E Cala na Gunu Alakaolo? Cava e Kaya na iVolatabu?
Kena isau vakaivolatabu
E sega ni cala ke da gunuva vakalailai na alakaolo. E kaya na iVolatabu ni waini e isolisoli ni Kalou me marautaki kina na bula. (Same 104:14, 15; Dauvunau 3:13; 9:7) E tukuni tale ga ena iVolatabu ni wainimate tale ga na waini.—1 Timoci 5:23.
A gunu waini o Jisu ni bula tu e vuravura. (Maciu 26:29; Luke 7:34) Ena dua na nona cakamana kilai levu, a vukica na wai me waini me nona iloloma ena dua na kana magiti ni vakamau.—Joni 2:1-10.
Rerevaki ni gunu sivia
E tukuni ena iVolatabu ni yaga na waini, ia e vakacala na gunu sivia kei na mateni. Na lotu vaKarisito gona e vinakata me gunu alakaolo, e dodonu me gunuva ga vakalailai. (1 Timoci 3:8; Taito 2:2, 3) E vakamacalataki ena iVolatabu na vuna meda kua kina ni gunu sivia.
Na gunu sivia e vakaleqa na ivakarau ni vakasama kei na vakatulewa. (Vosa Vakaibalebale 23:29-35) Na daumateni ena sega ni vakayacora rawa na ivakaro vakaivolatabu qo: “Moni solia na yagomuni me isoro bula, e savasava e vakadonuya na Kalou, oya me vakayagataki ena veiqaravi tabu na nomuni vakasama kei na yalomatua.”—Roma 12:1.
Na gunu sivia e vakavuna na madua, qai vakaleqa “na inaki ni kena vakayacori na ka vinaka.”—Osea 4:11; Efeso 5:18.
Ena vakavuna na bula dravudravua, kei na tauvimate na gunu sivia.—Vosa Vakaibalebale 23:21, 31, 32.
E cata na Kalou na gunu sivia kei na mateni.—Vosa Vakaibalebale 23:20; Kalatia 5:19-21.
O na kila vakacava ni sa sivia na ka o gunuva?
O koya e sivia na alakaolo e gunuva, e rawa ni cakava na ka e leqataki kina nona bula kei na nodra bula eso tale. E sega ni qai mateni ga e dua ke sa sega sara ga ni vakilai koya. E kaya na iVolatabu ni rawa ni kilai tale ga ni sa mateni e dua ena nona itautaubale, ke sa veilecayaki nona vakasama, e taceba, vakavuveiba, se sa sega ni kilai na cava e kaya. (Jope 12:25; Same 107:27; Vosa Vakaibalebale 23:29, 30, 33) Ke sega mada ga ni lai tini sara ena mateni, e se rawa ga ni ‘gunu sivia’ e dua qai sotava kina e levu na leqa.—Luke 21:34, 35..
Kua ni gunu
E vakamacalataki tale ga ena iVolatabu na ituvaki me kua ni gunu alakaolo kina na lotu vaKarisito:
Ke veivakatarabetaki na alakaolo.—Roma 14:21.
Ke vakatabui na alakaolo ena dua na vanua.—Roma 13:1.
Ke dredre me lewa vinaka e dua na levu ni ka e gunuva. Ena vinakati mera cakava eso na veiveisau levu o ira era bobula ina alakaolo.—Maciu 5:29, 30.
Rawa ni o Wilika Tale ga
ESO TALE NA ULUTAGA
O na Lewa Vinaka Vakacava na Nomu Gunu?
Lima na ka o rawa ni cakava mo lewa vinaka kina na nomu gunu, ena gauna mada ga o lomabibi kina.
RA TAROGA NA ITABAGONE
Na Cava Meu Kila me Baleta na Alakaolo?
Vakatulewa vinaka me baleta na alakaolo mo kua kina ni totogitaki se vakacacani kemu irogorogo, me kua ni vakayacori vei iko na veivakasagai tawakilikili, mo kua ni bobula ina gunu, mo kua tale ga ni mate.
NA VALE NI VAKATAWA
Veivuke me Kua ni Yaco na Leqa
Na ivakasala yaga ena iVolatabu sa vukei ira eso mera walia nodra leqa.
VAKAWATI & VUVALE
Vakamacalataka na Alakaolo Vei Ira na Luvemu
Na gauna cava mera vakamacalataka kina na itubutubu vei ira na luvedra na usutu bibi qo, mera cakava tale vakacava?
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.