E kaya e dua na itabagone o Will: “E rawa ni vakavucesa na wili iVolatabu ke o wiliwili wale tu ga.”

 E vakamacalataki ena ulutaga qo na sala mo marautaka kina nomu wili iVolatabu.

•  Biuti iko ena ituvaki o wilika ena iVolatabu

•  Vakadidike!

•  Ka era kaya nomu icaba

 Kua ni wiliwili wale tu ga. O rawa ni muria na kena iwalewale qo:

1.   Digia e dua na ivolatukutuku vakaivolatabu o via vulica. O rawa ni digia na ivolatukutuku ni dua na ka e yaco, dua na wase ena Kosipeli, se dua vei ira na katokatoni ni wili iVolatabu veiuqeti ena jw.org.

2.   Wilika na ivolatukutuku. O rawa ni wilika taudua, se wilika vakadomoilevu kei ira na nomu itokani se lewe ni vuvale. E rawa ni wasewasei na ka e wiliki, dua me daunivakamacala, kena vo mera qai wilika na ka era kaya o ira na talanoataki kina.

3.   Tovolea mada e dua se vica na vakatutu qo:

   •   Droinitaka na ka o wilika. O rawa ni droinitaka eso na iyaloyalo me vakamacalataka na veitaravi ni veika e yaco. Vola e ruku ni iyaloyalo yadua na ka e yaco tiko.

   •   Droinitaki ira o wilika na kedra italanoa. Kena ivakaraitaki, ni o wilika na kena italanoa e dua na tamata yalodina, vakasamataka na nona itovo, na veika e cakava, kei na sala e vakalougatataki kina.

   •   Wilika na ivolatukutuku me vaka e dua na italanoa e vakaraitaki ena nius. Veiveisautaka na iwalewale o vakamacalataka kina na veika e yaco. Cakava tale ga e dua na “veitarotarogi” kei ira era talanoataki vaka kina o ira era raica na ka e volatukutukutaki ni yaco.

   •   Ke vakatulewa cala e dua e talanoataki ena ivolatukutuku o wilika, vakasamataka e dua tale na itinitini ni ka e cakava. Kena ivakaraitaki, dikeva na ivolatukutuku ni nona cakitaki Jisu o Pita. (Marika 14:66-​72) A rawa ni vakatulewa vinaka vakacava o Pita ni vakatovolei me cakitaki Jisu?

   •   Ke o dau taleitaka mo vakatovolea eso na ka vou, o rawa sara ga ni vola nomu ivolatukutuku ni ka e vakamacalataki ena wase ni iVolatabu o wilika. Vola tale ga na tikina bibi e vulici kina.​—Roma 15:4.

 Ke o vakadidike, o na raica eso na iyau vuni ena ivolatukutuku o wilika. E rawa ni okati ena veika vovou o vulica ena so na gauna, e dua wale ga se rua na vosa e cavuti ena ivolatukutuku o wilika ena iVolatabu.

 Kena ivakaraitaki, vakatauvatana na Maciu 28:7 kei na Marika 16:7.

•    Na cava e cavuta kina o Marika ena ivolatukutuku e vola ni na rairai o Jisu vei ratou na tisaipeli “kei Pita”?

•  iDusidusi: A sega ni raica o Marika na veika e yaco, a rairai tukuna vua qori o Pita.

•  iYau vuni: Na cava e lomavakacegu kina o Pita ni rogoca ni via raici koya tale o Jisu? (Marika 14:66-​72) E vakaraitaka vakacava o Jisu ni itokani dina i Pita? O na vakatotomuria vakacava na ivakaraitaki i Jisu mo dua na itokani dina?

 O na marautaka vakalevu nomu wili iVolatabu ke o biuti iko ena ituvaki o wilika qai dikeva eso tale na kena itukutuku!