Ki te Kau i Kalatia 6:1-18
6 Oku taina, kafai e seke te auala o se tino kae koi tuai o iloa ne ia, ko koutou kolā ko ma‵tua ‵lei i te feitu faka-te-agaga ke taumafai o fakatonutonu aka te tino tenā i te agaga o te agamalu.+ Kae ke fakaeteete faeloa i a koutou+ ma fakaosoosogina foki.+
2 Ke tumau i te fakatau amo otou amoga ‵mafa,+ i te auala tenei ka fakataunu ei ne koutou a te tulafono a Keliso.+
3 Me kafai e mafaufau se tino i a ia e tāua kae tela la e seai sena aoga,+ ko fakaloiloi ne ia a ia eiloa.
4 Kae ke iloilo ifo a tino taki tokotasi ki ana galuega eiloa,+ kae ka isi se pogai ke fiafia ei a ia e uiga ki a ia eiloa, kae ke mo a ma fakatautau ki se isi tino.+
5 Me e amo eiloa ne te tino tena amoga.*+
6 E se gata i ei, ke ‵kau fakatasi a te tino telā e akoako* atu ki ei te muna mo te tino telā e akoako* atu ne ia i te faiga o mea ‵lei katoa.+
7 Ke se fakaloiloigina koutou: e seai se tino e mafai o fakavalea ne ia te Atua. Me ko so se mea e ‵toki ne se tino, ka tau eiloa ne ia te mea tenā;+
8 me ko te tino telā e ‵toki ne ia a mea mō tena foitino ka tau ne ia a mea ma‵sei mai tena foitino, ka ko te tino telā e ‵toki ne ia a mea mō te agaga ka tau ne ia te ola se-gata-mai mai te agaga.+
9 Tela la, ke mo a ma ‵fiu tatou i te faiga o mea ‵lei, me ka tau eiloa ne tatou a mea ‵lei i te taimi tonu māfai e se ‵fiu tatou.+
10 Tela la, kae koi maua ne tatou te avanoaga, ke na ga‵lue tatou o fai a mea ‵lei mō tino katoa, kae maise eiloa ki a latou kolā e kāiga tatou i te tapuakiga tonu.
11 Onoono ki mataimanu ‵lasi i te tusi tenei me ne tusi atu ne au ki a koutou i toku lima eiloa.
12 A tino katoa kolā e ma‵nako o ‵tu i se tulaga ‵lei i te feitu faka-te-foitino* ko latou kolā e taumafai o faimālō koutou ke pilitome, e fai fua ne latou a te mea tenā ko te mea ke se fakasauagina latou mō te pou fakasaua* o te Keliso.
13 Me e se tausi ne tino kolā e pilitome a te Tulafono,+ kae e ma‵nako fua latou ke pilitome koutou ko te mea ke isi se pogai e fai‵pati fakamata‵mata ei latou e uiga ki a koutou.
14 Kae ke se faipati fakamatamata eiloa au ki se mea, kae na ko te pou fakasaua* o te ‵tou Aliki ko Iesu Keliso,+ telā e auala i ei ne tamate* ei te lalolagi i taku kilokiloga, kae penā foki te lalolagi ki a au.
15 Me e se tāua a te pilitome io me ko te sē pilitome,+ kae ko te mea fou telā ne faite ne te Atua.+
16 Kae ko latou katoa kolā e sa‵sale ‵tonu i te tulafono tenei e uiga ki amioga, ke i luga i a latou a te filemu mo te alofa fakamagalo, ao, ke i luga i te Isalaelu a te Atua.+
17 Tela la, ke se toe fakatupu ne se tino se fakalavelave ki a au mai te taimi nei o fano ki mua, me e tauave ne au i toku foitino a fakailoga o toku fai mo fai se pologa a Iesu.+
18 Ke i luga i a koutou a te alofa tauanoa o te ‵tou Aliki ko Iesu Keliso i te agaga telā e fakaasi mai ne koutou, e oku taina. Amene.
Fakamatalaga mai lalo
^ Io me “amoga o tiute.”
^ Io me “akoako gutu.”
^ Io me “akoako gutu.”
^ Io me “kolā e ma‵nako ke ‵lei olotou foliga i tua.”
^ Io me “tamate i luga i te pou.”
