Ki te Kau i Efeso 5:1-33
5 Tela la, ke fakaakoako koutou ki te Atua,+ e pelā me ne tama‵liki fagasele,
2 kae ke tumau i te sa‵sale i te alofa,+ e pelā eiloa mo te alofa o Keliso ki a tatou*+ kae tuku mai tena ola mō tatou* e pelā me se taulaga telā e manogi gali ki te Atua.+
3 Ke mo a eiloa e toe sae mai i a koutou se pati e uiga ki amioga fakatauavaga sē ‵tau* mo so se vaega o amioga lai‵lai katoa io me ko te kaimanako,+ kae ke amio e pelā me ne tino tapu;+
4 io me ko amioga fakamasiasi io me ko pati va‵lea io me ko mea fai fa‵kata ma‵sei+—ko mea kolā e se ‵tau o fai—kae ko te tukuatuga fua o pati fakafetai ki te Atua.+
5 Me e iloa ne koutou a te mea tenei, e malamalama koutou me e seai se tino e fina ki amioga fakatauavaga sē ‵tau+ io me se tino sē ‵ma io me se tino kaimanako,+ ko tena uiga se tino e ifo ki tupua, e isi sena vaega i te Malo o te Keliso mo te Atua.+
6 Ke se fakaloiloi koutou ne se tino ki pati sē aoga, me ko vaegā mea penā e fai ei ke oko atu te kaitaua o te Atua ki luga i tino sē faka‵logo penā.
7 Tela la, ke mo a ma ‵kau fakatasi mo latou;
8 me i a koutou ne ‵nofo muamua i te pouliga, kae nei ko fai koutou mo mainaga+ i te ‵kau fakatasi mo te Aliki.+ Tumau i te sa‵sale e pelā me ne tama‵liki o te mainaga,
9 me e aofia i fuataga o te mainaga a vaega katoa o te aga‵lei mo te amiotonu mo te munatonu.+
10 Ke fakamautinoa aka faeloa ne koutou a mea kolā e talia+ ne te Aliki;
11 kae fakagata te ‵kau atu ki galuega sē aoga o te pouliga;+ kae ke fakaasi faka‵sau atu olotou tulaga ‵tonu.
12 Me se mea fakamasiasi ke fakamatala atu a mea kolā e fai ‵funa ne latou.
13 A mea katoa kolā e fakaasi faka‵sau mai e lavea tonu atu i te mainaga, me i mea katoa kolā e lavea tonu atu ko te mainaga tenā.
14 Tela la, e fai mai: “Ala mai, a koe tenā e moe, tu aka mai te mate,+ kae ka maina atu a Keliso ki luga i a koe.”+
15 Tela la, ke fakaeteete faeloa koutou i te auala e sa‵sale ei koutou, e se pelā me ne tino va‵lea kae e pelā mo tino ‵poto.
16 Ke fakaaoga otou taimi* ki toe mea aoga,+ me i aso konei ko aso ma‵sei.
17 Ona ko te mea tenei, fakagata te otou va‵lea, kae fai ke iloa faeloa ne koutou me se a te loto o Ieova.*+
18 Ke se ko‵nā foki koutou i te uaina+ telā e iku atu ki te faiga o amioga ma‵sei, kae ke faka‵fonu faeloa koutou ki te agaga.
19 Ke fakatau fai‵pati koutou ki salamo, vikiga ki te Atua, mo pese faka-te-agaga, kae ke usu atu+ a pese+ fakatasi mo tavaega ki a Ieova* i otou loto,+
20 ke fakafetai atu faeloa+ ki te ‵tou Atua telā ko te Tamana mō mea katoa i te igoa o te ‵tou Aliki ko Iesu Keliso.+
21 Ke fakatau faka‵logo koutou te suā tino ki te suā tino+ i te ma‵taku ki a Keliso.
22 Ke faka‵logo a fāfine a‵vaga ki olotou avaga,+ e pelā eiloa mo te otou faka‵logo ki te Aliki,
23 me i te tagata ko te ulu o tena avaga+ e pelā eiloa mo Keliso ko te ulu o te fakapotopotoga,+ me i a ia ko te fakaola o te foitino tenei.
24 E pelā eiloa mo te fakalogo o te fakapotopotoga ki a Keliso, e penā foki a fāfine a‵vaga ki olotou avaga i mea katoa.
25 Tāgata a‵vaga, ke tumau koutou i te a‵lofa ki otou avaga,+ e pelā eiloa mo te alofa o Keliso ki te fakapotopotoga kae tuku atu tena ola mō te fakapotopotoga,+
26 ko te mea ke fakatapu ne ia, kae faka‵ma ki te vai e auala i te muna,+
27 ko te mea ke tuku atu ne ia te fakapotopotoga ki a ia eiloa i tena gali, e aunoa mo se pona io me se ila io me ko so se vaegā mea penā,+ kae e tapu e aunoa mo se lailai.+
28 I te auala tenei e ‵tau ei o a‵lofa a tāgata a‵vaga ki olotou avaga e pelā eiloa me ko olotou foitino ‵tonu. A te tagata telā e alofa ki tena avaga e alofa ki a ia eiloa,
29 me e seai se tagata kai takalialia ki tena foitino eiloa, e fagai kae e fakapelepele ne ia, e pelā foki mo te mea e fai ne Keliso ki te fakapotopotoga,
30 me i a tatou ko vaega o tena foitino.+
31 “Tenei te pogai ka tiaki ei ne te tagata tena tamana mo tena mātua, kae ka ‵piki ‵mau a ia ki* tena avaga, kae ka fai lāua mo fai se foitino e tasi.”+
32 A te mea ‵funa kae tapu tenei+ e tafasili i te tāua. Ko faipati atu au e uiga ki a Keliso mo te fakapotopotoga.+
33 E tiga te feitu tenā, e ‵tau mo koutou taki tokotasi o a‵lofa ki otou avaga+ e pelā mo koutou ki a koutou eiloa; i te suā feitu, a te fafine avaga e ‵tau o āva malosi ki tena avaga.+
Fakamatalaga mai lalo
^ Io me kāti, “koutou.”
^ Io me kāti, “koutou.”
^ Eleni, “‵togi te taimi tonu.”
^ Io me “‵nofo fakatasi mo.”