Eso na dauveiqaravi ni Kalou era dau veinanuyaka ke yaga tiko na nodra bulataka na ivakatagedegede vakaivolatabu. (Same 73:2, 3) Era na rairai cakava kina eso na ka e veisaqasaqa kei na ivakatagedegede i Jiova, ra qai uqeti ira eso tale mera vunitaka na ka ca era cakava.

 Na ulutaga qo ena vukei ira e rua nodra ivakarau ni bula mera muduka na itovo ca qori.

Ena ulutaga qo

•  Cava na ibalebale ni rua na ivakarau ni bula?

•  Au tamata ca ke rua noqu ivakarau ni bula?

•  Au na muduka vakacava?

•  Ka era kaya nomu icaba

 E kena ibalebale e veivakaisini na nomu itovo. Ni o tiko kei ira nomu icaba era sega ni qaravi Jiova, o cakava vata kei ira na ka e cata o Jiova. Ia ni o tiko kei ira na mataveitacini e vinaka na nomu itovo. E vaka ga o vakamatavulo ni o bulataka tu e rua na ivakarau ni bula.

 “O na vunitaka na kemu roka dina ke rua nomu ivakarau ni bula. Ena dredre gona me kilai se o cei dina o iko. Ena rawarawa mo lawakitaki ira nomu itokani kei ira na wekamu.”—Erin.

 O bau kila? Ni rua nomu ivakarau ni bula o na rawa ni cakava na veika e cata o Jiova ni o tu taudua.

 “Niu yabaki 14 au dau sara iyaloyalo ca ena internet. Niu veimaliwai kei ira eso tale, au dau kaya niu cata na iyaloyalo vakasisila. Ia au kila vinaka tu ni sega ni dina qori.”—Nolan.

 iVakavuvuli vakaivolatabu: “E sega ni dua e rawa ni qarava e rua na turaga, ni na cata e dua qai lomana e dua, ena doka e dua qai beca e dua.”—Maciu 6:24.

 Sega. Eso era vakatulewataka mera kua ni muria na ivakatagedegede vakaivolatabu. Vakacava o dau cakava tale ga qori? Se de dua:

•   O lomaleqataka ni o duatani mai vei ira na nomu icaba.

•   O nanuma ni sega ni tautauvata na ka o taleitaka kei ira nomu icaba ni vakatauvatani kei ira na mataveitacini.

•   O nanuma ni rui dredre mo muria na ivakaro ni Kalou.

 “Vaka vei au na vuna e rua tu kina nodra ivakarau ni bula eso na itabagone ra qai veimaliwai vinaka kei ira na sega ni tiko ena dina, nira vinakata mera taleitaki vei ira eso tale.”—David.

 Qori e sega ni vuna vinaka me rua kina nona ivakarau ni bula e dua. Ia e vakamacalataka na vuna e rawa nira rawai kina na tamata vinaka ena itovo qori. Cava o rawa ni cakava ke yacovi iko qori?

1.  1. Vakasamataka nomu ivakarau ni bula ena gauna qo. Mo taroga: ‘Qo na ivakarau dina ni bula au vinakata? Cava ena yaco keu sega ni veisautaka noqu itovo?’

    iVakavuvuli vakaivolatabu: “Na tamata yalomatua e raica na ca . . . , ia na yalowai e lako tu ga yani qai leqa kina.”—Vosa Vakaibalebale 27:12.

2.  2. Kua ni vunitaka e dua na ka. Veivosakitaka na kemu ituvaki kei rau na nomu itubutubu, se dua nomu itokani e matua vakayalo. De dua era na marautaka ni o qara na nodra veivuke qai veisautaka nomu itovo!

    “Sega ni rawarawa meu tukuna vakadodonu vei ira eso tale na noqu cala. Ia dua na ka noqu lomavakacegu niu sa cakava rawa.”—Nolan.

    iVakavuvuli vakaivolatabu: “O koya e ubia na nona cala ena sega ni rawaka, ia o koya e vakatusa qai biuta ena lomani.”—Vosa Vakaibalebale 28:13.

3.  3. Ciqoma na ka e yaco. Ena dredre mo nuitaki ke o vunitaka tiko eso na ka vei rau nomu itubutubu, se vei ratou na qase ni ivavakoso. Cava na kena itinitini? Rau na rawa ni vakatatabutaka vei iko eso na ka na nomu itubutubu, se ratou na qase ni ivavakoso. Ciqoma na kemu itotogi qai saga mo veisau ni o “dina ena ka kece.”—Iperiu 13:18.

    iVakavuvuli vakaivolatabu: “Mo rogoca na ivakasala, mo muria na veivakadodonutaki, mo vuku kina ena nomu veisiga mai muri.”—Vosa Vakaibalebale 19:20.

4.  4. Vaqaqacotaka nomu vakabauta ni lomani iko na Kalou. O Jiova e lomani iko, e kila vinaka tale ga na ka kece o cakava. Ke rua tiko gona nomu ivakarau ni bula, qori ena vakararawataki koya. Ia e ‘kauaitaki iko’ o Jiova qai vinakata me vukei iko mo veisau.—1 Pita 5:7.

    iVakavuvuli vakaivolatabu: “Ni veiraiyaki na mata i Jiova e vuravura taucoko me vakaraitaka na nona kaukaua vei ira e taucoko vua na lomadra.”—2 Veigauna 16:9.