Te Tusi a Mataio 19:1-30
19 I te otiga ne faipati atu ne Iesu a mea konei, tiaki ei ne ia a Kalilaia kae ne oko atu ki te tuakoi o Iuta i te suā feitu o te Iolitana.+
2 Ne tau‵tali atu foki te vaitino i a ia, kae ne faka‵lei ne ia olotou ma‵saki i konā.
3 Kae ne olo atu a Falesaio ki a ia ke tofotofo a ia kae ne fesili atu latou: “E mata, e saoloto i te tulafono ke ‵tala ne se tagata tena avaga i so se pogai?”+
4 Ne tali atu a ia: “E a, e seki fai‵tau koutou me i te tino telā ne faite ne ia lāua mai te kamataga, ne faite ne ia te tagata mo te fafine+
5 kae fai atu: ‘Tenei te pogai ka tiaki ei ne te tagata tena tamana mo tena mātua kae ka ‵piki ‵mau a ia ki tena avaga kae ka fai lāua mo fai se foitino e tasi’?+
6 Tenā ko se tokolua ei lāua kae ko fai lāua mo foitino e tasi. Tela la, a lāua kolā ko oti ne fakatasi ne te Atua e se mafai eiloa o ‵tala ne se tino.”+
7 Ne fai atu latou ki a ia: “Kaia la ne fakatonu atu ei a Mose ke avatu ne te tagata se pepa fakamaoni ke ‵tala ei te avaga?”+
8 Ana muna ki a latou: “Ona ko te otou loto ma‵keke, ne fai ei ne Mose te fakatokaga ke mafai o ‵tala otou avaga,+ kae e se tenā eiloa te faiga i te kamataga.+
9 Au e fai atu ki a koutou, so se tagata telā e ‵tala ne ia tena avaga kae seki agasala a ia i amioga fakatauavaga sē ‵tau,* e mulilua eiloa māfai e toe avaga ki se isi fafine.”+
10 Ne fai atu ana soko ki a ia: “Kafai tenā loa te tulaga i te va o te tagata mo tena avaga, e ‵lei atu ke se a‵vaga.”
11 Ana muna ki a latou: “E se ko tino katoa e talia ne latou a pati konei, kae ko tino fua kolā ko oti ne tuku atu ki a latou te malosi ke fai penā.+
12 Me e isi ne tino* e se a‵vaga me ne fa‵nau mai eiloa penā, kae e isi ne tino e se a‵vaga me ne ‵pena ne tāgata, kae e isi ne tino e se a‵vaga ona ko te Malo o te lagi. So se tino e talia ne ia ke se avaga a ia, ke na fai eiloa penā.”+
13 Tenā ne aumai ei ki a ia a tama‵liki fo‵liki, ko te mea ke fakaeke atu ana lima ki luga i a latou kae ‵talo mō latou, kae ne ‵liko atu ana soko ki a latou.+
14 Kae ne fai atu a Iesu: “Tuku malie a tama‵liki fo‵liki, kae sa taumafai o taofi latou mai i a au, me i o tino penā a te Malo o te lagi.”+
15 Ne fakaeke atu ana lima ki luga i a latou, tiaki ei ne ia te koga tenā.
16 Kae kiloke! ne fanatu se tino ki a ia kae fai atu: “Te Faiakoga, ne a mea ‵lei e ‵tau o fai ne au ke maua te ola se-gata-mai?”+
17 Ana muna ki a ia: “Kaia e fesili mai ei koe ki a au e uiga ki mea kolā e ‵lei? E tokotasi fua te tino e ‵lei.+ Kafai e fia maua ne koe te ola, tausi faeloa ki tulafono.”+
18 Ne fesili atu te tagata ki a ia: “Ko tulafono fea?” Muna a Iesu: “E se ‵tau mo koe o tatino,+ e se ‵tau mo koe o mulilua,+ e se ‵tau mo koe o kaisoa,+ e se ‵tau mo koe o molimau ‵pelo,+
19 āva ki tou tamana mo tou mātua,+ kae e ‵tau mo koe o alofa ki tou tuakoi e pelā mo koe ki a koe eiloa.”+
20 Ne fai atu te tamataene ki a ia: “Ko oti ne fai ne au a mea katoa konei; e a, e isi aka foki se mea e seki fai ne au?”
21 Ne fai atu a Iesu ki a ia: “Kafai e manako koe ke ‵lei katoatoa koe, fano o fakatau atu au mea katoa kae tufa atu ki tino ma‵tiva, kae ka maua ne koe a koloa e uke i te lagi;+ ko vau ei koe o fai mo oku soko.”+
22 I te lagonaga ne te tamataene a te mea tenei, fano ei a ia kea‵tea mo te fanoanoa, me e uke ‵ki ana kope.+
23 Tenā ne fai atu ei a Iesu ki ana soko: “Au e fai ‵tonu atu ki a koutou, me ka faigata ke ulu atu se tagata maumea ki te Malo o te lagi.+
24 E toe fai atu au ki a koutou, e faigofie atu ke ulu se kamela i te pu o se nila i lō te ulu atu o se tagata maumea ki te Malo o te Atua.”+
25 I te lagonaga ne soko ana pati konā, ne ofo malosi latou kae fai atu: “Ko oi la e mafai o sao?”+
26 Ne kilo ‵tonu atu a Iesu ki a latou kae fai atu: “E se mafai ne tāgata o fai te mea tenei, kae e mafai ne te Atua o fai a mea katoa.”+
27 Tenā ne fai atu ei a Petelu: “Kiloke! Ko oti ne tiaki ne matou a mea katoa kae tau‵tali atu i a koe; ne a la mea ka maua ne matou?”+
28 Muna a Iesu ki a latou: “Au e fai ‵tonu atu ki a koutou, i te taimi e toe faite ei a mea, māfai ko sagasaga te Tama a te tagata ki lalo i tena nofogaaliki ‵malu, a koutou kolā ne tau‵tali mai i a au ka saga‵saga i nofogaaliki e 12, o fakamasino a matakāiga e 12 o Isalaelu.+
29 Kae ko tino katoa kolā ne tiaki olotou fale io me ko olotou taina io me ko tuagane io me ko tamana io me ko mātua io me ko tama‵liki io me ko manafa ona ko toku igoa, ka maua ne latou fakaselau taimi a mea konā kae ka maua foki te ola se-gata-mai.+
30 “Kae ko tino e tokouke kolā ne ‵mua ka faka‵muli kae ko tino kolā ne faka‵muli ka ‵mua.+
