Ke o vakayagataka na Internet, mo namaka ni o na raica ena dua na gauna na iyaloyalo vakasisila. E kaya o Hayley, e dua na goneyalewa yabaki 17, “O sega tale ni vaqara, e vaqarai iko mai.”

Na iyaloyalo vakasisila e rawa ni temaki ira era nakita mera kua ni sarava. E kaya o Greg, sa yabaki 18, “Au kaya niu na qaqarauni, ia au qai raica. Mo kua gona ni kaya ni o na sega sara ni raica.”

Nikua, sa rawarawa wale na kena saravi na iyaloyalo vakasisila ni vakatauvatani kei na gauna sa oti. Levu na itabagone era vakarautaka ga ra qai vakauta na itaba vakasisila ena nodra talevoni veikauyaki.

Bibi me nanumi: Ena sega toka ni rawarawa vei iko ni vakatauvatani kei rau na nomu itubutubu se tukamu ena gauna ratou se gone kina. Ia na taro, O na cata na iyaloyalo vakasisila?​—Same 97:10.

E kena isau na io, ke o vinakata. Ia mo kila tiko ni ca na iyaloyalo vakasisila. Meda raica mada na ka era tukuna eso kei na kena dina ena ulutaga qo.

Ka era tukuna eso: E sega ni vakaleqai au na iyaloyalo vakasisila.

Kena dina: Na iyaloyalo vakasisila ena vakadukadukalitaka na nomu vakasama me vaka ga na kena vakaleqa na nomu yatevuso na tavako. Ena beci kina na ka e bulia na Kalou me vauci rau vata tiko ga e lewe rua. (Vakatekivu 2:24) Ni toso na gauna, o na sega mada ga ni vakaduiduitaka rawa na ka e donu kei na ka e cala. Me kena ivakaraitaki, era kaya eso na kenadau ni o ira na tagane era vakamatauna mera sarava na iyaloyalo vakasisila e rawa sara ga nira raica vakamamada na nodra vakalolomataki na yalewa.

E vakamacalataki ena iVolatabu nira “sega tale ni qai kila na madua” eso. (Efeso 4:19) Sa sega ni qai vakila na nodra lewaeloma e dua na ka, era sega ni rarawataka nira caka ca.

Ka era tukuna eso: Na iyaloyalo vakasisila ena vakavulici iko ena veiyacovi.

Kena dina: Na iyaloyalo vakasisila e vakavulici iko ena kocokoco. Eda beci kina qai nanumi ni inaki ga ni noda bula meda vakaceguya na noda gagadre. E sega gona ni kurabuitaki ni tukuni ena dua na vakadidike, ni o ira era vakamatauna mera sarava na iyaloyalo vakasisila e rawa nira sega ni marautaka na nodra bula vakawati.

E vakasalataki ira na lotu vaKarisito na iVolatabu mera cata na “veiyacovi tawadodonu, na ivalavala dukadukali, na garogaro vakasisila, na gagadre ca, kei na kocokoco,” na ka kece e uqeta na iyaloyalo vakasisila.​—Kolosa 3:5.

Ka era tukuna eso: Era madualaka na veiyacovi o ira na cata na iyaloyalo vakasisila

Kena dina: O ira na cata na iyaloyalo vakasisila era doka na veiyacovi. Era raica me isolisoli ni Kalou e dei kina na kedrau ivau kei na veidinadinati e dua na tagane kei na dua na yalewa. O ira e va qori na nodra rai era marautaka vakalevu na nodra bula vakawati.

E sega ni wereubiubi na iVolatabu ena ka me baleta na veiyacovi. Me kena ivakaraitaki, e tukuna vei ira na tagane vakawati: ‘Mo marautaka na yalewa o vakawatitaka mai na gauna o se cauravou kina . . . Me rawai iko tiko ga na nona dodomo.’​—Vosa Vakaibalebale 5:18, 19.

Na cava o na cakava ke o sega ni valuta rawa nomu temaki mo raica na iyaloyalo vakasisila? Ena yaga vei iko na Draunipepa me Vakaleweni “Sala mo Cata Kina na iYaloyalo Vakasisila.”

Mo vakadeitaka ni o rawa ni valuta nomu temaki mo raica na iyaloyalo vakasisila. Mo vulica tale ga mo kua ni sarava na iyaloyalo vakasisila ke o dau raica. Ena yaga sara ke o cakava qori.

Rogoca na ka e tukuna o Calvin, sa yabaki 18, e tekivu raica na iyaloyalo vakasisila ni se qai yabaki 13 beka. E kaya, “Au kila ni cala ia au rawai meu raica tiko ga, au sega ni valuta rawa. Niu sarava oti sa qai ora tu na lomaqu. Meu tukuna vakadodonu, au qai lomavakacegu ni kila o tamaqu! Au mani vukei.”

E vulica o Calvin me cata na iyaloyalo vakasisila. E kaya: “Au veivutuni niu sarava na iyaloyalo vakasisila, au se vakila tiko ga na kena ca, ni dau lesu tale mai ena noqu vakanananu na iyaloyalo au raica. Ena so na gauna, au temaki meu vakasamataka na ka au rawa ni raica keu sarava na ka e sega ni dodonu. Ia au qai vakasamataka na levu ni noqu marau, noqu savasava, kei na veika vinaka au na marautaka niu muria na veidusimaki i Jiova.”