“Niu tubucake tiko, e sega ni rawarawa noqu valuta noqu taleitaki ira eso tale na tagane. Au nanuma ni na oti yani, ia au se vakila tiko ga qori nikua.”​—David, 23.

 E lotu vaKarisito o David qai via vakamarautaka na Kalou. Ia ena cakava rawa qori ni vinakati ira na tagane? Cava na rai ni Kalou me baleta na veimoceri vakatagane se yalewa?

•  Na cava e kaya na iVolatabu?

•  Kena ibalebale ya . . . ?

•  Ia vakacava ke . . . ?

 Ni toso na gauna, e dau veiveisau na rai me baleta na veimoceri vakatagane se vakayalewa ena duidui vanua. Ia era sega ni vakamuai na lotu vaKarisito ena rai e takalevu tu, se mera “veikauyaki ena cagi kece ni ivakavuvuli.” (Efeso 4:​14) Ia era yavutaka nodra rai me baleta na veimoceri vakatagane se vakayalewa (se so tale na itovo) ena ivakatagedegede e tu ena iVolatabu.

 E matata na ka e kaya na iVolatabu me baleta na veimoceri vakatagane se vakayalewa. E kaya na Vosa ni Kalou:

•  “Mo kua ni mocevata kei na tagane me vaka na nomu mocevata kei na yalewa.”​—Vunau ni Soro 18:22.

•  “Ena vuku gona ni gagadre ni lomadra, . . . e laivi ira kina na Kalou mera vakaceguya na nodra garogaro vakasisila, nira vakatanitaka na nodra yalewa na veiyacovi e dodonu ra qai muria na kena e sega ni dodonu.”​—Roma 1:​24, 26.

•  “Ni kua ni vakacalai. O ira na dauveiyacovi tawadodonu, qaravi matakau, veibutakoci, na tagane era soli ira mera veiyacovi kei ira na tagane, o ira na tagane era daumocera na tagane, o ira na daubutako, daukocokoco, daumateni, dauveivakasewasewani, kei ira na dau kovea na ka, era na sega ni rawata na Matanitu ni Kalou.”​—1 Korinica 6:​9, 10.

 E dua ga na ivakatagedegede ni Kalou vei keda, se da dau veimoceri vakatagane se vakayalewa se sega. E vinakati vei keda kece meda lewa vinaka na noda gagadre meda kua ni cakava na ka e sega ni vakadonuya na Kalou.​—Kolosa 3:5.

 Kena ibalebale ya ni uqeta na iVolatabu na nodra cati na vakasalewalewa?

 Sega. E sega ni uqeta na iVolatabu nona cati e dua​—ke dau veimoceri vakamataqali vata se sega. Ia e tukuna ga meda ‘saga meda veiyaloni kei ira na tamata kece,’ se mani ivakarau ni bula cava era muria. (Iperiu 12:14) E cala gona nodra vakasagai se vakalolomataki se na kena tokoni nodra cati.

 Kena ibalebale ya mera saqata na lotu vaKarisito na lawa me baleta na vakawati vakamataqali vata?

 E vakaraitaka na iVolatabu na ivakatagedegede ni Kalou me baleta na vakawati ni rau vauci kina e dua na tagane kei na yalewa. (Maciu 19:​4-6) Ia na kena buli na lawa me baleta na vakawati vakamataqali vata e okati kina na veika vakapolitiki, sega ni ka eda dui vakabauta. E kaya na iVolatabu mera tawaveitovaki na lotu vaKarisito ena veika vakapolitiki. (Joni 18:36) Koya gona, era na sega ni tokona se saqata na lawa ni matanitu me baleta na vakawati vakamataqali vata kei na veimoceri vakatagane se vakayalewa.

 Ia vakacava ke dauveimoceri vakatagane se vakayalewa e dua? Ena rawa ni veisau?

 Io. Eso mada ga ena imatai ni senitiuri era veisau rawa! Ni tukuni oti nira na sega ni rawata na Matanitu ni Kalou o ira na veimoceri vakatagane se vakayalewa, e tomana na iVolatabu: “Eso sara ga vei kemuni oni a va tu ya.”​—1 Korinica 6:​11.

 Kena ibalebale ya nira na sega tale ni vakila na gagadre ni nodra ivakarau ni bula e liu? Sega. E kaya na iVolatabu: “Ni sulumaka na itovo vou, e vakavoui tiko ga ena kilaka dodonu.” (Kolosa 3:​10) E taura na gauna me caka na veiveisau.

 Ia vakacava ke tiko ga vei koya e via muria na ivakatagedegede ni Kalou na gagadre ni veimoceri vakamataqali vata?

 Me vaka ga eda dau cakava, e rawa sara ga ni vakatulewataka me kua ni muria na nona gagadre qori. Ena sala cava? E kaya na iVolatabu: “Moni lako tiko ga ena yalo tabu, oni na qai sega sara ni vakayacora na gagadre vakayago.”​—Kalatia 5:​16.

 E tukuna na tikinivolatabu qori ni na tiko ga na gagadre vakayago. Ia ke muria na ituvatuva vakayalo ni wili iVolatabu kei na masu, ena vakaukauataki koya me valuta na gagadre qori.

 E vakadinadinataka qori o David, e sa cavuti oti mai​—ni tukuna na ka dredre e sotava tiko vei rau nona itubutubu. E kaya: “E vaka ga e taluva vei au e dua na icolacola bibi. De dua au na marautaka vakalevu noqu bula vakaitabagone keu vosa vei rau na gauna ya.”

 Eda na marau nida muria na ivakatagedegede i Jiova ni ‘dodonu qai vakamarautaka vakalevu na lomada.’ Nida cakava qori “ena dua na icovi levu.”​—Same 19:​8, 11.