na ka e nanuma me baleti koya.” (Roma 12:3) Kua ni nanuma nira na taleitaka kece na nomu itokani na kemu itaba o dau biuta se na itaba ni so na ka o cakava.

  “Eso sa sega ni cegu nodra tabaki ira ga ra qai biuta ena internet. Ke o noqu itokani, au kila na kemu irairai, sega ni gadrevi mo vuki tabaki iko!”​—Allison.