I te taimi ne fai ei ne Ieova a te fakatokaga o te kāiga, ne ‵tofi aka ne Ia a mātua ke pule atu ki olotou tama‵liki. (Kolose 3:20) Ko tou tiute eiloa e pelā me se mātua ke akoako tau tama ke alofa ki a Ieova kae ke fai mo fai se tino matua telā e fakatuagagina. (2 Timoteo 1:5; 3:15) E ‵tau o fakamasani koe ke iloa atu a mea i te loto o tau tama. E tonu, e tāua ‵ki eiloa tau fakaakoakoga. A te ‵toe auala ‵lei ke akoako atu te Muna a te Atua ki tau tama ko te taumafai ke mo a ma puli a fakatonuga konā i te loto.—Salamo 40:8.

FAKAMATALAGA MAI TE TUSI TAPU: “Vave o fakalogologo, kae fakatuai o fai‵pati.” (Iakopo 1:19) E manako koe ke maua ne au tama‵liki a te lagonaga me e mafai ne latou o fai‵pati atu ki a koe i so se taimi. E ‵tau o iloa ne latou me e toka koe o fakalogologo i te taimi ko ‵tau ei o fai‵pati latou. Ke ati aka se va filemu mo latou ko te mea ke faigofie o fakaasi atu olotou lagonaga. (Iakopo 3:18) Kafai e mafau‵fau latou me ka uiga faigata io me ka fakamasino aka ne koe latou, ka se mafai ne latou o fakaasi ‵tonu atu olotou lagonaga ki a koe. Ke fakaasi atu te loto kufaki ki au tama‵liki, kae fakatalitonu atu faeloa me e alofa malosi koe ki a latou.—Mataio 3:17; 1 Kolinito 8:1.

MEA E MAFAI NE KOE O FAI:

• Fai ke avanoa faeloa koe māfai ko fia fai‵pati atu au tama‵liki

• Ke sau‵tala faeloa mo au tama‵liki, e se ko taimi fua kolā e isi ei ne fakalavelave

FAKAMATALAGA MAI TE TUSI TAPU: “Saga tonu ki akoakoga e avatu ki a koutou kae ka manuia koutou.” (Faataoto 16:20) I nisi taimi, e mafai o se saga tonu atu koe ki pati takitasi e fai atu ne au tama‵liki ko te mea ke malamalama koe i olotou lagonaga ‵tonu. E masani eiloa o fakalasi‵lasi io me e fai atu ne tama‵liki a mea kolā e se fakauiga ‵tonu latou ki ei. “Fakalogologo muamua koi tuai o fai tau tali. Kafai e se fakalogo mua koe ko tena uiga koe e supa kae valea.” (Faataoto 18:13) Sa ita vave.—Faataoto 19:11.

MEA E MAFAI NE KOE O FAI:

• Faitalia me ne a pati e fai atu ne au tama‵liki, sa oso vave atu io me kaitaua vave

• Taumafai ke masaua ne koe ou lagonaga i te taimi ko penā foki ei tou matua mo mea kolā ne foliga mai me e tāua atu ki a koe

FAKAMATALAGA MAI TE TUSI TAPU: “Taku tama, saga ki muna a tou tamana mo tou mātua.” (Faataoto 1:8) Ne ‵tofi aka ne Ieova a te tamana mo te mātua ke pule atu ki tama‵liki. E ‵tau o akoako ne koe au tama‵liki ke āva kae faka‵logo ki a koe. (Efeso 6:1-3) E mafai o iloa ne tama‵liki māfai olotou mātua ko se ‘tasi i lā mafaufau.’ (1 Kolinito 1:10) Kafai e se lotoma‵lie koulua, taumafai ke se fakaasi atu i mua o au tama‵liki ona ko te mea e mafai o fakaseaoga ei te lotou āva ki a koulua e pelā me ne mātua.

MEA E MAFAI NE KOE O FAI:

• Sau‵tala kae ke lotoma‵lie ki te auala ka polopoloki aka ei lū tama‵liki

• Kafai e ‵kese tau kilokiloga mo tau avaga ki te auala e akoako ei a lū tama‵liki, taumafai ke malamalama i te kilokiloga a tau avaga

FAKAMATALAGA MAI TE TUSI TAPU: “Akoako atu ki te tamaliki te mea e ‵tau o fai ne ia e ola ei a ia, kae ka masaua faeloa ne ia i tena olaga kātoa.” (Faataoto 22:6) A te manuia o koulua i te akoakoga o lū tama‵liki ka se tupu fakafuasei. E ‵tau o isi se fakatokaga ki te faiga o akoakoga, telā e aofia i ei a te polopolokiga o au tama‵liki. (Salamo 127:4; Faataoto 29:17) E se fakauiga fua a te faiga o polopolokiga ki te fakasalaga, kae e aofia i ei a te fesoasoani atu ki au tama‵liki ke malamalama i pogai o tulafono. (Faataoto 28:7) Ke akoako atu foki latou ke a‵lofa ki te Muna a Ieova kae ke malamalama i ana akoakoga fakavae. (Salamo 1:2) Ka fesoasoani atu te mea tenei ke ati aka se loto lagona malosi.—Epelu 5:14.

MEA E MAFAI NE KOE O FAI:

• Ke fakamautinoa aka me e ‵kilo atu au tama‵liki ki te Atua e pelā me se Tino tonu telā e mafai o tali‵tonu latou ki ei

• Fesoasoani atu ke fakamasani latou ke iloa kae ‵kalo keatea mai i tulaga fakama‵taku i mea tau amioga, e pelā mo mea kolā e maua atu i te Itaneti mo polokalame kolā e fai ei a fesokotakiga. Akoako latou ke ‵kalo keatea mai i tino kolā e maneanea ne latou a tino i faifaiga fakatauavaga