Te Tusi ki te Kau i Kolose 3:1-25
3 Kae kafai la ne toe faka‵tu aka koutou fakatasi mo Keliso,+ ‵sala atu faeloa ki mea i te lagi, ko te koga telā e nofo i ei a Keliso i te feitu fakaatamai o te Atua.+
2 Ke tuku tonu faeloa otou mafaufau ki mea i te lagi,+ kae e se ki mea i te lalolagi.+
3 Me i a koutou ne ‵mate kae ko oti ne ‵funa aka otou ola i loto i a Keliso i te ‵kau fakatasi mo te Atua.
4 Kafai e fakaasi mai a Keliso, telā ko te ‵tou ola,+ ka fakaasi mai foki koutou fakatasi mo ia i te ‵malu.+
5 Tela la, ke tamate a vaega katoa o otou foitino+ i te lalolagi nei e uiga ki amioga fakatauavaga sē ‵tau,* amioga lai‵lai, te fina ki manakoga fakatauavaga sē pulea,+ manakoga faka‵mae loto, mo te kaimanako telā ko te ifo ki tupua.
6 Ka oko mai eiloa te kaitaua o te Atua ona ko mea konā.
7 Ko mea eiloa konā ne fai sāle ne koutou i otou olaga mua.+
8 Kae nei la, e ‵tau mo koutou o tapale kea‵tea a mea katoa konā mai i a koutou: te kaitaua, te loto ita, amioga ma‵sei,+ pati faka‵mae loto,+ mo pati ma‵sei+ mai i otou gutu.
9 Ke mo a ma loi te suā tino ki te suā tino.+ ‵Pei kea‵tea a uiga* mua+ mo olotou faifaiga ma‵sei,
10 kae fakapei ki luga i a koutou a uiga ‵fou,+ kolā ne faka‵fou e auala i te iloaga tonu e ‵tusa mo foliga o te Atua telā ne faite ne ia,+
11 tela la, e seai se ‵kese o te tino Eleni mo te tino Iutaia, se tino pilitome io me se tino seki pilitome, se tino fakaalofa, se tino Sekutia,* se pologa io me se tino saoloto, kae ko te Keliso ko te katoaga o mea katoa kae iai foki a mea katoa i a ia.+
12 Tela la, e pelā me ne tino filifilia a te Atua,+ e tapu kae alofagina, ke fakapei ki luga i a koutou a te alofa atafai,+ te atafai, te loto maulalo,+ te agamalu+ mo te kufaki.+
13 Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino+ māfai e isi se pogai e fameo ei se tino ki te suā tino.+ E pelā eiloa mo te fakamagaloga o koutou ne Ieova,* e ‵tau foki mo koutou o fai penā.+
14 Kae i tafa o mea katoa konei, ke fakapei ki luga i a koutou a te alofa,+ me tenā eiloa te fusi ‵lei katoatoa telā e fai ei ke ‵kau fakatasi a tino.+
15 E se gata i ei, ke talia ne koutou ke pule atu te filemu o Keliso ki otou loto,+ me ne kalagagina eiloa koutou ki te filemu tenā i te foitino e tasi. Kae ke fakaasi atu te otou loto fakafetai.
16 Ke nofo i a koutou a te muna a Keliso ko te mea ke kātoa i a koutou te poto. Tumau i te akoako kae fakamalosi atu te suā tino ki te suā tino i te usuga o salamo,+ vikiga ki te Atua, ko pese faka-te-agaga kolā e usu atu mo te loto fakafetai, kae ke usu atu mo otou loto kātoa ki a Ieova.*+
17 So se mea e fai ne koutou i otou pati io me ko otou faiga, ke fai a mea katoa i te igoa o te Aliki ko Iesu, o fakafetai atu ki te Atua te Tamana e auala i a ia.+
18 A koutou e fāfine a‵vaga, ke faka‵logo koutou ki otou avaga+ me tenā te mea e ‵tau o fai ne soko o te Aliki.
19 A koutou e tāgata a‵vaga, ke a‵lofa faeloa ki otou avaga+ kae ke mo a ma tō kaitāua malosi ki a latou.+
20 A koutou e tama‵liki, ke faka‵logo ki otou mātua i mea katoa,+ me e fakafiafia malosi atu a te mea tenei ki te Aliki.
21 A koutou e tamana, sa fakaitaitagina otou tama‵liki+ ko te mea ke se loto vāi‵vai latou.
22 A koutou e pologa, faka‵logo ki otou matai faka-te-foitino i mea katoa,+ e se i taimi fua e onoono mai ei latou, ko te mea fua ke fakafiafia atu ki tino, kae i te loto fakamaoni mo te mataku ki a Ieova.*
23 I so se mea e fai ne koutou, fai mo te loto kātoa e pelā eiloa me fai ne koutou mō Ieova,*+ kae e se mō tino,
24 me e iloa ne koutou me ka maua ne koutou mai i a Ieova* te tofi telā ko te otou taui.+ Ke pologa mō te Matai, telā ko Keliso.
25 Se mea tonu me i te tino telā e fai ne ia se mea ‵se ka toe maua eiloa ne ia te ‵togi o tena mea ‵se ne fai,+ me i te Atua e se fakailoga tino.+