Te Tusi Muamua ki te Kau Kolinito 11:1-34
11 Fakaakoako mai ki a au e pelā mo au e fakaakoako ki a Keliso.+
2 E fakamālō atu au ki a koutou me e masaua ne koutou au i mea katoa kae e puke ‵mau koutou ki mea kolā ne tuku atu ne au ki a koutou.
3 Kae e manako au ke iloa ne koutou me i te ulu o tāgata katoa ko te Keliso;+ a te ulu o te fafine ko te tagata;+ a te ulu o te Keliso ko te Atua.+
4 So se tagata telā e ‵talo io me e ‵valo kae e pulou tena ulu e fakamasiasi eiloa ne ia tena pule;
5 kae ko so se fafine telā e ‵talo io me e ‵valo+ kae e se pulou tena ulu e fakamasiasi eiloa ne ia tena pule,* me e ‵pau eiloa a ia mo se fafine ne ‵vele ke ‵kila tena ulu.
6 Kafai se fafine e se pulou tena ulu, e ‵tau o ‵kati ana laulu kea‵tea; kae kafai e fakamasiasi ki te fafine ke ‵kati ana laulu io me e ‵vele ke ‵kila tena ulu, e ‵tau o pulou tena ulu.
7 Me e se ‵tau o pulou te ulu o te tagata i a ia ko te fakatusa+ mo te ‵malu o te Atua, kae ko te fafine ko te ‵malu o te tagata.
8 Me i te tagata ne seki vau mai i te fafine, kae ko te fafine ne vau mai i te tagata.+
9 E se gata i ei, ne seki faite te tagata mō te fafine, kae ko te fafine ne faite mō te tagata.+
10 Tenā te pogai e ‵tau ei o isi se fakailoga o te pulega i luga i te ulu o te fafine ona ko te kau agelu.+
11 Tela la, a latou kolā e fai pelā me ne soko o te Aliki, e se mafai o māvae te fafine mo te tagata io me e se mafai o māvae te tagata mo te fafine.
12 Me e pelā eiloa mo te fafine ne faite mai te tagata,+ e penā foki te tagata ne māfua mai e auala i te fafine; kae ko mea katoa ne aumai mai i te Atua.+
13 Filifili aka i a koutou eiloa: E a, se mea ‵tau ke ‵talo te fafine ki te Atua kae e se pulou tena ulu?
14 E a, e seki akoako koutou ne mea masani me i te faka‵loa o laulu se mea fakalumalumagina ki te tagata,
15 kae kafai e ‵loa te ulu o te fafine, e a, e se fakaaloalogina a ia? Me ne tuku atu ki a ia ana laulu i lō te pulou.
16 Kae kafai e kinau mai se tino me e ‵lei atu se isi faifaiga, e seai aka foki se isi faifaiga e iloa ne matou, e penā foki mo fakapotopotoga a te Atua.
17 Kae i te taimi e tuku atu ei ne au a fakatonuga konei, e se fakamālō atu au ki a koutou, me i te otou maopoopo fakatasi e se maua mai i ei te ‵lei kae e fai fua i ei ke na masei atu.
18 Muamua la, ne logo au me kafai e maopoopo fakatasi koutou i se fakapotopotoga, e isi ne mavae‵vaega i a koutou; kae kāti e talitonu au ki ei.
19 E mautinoa me ka ‵sae aka a tamā potukau fakalotu mai i a koutou,+ ko te mea ke fakaasi faka‵lei mai ei a tino kolā e talia ne te Atua mai i a koutou.
20 Kafai e maopoopo koutou ki se koga e tasi, e se maopoopo koutou ke ‵kai i te ‵Kaiga a te Aliki i te Afiafi.+
21 Me i te taimi e ‵kai ei koutou ki ei kae ko leva ne ‵kai a tino taki tokotasi i tena ‵kaiga i te afiafi, tela la, ko fiakai te tino e tokotasi kae ko konā te suā tino.
22 E a, e seai ne otou fale e ‵kai kae inu koutou i ei? Io me e takalia‵lia koutou ki te fakapotopotoga a te Atua kae fai a tino kolā e seai ne olotou mea ke masiasi? Ne a aku pati ka fai atu ki a koutou? E a, ka fakamālō atu au ki a koutou? E se fakamālō atu au ki a koutou i te mea tenei.
23 Me i te mea ne maua ne au mai i te Aliki ne tuku atu foki ne au ki a koutou, me ne puke ne te Aliki ko Iesu te falaoa i te po+ telā ka fakatogafiti ei a ia,
24 kae i te otiga ne fai te fakafetai, ne tofitofi ne ia te falaoa kae fai atu: “E fakauiga te mea tenei ki toku foitino+ telā ka tuku atu mō koutou. Ke fai faeloa te mea tenei mo fai se fakamasauaga ki a au.”+
25 E penā foki tena faiga ki te ipu+ i te otiga o te lotou ‵kaiga i te afiafi, ana muna: “E fakauiga a te ipu tenei ki te feagaiga fou+ e auala i toku toto.+ Ke fai faeloa te mea tenei i so se taimi e inu ei koutou, mo fai se fakamasauaga ki a au.”+
26 Me i so se taimi e ‵kai ei koutou ki te falaoa kae inu ki te ipu tenei, e folafola atu faeloa i ei ne koutou te mate o te Aliki ke oko eiloa ki tena oko mai.
27 Tela la, so se tino e kai ki te falaoa kae inu ki te ipu a te Aliki i se auala sē ‵tau ka agasala eiloa a ia ki te foitino mo te toto o te Aliki.
28 E ‵tau o iloilo muamua ne te tino a ia eiloa+ ke fakamautinoa aka me e ‵tau o kai kae inu a ia, ko mafai ei a ia o kai ki te falaoa kae inu ki te ipu.
29 Me i te tino telā e kai kae inu e aunoa mo te iloiloga o te foitino ko kai kae inu ki tena fakamasinoga.
30 Tenā te pogai e vāi‵vai kae ma‵saki ei a tino e tokouke i a koutou, kae e tokouke foki ko oti ne ‵moe i te mate.*+
31 Kae kafai e mafai o malamalama tatou i mea e ‵tau o fai ne tatou, ka se fakamasinogina tatou.
32 Kae kafai e fakamasinogina tatou, e polopoloki tatou ne Ieova,*+ ko te mea ke se fakasala fakatasi tatou mo te lalolagi.+
33 Tela la, e oku taina, kafai e maopoopo koutou o ‵kai ki ei, faka‵tali ke oko atu a tino katoa.
34 Kafai e fiakai se tino, e ‵tau mo ia o kai i tena fale, ko te mea kafai e maopoopo koutou, ke se fai te mea tenā mo mea e fakamasino ei koutou.+ Ka fakatonutonu aka ne au a nisi mea māfai e oko atu au ki konā.
