Ne fai eiloa ne Ieova a te Atua te avaga muamua. E fai mai te Tusi Tapu me ne faite ne ia te fafine muamua kae “aumai ei ne ia ki te tagata.” Ne fiafia malosi a Atamu telā ne fai mai ei a ia penei: “Ko fatoa maua se tino e ‵pau mo au, ko ivi mai oku ivi, ko kano mai oku kano.” (Kenese 2:22, 23) Koi manako eiloa a Ieova ke fia‵fia a tino a‵vaga.

I te taimi ne avaga ei koe, kāti ne mafaufau koe me ka ‵lei katoatoa a mea katoa. A ko te ‵tonuga loa, ke oko foki eiloa ki te tauavaga telā e alofa tonu te suā tino ki te suā tino, ka isi eiloa ne lā fakalavelave. (1 Kolinito 7:28) I te polosiua tenei, ka maua atu ei a akoakoga fakavae i te Tusi Tapu, kolā e mafai o fai ei tau avaga mo tou kāiga ke fia‵fia māfai e fakagalue faka‵lei aka ne latou.—Salamo 19:8-11.

FAKAMATALAGA MAI TE TUSI TAPU: A te tagata ko te ulu o te kāiga.—Efeso 5:23.

Kafai koe se avaga tagata, e manako eiloa a Ieova ke tausi ne koe tau avaga mo te atafai. (1 Petelu 3:7) Ne faite ne ia tou fafine mo fai tou soa kae e manako a ia ke atafai koe ki ei i te āva mo te alofa. (Kenese 2:18) E ‵tau o alofa malosi koe ki tau avaga telā ka fai ei ke loto fiafia koe o fakamuamua ana manakoga i lō koe.—Efeso 5:25-29.

Kafai koe se avaga fafine, e manako a Ieova ke āva malosi koe ki tau avaga kae fesoasoani atu ke fakataunu faka‵lei tena tulaga. (1 Kolinito 11:3; Efeso 5:33) Ke ‵lago atu ki ana fakaikuga kae fesoasoani atu mo te loto kātoa ki a ia. (Kolose 3:18) Kafai e fai koe penā, ka matagali eiloa koe i te kilokiloga a tau avaga mo Ieova.—1 Petelu 3:1-6.

MEA E MAFAI NE KOE O FAI:

• Ke fesili atu ki tau avaga me ne a auala e mafai ei o momea aka tou ‵lei e pelā me se avaga. Fakalogologo faka‵lei, kae fakaoti ou mafi ke momea aka tou ‵lei

• Ke loto kufaki. E manakogina se taimi ke fakamasani koulua o fakatau fakafiafia te suā tino ki te suā tino

FAKAMATALAGA MAI TE TUSI TAPU: E ‵tau o kilokilo koe ki manakoga o tau avaga. (Filipi 2:3, 4) Ke fakatāua malosi ne koe tau avaga, kae masaua me e manako a Ieova ke fakaasi atu ne ana tavini a te “uiga filemu ki tino katoa.” (2 Timoteo 2:24) “A muna kolā e sona fai fua e mafai o fakapakia ne ia te tino e pelā mo te pelu, ka ko muna kolā e fai mo te mafaufau e mafai o fakasao ne ia te tino.” Tela la, filifili faka‵lei au pati. (Faataoto 12:18) Ka fesoasoani atu te agaga o Ieova ke faipati atu koe i te atafai mo te alofa.—Kalatia 5:22, 23; Kolose 4:6.

MEA E MAFAI NE KOE O FAI:

• ‵Talo atu mō se fesoasoani ke fakatumau te uiga filemu, kae ke toka o talia a nisi manatu a koi tuai o sau‵tala ki se mataupu tāua mo tau avaga

• Mafaufau faka‵lei ki au pati mo te auala ka fai atu ei

FAKAMATALAGA MAI TE TUSI TAPU: Kafai ko oti koulua ne avaga, ko fai ei koulua mo tau avaga “mo foitino e tasi.” (Mataio 19:5) Kae koi fai eiloa koulua mo tino e tokolua kae e mafai foki o kese‵kese lū kilokiloga. Tela la, e ‵tau o fakamasani ke tasi koulua i lū mafaufauga mo lagonaga. (Filipi 2:2) E tāua eiloa te sau‵tala fakatasi i te taimi e fai ei a fakaikuga. E fai mai te Tusi Tapu: “Salasala ki manatu fakatonutonu ‵lei kae ka manuia koutou.” (Faataoto 20:18) Ke na takitaki koulua ne akoakoga fakavae i te Tusi Tapu i te taimi e fai fakatasi ei lū fakaikuga tāua.—Faataoto 8:32, 33.

MEA E MAFAI NE KOE O FAI:

• Ke fakaasi atu ou lagonaga ki tau avaga, e se ko fakamatalaga io me ko kilokiloga fua

• Ke fesili atu muamua ki tau avaga a koi tuai o fai au palani