Tito 3:1-15
3 Qhubeka ubakhumbuza ukuba bathobele oorhulumente nabantu abanegunya,+ baze bakulungele ukwenza izinto ezilungileyo,
2 bangathethi kakubi nangabani na, bangathandi ngxabano, babe bhetyebhetye,*+ bahlale bezolile kuye wonke umntu.+
3 Kuba nathi sasikhe asayisebenzisa kakuhle ingqondo, singathobeli, silahlekiswa, singamakhoboka azo zonke iintlobo zeminqweno, sithanda ukuzanelisa, sisenza izinto ezimbi, sinomona, sisenyanyeka, sicaphukelana.
4 Kodwa ke, xa uMsindisi wethu uThixo wasenzela ububele,+ waza wabonisa ukuba uyasithanda
5 (hayi kuba kukho izinto ezilungileyo esizenzileyo,+ kodwa kuba enenceba),+ wasisindisa ngokusihlamba ukuze sifumane ubomi,+ nangokusenza batsha ngomoya oyingcwele.+
6 Wawuthulula wamninzi lo moya phezu kwethu esebenzisa uYesu Kristu uMsindisi wethu,+
7 ukuze emva kokuba kuthiwe singamalungisa ngenxa yokuba esenzele ububele,*+ sibe ziindlalifa+ ezinethemba lobomi obungunaphakade.+
8 Ezi zinto ndizithethayo ziyinyaniso, yaye ndifuna uqhubeke uzibethelela, ukuze abo bakholwayo kuThixo bahlale becinga ngokwenza izinto ezilungileyo. Ezi zizinto ezintle nezibancedayo abantu.
9 Wena ke sukungena iingxoxo zobudenge nezeminombo yokuzalwa, nokuphikisana nokulwa ngoMthetho, kuba ezo zinto azincedi nganto.+
10 Ke yena umntu oza nemfundiso eyahlukileyo+ mnqande* kube kabini,+ emva koko kungabikho nto ikudibanisa naye,+
11 usazi ukuba umntu onjalo ulushiyile ukholo, uyona, yaye uzigwebe ngokwakhe.
12 Xa ndithumele uArtemas okanye uTikiko+ kuwe, uze uzame kangangoko ukuza kum eNikopoli, kuba ndiza kubuchitha apho ubusika.
13 Uze umlungiselele uApolo noZenas, lo uwazi kakuhle uMthetho, ukuze bangadingi nto kuhambo lwabo.+
14 Nceda nabantu bethu ukuba bafunde ukuhlala besenza izinto ezilungileyo,+ bakulungele ukukhawuleza bancede xa kukho ingxaki, ukuze bahlale bevelisa isiqhamo.+
15 Bayabulisa bonke aba bakunye nam. Ndibulisele apho kwamanye amaKristu asithandayo.
Kwanga uThixo anganenzela ububele* nonke.
Umbhalo osemazantsi
^ Okanye “babe nengqiqo; bayekelele.”
^ Okanye “ububele obungasifanelanga.”
^ Okanye “mlumkise.”
^ Okanye “ububele obunganifanelanga.”
