Hebreos 2:1-18
2 Le oʼolal kʼaʼabéet k-maas tuukul tiʼ le baʼaloʼob tsʼoʼok k-uʼuyikoʼ,+ utiaʼal beyoʼ mix bikʼin ka náachkuntaʼakoʼon tiʼ le fejoʼ.+
2 Tumen wa béeychaj le baʼax aʼalaʼan yéetel u chiʼ le ángeloʼoboʼ,+ bey xan wa castigartaʼab jeʼex u yaʼalik le justicia tuláakal le máaxoʼob tu beetaj u kʼasaʼaniloʼob yéetel maʼ tu yuʼuboʼob tʼaanoʼ,+
3 toʼoneʼ ¿bix jeʼel k-púutsʼul tiʼ le castigo wa tsʼoʼok k-pʼatik juntséelil le jach nojoch salvaciónoʼ?+ Tsʼoʼoleʼ le salvaciónaʼ yáax k-Yuumtsil tsikbalte,+ yéetel le máaxoʼob uʼuyoʼ tu yeʼesoʼob jach yaan u béeytal.
4 Lelaʼ tak Dios eʼes de ke jaaj, tumen tu tsʼáaj señaloʼob, milagroʼob, u jejeláasil nukuch baʼaloʼob,+ tu tʼoxaj xan le espíritu santo* jeʼex tu tuklaj maʼalobeʼ.+
5 Le túumben yóokʼol kaab táan k-aʼalik taʼaytak u yantaloʼ+ maʼ yáanal u páajtalil ángeloʼob kun tsʼaabiliʼ.
6 Chéen baʼaleʼ juntéenjeakeʼ juntúul máakeʼ tu yaʼalaj tu táan le máakoʼoboʼ: «¿Baʼax juntúul kʼeban máak utiaʼal a chʼaʼik en cuentail? ¿Baʼax juntúul kʼeban wíinik utiaʼal ka a kanáante?+
7 Chéen junpʼíit menosil ta beetil tiʼ le ángeloʼoboʼ, ta tsʼáaj páajtalil tiʼ yéetel ta nojbaʼalkúuntaj. Tuláakal baʼax a beetmaj yéetel a kʼaboʼobeʼ ta tsʼáaj yáanal u páajtalil.
8 Ta tsʼáaj tuláakal baʼal yáanal u páajtalil».+ Mix baʼal pʼáat maʼ u tsʼaʼabal yáanal u páajtalil,+ Dioseʼ tu tsʼáaj tuláakal baʼal yáanal u páajtalil u Paal.+ Toʼoneʼ tak beoraaʼ maʼ k-il wa tiʼ yaan tuláakal baʼal yáanal u páajtalil u Paaleʼ,+
9 chéen baʼax k-ilkeʼ le máax beetaʼab junpʼíit menosil tiʼ le ángeloʼoboʼ,+ tsʼaʼab páajtalil tiʼ yéetel nojbaʼalkúuntaʼab úuchik u kíimil, le máakaʼ Jesús.+ Bey túunoʼ tu yoʼolal u nojoch utsil Dioseʼ letiʼeʼ yanchaj u kíimil utiaʼal u yutsil tuláakal máak.+
10 Tuláakal le baʼaloʼob yanoʼoboʼ beetaʼanoʼob utiaʼal u alabartaʼal Dios, tuláakal le baʼaloʼoboʼ Dios beetmiloʼob. Letiʼeʼ utiaʼal ka u nojbaʼalkúunt yaʼab tiʼ u paalaleʼ+ tu chaʼaj u muʼyaj* le Máax yéeyaʼan utiaʼal tsʼáaik salvaciónoʼ.+ Bey túunoʼ le Máax yéeyaʼanoʼ tu yeʼesaj jeʼel u páajtal u salvartik le paalaloʼoboʼ.+
11 Le máaxoʼob táan u beetaʼaloʼob santoiloʼ bey xan le máax tsʼoʼok u pʼáatal santoiloʼ+ chéen tiʼ juntúuliliʼ máax u taaloʼob,+ le oʼolal Jesúseʼ maʼ tu chʼaʼik suʼtal u yaʼalik u «sukuʼunoʼob».+
12 Letiʼeʼ ku yaʼalik: «Yaan in waʼalik a kʼaabaʼ utiaʼal u yuʼub in sukuʼunoʼob, yaan in alabarkech yéetel kʼaay kéen in muchʼinba yéetel le máaxoʼob adorarkechoʼ».+
13 Ku yaʼalik xan: «Yaan in kʼubik in wóol tiʼ letiʼ».+ Tsʼoʼoleʼ ku yaʼalik xan: «¡Uʼuyeʼex lelaʼ! Teen yéetel le paalaloʼob tsʼoʼok u tsʼáaikten Jéeobaoʼ»* tiaʼanoʼon wayeʼ.+
14 Chéen baʼaleʼ tumen de bakʼ yéetel kʼiʼikʼ «le mejen paalaloʼoboʼ» letiʼ xaneʼ tu beetuba de bakʼ yéetel kʼiʼikʼ.+ Beyoʼ le kéen kíimkeʼ yaan u páajtal u xuʼulsik tiʼ le máax yaan u páajtalil tiʼ utiaʼal u kíimsik máakoʼ,+ lelaʼ letiʼe Kʼaasilbaʼaloʼ.*+
15 Yaan xan u páajtal u jáalkʼabtik tuláakal le máaxoʼob beyoʼob esclavoʼob tiʼ le kíimiloʼ, tumen letiʼobeʼ tuláakal u kʼiiniloʼob u kuxtaloʼob u chʼaʼamoʼob saajkil tiʼ le kíimiloʼ.+
16 U jaajileʼ letiʼeʼ maʼ táan u yáantik ángeloʼobiʼ, baʼaxeʼ táan u yáantik u chʼiʼibal* Abrahán.+
17 Le oʼolaleʼ kʼaʼabéetchaj u beetkuba jach jeʼex u «sukuʼunoʼobeʼ»+ utiaʼal ka páajchajak u beetkuba juntúul maas nojoch sacerdote ku chʼaʼik óotsilil, yéetel ku beetik baʼax u kʼáat Dios, bey túunoʼ yaan u páajtal u kʼubik u kuxtal+ utiaʼal ka perdonartaʼak u kʼeban le máakoʼoboʼ.+
18 Letiʼ túuneʼ úuchik u muʼyaj le ka túuntaʼab u yóoloʼ+ beoraaʼ jeʼel u páajtal xan u yáantik le máaxoʼob táan u túuntaʼal u yóoloʼoboʼ.+
Notas
^ Ilawil «Espíritu santo», página 2562.
^ Wa «u sufrir».
^ Ilawil página 2566.
^ Ich griegoeʼ ku yaʼalaʼal kaʼach «Diablo». Ilawil «Kʼaasilbaʼal», página 2568.
^ Wa «descendencia».
