Te Lua o Tusi ki a Timoteo 2:1-26
2 Tela la, e taku tama,+ fai ke maua faeloa ne koe te ‵mana e auala i te alofa tauanoa telā e maua i a Keliso Iesu;
2 mo mea kolā ne lagona ne koe mai i a au kae ‵lago atu ki ei a molimau e tokouke,+ ke tuku atu a mea konei ki tāgata fakamaoni kolā ka fetaui ‵lei o akoako a nisi tino.
3 E pelā me se sotia ‵lei+ a Keliso Iesu, ke toka koe o talia a logo‵maega.+
4 E seai se tagata e fai mo fai se sotia e aofia* i mea fakapisinisi* o te olaga nei, ko te mea ke talia a ia ne te tino telā ne ‵tofi ne ia a ia mo fai se sotia.
5 E pelā foki i tafaoga, so se tino e fakatau‵fai i ei, e se mafai o maua sena failoga* vagana ke tafao a ia e ‵tusa mo tulafono o te tafaoga.+
6 A te tino fai fatoaga telā e galue malosi ko te tino muamua e ‵tau o kai ki fuataga o ana lakau.
7 Mafaufau faeloa ki aku pati; ka tuku atu ne te Aliki ki a koe a te malamalama i mea katoa.
8 Ke masaua i a Iesu Keliso ne toe fakatu aka mai te mate+ kae ko te tama* a Tavita,+ e ‵tusa mo te tala ‵lei e talai ne au,+
9 telā e logo‵mae ei au kae ‵pei ki te falepuipui e pelā me se tino amio masei.+ E tiga te feitu tenā, a te muna a te Atua e se mafai o pikifao.+
10 Ona ko te pogai tenei e fa‵ki faeloa au i mea katoa ona ko tino filifilia,+ ko te mea ke maua foki ne latou te fakaolataga e auala i a Keliso Iesu, fakatasi mo te ‵malu se-gata-mai.
11 E tonu eiloa te fakamatalaga tenei: E mautinoa me kafai e ‵mate fakatasi tatou, ka ola fakatasi foki tatou;+
12 Kafai e tumau tatou i te kufaki, ka pule fakatasi foki tatou e pelā me ne tupu;+ kafai e fakafiti ne tatou, ka fakafiti foki ne ia tatou;+
13 kafai e se fakamaoni tatou, e tumau a ia i te fakamaoni, me e se mafai o fakafiti ne ia a ia eiloa.
14 Ke fakamasaua atu faeloa ki a latou a mea konei, akoako* latou i mua o te Atua ke mo a ma kinau ki uiga o pati, se mea telā e seai sena aoga me e fakamasei* atu fua ki tino fakalogo‵logo.
15 Fakaoti ou mafi ke tuku atu koe e pelā me se tino ko talia ne te Atua, se tino galue e aunoa mo te mā i so se mea, kae e akoako ‵tonu eiloa ne koe te munatonu.+
16 Kae ‵teke ki pati sē aoga kolā e fakamasei atu ki mea tapu,+ me ka iku atu a mea konā ki te faiga o amioga sē amioatua e uke atu,
17 kae ka salalau atu olotou pati konā e pelā mo te masaki ko te ‵pala. A Humenio mo Fileto e aofia i a latou.+
18 A tāgata konei ko ‵sipa kea‵tea mai te munatonu, kae fai mai me i te toetu ko oti ne kamata,+ kae ko fakamasei foki ne latou te fakatuanaki o nisi tino.
19 E tiga te feitu tenā, e tu ‵mautakitaki eiloa te fakavae o te Atua, kae tenei tena fakamailoga, “E iloa ne Ieova* ana tino,”+ kae, “Ko latou kolā e ka‵laga ki te igoa o Ieova*+ ke tiakina ne latou a amioga ma‵sei.”
20 E tuku i loto i se fale lasi e tasi a meāfale e se faite fua ki aulo mo siliva kae faite foki ki lakau mo te kele, a nisi meāfale ne faite mō se pogai aoga kae ko nisi meāfale mō se pogai sē aoga.
21 Tela la, kafai e ‵kalo kea‵tea se tino mai i meāfale sē aoga, ka fai a ia mo fai se mea faigaluega* aoga, e fakatapugina, e aoga ki tena matai, e toka mo so se galuega ‵lei.
22 Tela la, ‵tele kea‵tea mai manakoga masani o talavou, kae kausaki atu ki te amiotonu, te fakatuanaki, te alofa, te filemu, fakatasi mo latou kolā e ka‵laga atu ki te Aliki mo te loto ‵ma.
23 E se gata i ei, ‵teke atu ki kinauga va‵lea kae e se aoga,+ me iloa ne koe me e ‵tupu fua i ei a taua.
24 Me i te pologa a te Aliki e se ‵tau o kinau, kae e ‵tau o uiga filemu* ki tino katoa,+ e fetaui ‵lei ke akoako atu, e fakaasi te kufaki i mea ‵se e fai atu ki a ia,+
25 e akoako atu mo te agamalu ki tino kolā e se fia‵fia.+ E se taumate e mafai ne te Atua o tuku atu ki a latou a te loto salamō* e takitaki ei latou ki te iloaga tonu o te munatonu,+
26 kae e mafai o toe maua ne latou te mafaufau ‵lei kae ‵tele ke ‵sao mai te malei a te Tiapolo, me ne ‵po eiloa ne ia latou ke fai tena loto.+
Fakamatalaga mai lalo
^ Eleni, “e ‵numi.”
^ Io me kāti, “ko faifaiga i aso takitasi.”
^ Eleni “kalauna.”
^ Eleni, “se fanau a Tavita.”
^ Eleni, “molimau maea atu ki.”
^ Io me “‵fuli fakakotua.”
^ Io me “se meāfale; se ipu.”
^ Io me “apo.”
^ Io me “‵fuli te mafaufau.”