Ngaba Iziprofeto Ezithetha NgoMesiya Zibonisa Ukuba YayinguYesu UMesiya?

DLALA

Impendulo yeBhayibhile

Ewe. Xa uYesu wayesemhlabeni, wazalisekisa iziprofeto ezininzi ezithetha ‘ngoMesiya iNkokheli,’ owayeza kuba “nguMsindisi wehlabathi.” (Daniyeli 9:25; 1 Yohane 4:14) Nasemva kokuba efile, uYesu zange ayeke ukuzalisekisa iziprofeto ezithetha ngoMesiya.—INdumiso 110:1; IZenzo 2:34-36.

Lithetha ukuthini igama elithi “Mesiya”?

Igama lesiHebhere elithi Ma·shiʹach (Mesiya) nelesiGrike elithi Khri·stos (Kristu) athetha “Othanjisiweyo.” Ngoko, “uYesu Kristu” uthetha ukuba “uYesu Umthanjiswa,” okanye “uYesu uMesiya.”

Ngexesha lokubhalwa kweBhayibhile, umntu wayethanjiswa ngokugalelwa ioli entloko xa enikwa igunya elikhethekileyo. (Levitikus 8:12; 1 Samuweli 16:13) UYesu wakhethwa nguThixo ukuze abe nguMesiya, onegunya elikhulu. (IZenzo 2:36) Kodwa ke, uYesu wathanjiswa ngomoya oyingcwele, endaweni yeoli.—Mateyu 3:16.

Ngaba inokwenzeka into yokuba kubekho ooMesiya abaninzi?

Hayi. Njengokuba imigca eseminweni ibonisa umntu omnye kuphela, nokuzaliseka kweziprofeto zeBhayibhile kubonisa ukuba mnye kuphela uMesiya okanye uKristu. Kodwa, iBhayibhile yachaza ukuba “kuza kuvela ooKristu nabaprofeti bobuxoki, benze imimangaliso nemilingo ukuze balahlekise nkqu nabakhethiweyo, ukuba kunokwenzeka.”—Mateyu 24:24.

Ngaba uMesiya useza kubonakala kwixesha elizayo?

Hayi. IBhayibhile yachaza kwangaphambili ukuba uMesiya wayeza kuba yinzala kaKumkani uDavide wakwaSirayeli. (INdumiso 89:3, 4) Kodwa, iincwadi zamaYuda ezazibonisa umnombo kaDavide azisekho. Kubonakala ngathi zatshatyalaliswa xa amaRoma ahlasela iYerusalem ngo-70 C.E. a Ukususela ngelo xesha, akukho mntu uye wakwazi ukubonisa ukuba uyinzala yentsapho kaKumkani uDavide. Kodwa ngexesha likaYesu zazisekhona ezi ngxelo zibonisa umnombo kaDavide. Nangona kunjalo, kwaneentshaba zakhe zange zikwazi ukumphikisa ukuba uyinzala kaDavide.—Mateyu 22:41-46.

Zingaphi iziprofeto ezithetha ngoMesiya eBhayibhileni?

Asinako ukulichaza ngokungqalileyo inani leziprofeto ezithetha ngoMesiya. Ngokomzekelo, indlela ezibalwa ngayo iziprofeto inokwahluka nakwizibhalo ekubonakala ngokucacileyo ukuba zithetha ngoMesiya. UIsaya 53:2-7 uchaza iindlela ezininzi awayeza kubonakala ngazo ngoMesiya. Abanye abantu basenokuthi esi sibhalo sichaza isiprofeto esinye, kanti abanye basenokuthi nto ngaye awayeza kubonakala ngayo sisiprofeto.

Ezinye iziprofeto ezithetha ngoMesiya ezazalisekiswa nguYesu

Isiprofeto	Sifumaneka	Sizaliseka
Yinzala ka-Abraham	Genesis 22:17, 18	Mateyu 1:1
Yinzala yonyana ka-Abraham uIsake	Genesis 17:19	Mateyu 1:2
Wazalelwa kwisizwe sakwaYuda	Genesis 49:10	Mateyu 1:1, 3
Ngowakumnombo kaKumkani uDavide	Isaya 9:7	Mateyu 1:1
Wazalwa yintombi engazange yalala nandoda	Isaya 7:14	Mateyu 1:18, 22, 23
Wazalelwa eBhetelehem	Mika 5:2	Mateyu 2:1, 5, 6
Wabizwa ngokuba nguImanuweli b	Isaya 7:14	Mateyu 1:21-23
Wakhula esokola	Isaya 53:2	Luka 2:7
Kwabulawa abantwana emva kokuba ezelwe	Yeremiya 31:15	Mateyu 2:16-18
Kwathiwa makahambe eYiputa	Hoseya 11:1	Mateyu 2:13-15
Wayebizwa ngokuba ngumNazarete c	Isaya 11:1	Mateyu 2:23
Kwaqala kwathunyelwa umthunywa phambi kwakhe	Malaki 3:1	Mateyu 11:7-10
Wathanjiswa njengoMesiya ngo-29 C.E. d	Daniyeli 9:25	Mateyu 3:13-17
UThixo wathi nguNyana wakhe	INdumiso 2:7	IZenzo 13:33, 34
Wayeyithanda indlu kaThixo	INdumiso 69:9	Yohane 2:13-17
Wayeshumayela iindaba ezilungileyo	Isaya 61:1	Luka 4:16-21
Ukushumayela kwakhe kwaba kukukhanya okuqaqambe kakhulu eGalili	Isaya 9:1, 2	Mateyu 4:13-16
Wayesenza imimangaliso njengoMoses	Duteronomi 18:15	IZenzo 2:22
NjengoMoses, wayethetha izinto ezisuka kuThixo	Duteronomi 18:18, 19	Yohane 12:49
Waphilisa abantu abaninzi abagulayo	Isaya 53:4	Mateyu 8:16, 17
Wayengazitsaleli mehlo	Isaya 42:2	Mateyu 12:17, 19
Wayebacingela abo basentlungwini	Isaya 42:3	Mateyu 12:9-20; Marko 6:34
Wabonisa ubulungisa bukaThixo	Isaya 42:1, 4	Mateyu 12:17-20
WayenguMcebisi Omangalisayo	Isaya 9:6, 7	Yohane 6:68
Waxelela abantu ngegama likaYehova	INdumiso 22:22	Yohane 17:6
Wayefundisa ngemizekelo	INdumiso 78:2	Mateyu 13:34, 35
WayeyiNkokheli	Daniyeli 9:25	Mateyu 23:10
Abantu abaninzi babengamkholelwa	Isaya 53:1	Yohane 12:37, 38
Wayelilitye lokukhubeka	Isaya 8:14, 15	Mateyu 21:42-44
Wayengafunwa ngabantu	INdumiso 118:22, 23	IZenzo 4:10, 11
Wacatshukelwa engenzanga nto	INdumiso 69:4	Yohane 15:24, 25
Wangena eYerusalem ekhwele idonki	Zekariya 9:9	Mateyu 21:4-9
Wadunyiswa ngabantwana	INdumiso 8:2	Mateyu 21:15, 16
Weza egameni likaYehova	INdumiso 118:26	Yohane 12:12, 13
Waphoxwa ngumhlobo awayemthembile	INdumiso 41:9	Yohane 13:18
Wathengiswa ngamaqhosha esilivere ayi-30 e	Zekariya 11:12, 13	Mateyu 26:14-16; 27:3-10
Washiywa ngabahlobo	Zekariya 13:7	Mateyu 26:31, 56
Kwavela amangqina athetha ubuxoki ngaye	INdumiso 35:11	Mateyu 26:59-61
Wathula phambi kwabantu ababemtyhola	Isaya 53:7	Mateyu 27:12-14
Watshicelwa	Isaya 50:6	Mateyu 26:67; 27:27, 30
Wabethwa entloko	Mika 5:1	Marko 15:19
Wabethwa	Isaya 50:6	Yohane 19:1
Zange alwe nabo babembetha	Isaya 50:6	Yohane 18:22, 23
Iinkokheli zoorhulumente zadibana ukuze zilwe naye	INdumiso 2:2	Luka 23:10-12
Wabethelelwa esibondeni ngezandla neenyawo zakhe	INdumiso 22:16	Mateyu 27:35; Yohane 20:25
Abantu benza amaqashiso ngeempahla zakhe	INdumiso 22:18	Yohane 19:23, 24
Wabalwa phakathi kwaboni	Isaya 53:12	Mateyu 27:38
Kwahlekiswa ngaye, ethukwa	INdumiso 22:7, 8	Mateyu 27:39-43
Waphathwa kakubi ngenxa yaboni	Isaya 53:5, 6	1 Petros 2:23-25
Kwakubonakala ngathi ushiyiwe nguThixo	INdumiso 22:1	Marko 15:34
Wanikwa inyongo neviniga ukuba ayisele	INdumiso 69:21	Mateyu 27:34
Wanxanwa ngaphambi kokuba afe	INdumiso 22:15	Yohane 19:28, 29
Wawuyekela kuThixo umoya wakhe	INdumiso 31:5	Luka 23:46
Wancama ubomi bakhe	Isaya 53:12	Marko 15:37
Wahlawulela abantu ukuze bangabi nasono	Isaya 53:12	Mateyu 20:28
Amathambo akhe zange ophulwe	INdumiso 34:20	Yohane 19:31-33, 36
Wahlatywa	Zekariya 12:10	Yohane 19:33-35, 37
Wangcwatywa nezityebi	Isaya 53:9	Mateyu 27:57-60
Wavuswa ekufeni	INdumiso 16:10	IZenzo 2:29-31
Indawo yomntu owayemthengisile yanikwa omnye umntu	INdumiso 109:8	IZenzo 1:15-20
Uhlala ngasekunene kukaThixo	INdumiso 110:1	IZenzo 2:34-36

a IMcClintock and Strong’s Cyclopedia ithi: “Ayithandabuzeki into yokuba iincwadi ezazibonisa iintsapho neentlanga zakwaYuda zalahleka xa kwakutshatyalaliswa iYerusalem, hayi ngaphambi kokuba itshatyalaliswe.”

b Igama lesiHebhere elithi Imanuweli, elithetha ukuthi “UThixo Unathi,” liwuchaza kakuhle umsebenzi kaYesu njengoMesiya. Ukuza kwakhe emhlabeni nezinto awazenzayo kwabonisa kakuhle ukuba uThixo ukunye nabakhonzi bakhe.—Luka 2:27-32; 7:12-16.

c Igama elithi ‘mNazarete’ kuthiwa lisuka kwigama lesiHebhere elithi neʹtser, elithetha ‘ukuntshula.’

d Ukuze ubone indlela abalwa ngayo amaxesha eBhayibhileni abonisa ukuba uMesiya wafika ngo-29 C.E., jonga inqaku elithi “Indlela Isiprofeto SikaDaniyeli Esikuchaza Ngayo Ukufika KukaMesiya.”

e Esi siprofeto sikwincwadi kaZekariya, kodwa uMateyu umbhali weBhayibhile uthi “kwenzeka into eyayithethwe ngumprofeti uYeremiya.” (Mateyu 27:9) Kubonakala ngathi eBhayibhileni, ngamanye amaxesha incwadi kaYeremiya yayiba sekuqaleni kwiincwadi “zabaProfeti.” (Luka 24:44) UMateyu xa wayesithi “Yeremiya,” kubonakala ngathi wayethetha ngazo zonke iincwadi zabaProfeti, kuquka ekaZekariya.

Mhlawumbi Ungayithanda Nale

UVUKANI!

https://cms-imgp.jw-cdn.org/img/p/502018132/univ/art/502018132_univ_sqr_xl.jpg

ijwbq isahl. 146

AmaNgqina KaYehova

Ngaba Iziprofeto Ezithetha NgoMesiya Zibonisa Ukuba YayinguYesu UMesiya?

Impendulo yeBhayibhile

Lithetha ukuthini igama elithi “Mesiya”?

Ngaba inokwenzeka into yokuba kubekho ooMesiya abaninzi?

Ngaba uMesiya useza kubonakala kwixesha elizayo?

Zingaphi iziprofeto ezithetha ngoMesiya eBhayibhileni?

Ezinye iziprofeto ezithetha ngoMesiya ezazalisekiswa nguYesu

Mhlawumbi Ungayithanda Nale

Ithini IBhayibhile NgoMesiya

Inkosikazi YomYuda Ihlolisisa Ukholo Lwayo