E tiga eiloa e taumafai malosi koe ke maua se avaga mo se kāiga fiafia, e mafai eiloa o ‵tupu a mea kolā e seki fakamoemoegina kae e fakafaigata aka ei ke fakatumau tou fiafia. (Failauga 9:11) E tuku mai eiloa ne te Atua mo te alofa a te fesoasoani i te taimi ko fe‵paki ei tatou mo mea faiga‵ta. Kafai e fakagalue aka ne koe a akoakoga fakavae i te Tusi Tapu, ka mafai ei ne koe mo tou kāiga o fa‵ki, kae ke oko atu foki eiloa ki toe tulaga faiga‵ta.

FAKAMATALAGA MAI TE TUSI TAPU: “Ke ‵pei atu ki luga i a ia a mea katoa e manava‵se ei koutou, me e atafai eiloa a ia ki a koutou.” (1 Petelu 5:7) Masaua me e se ko te Atua e ‵tau o ‵losi atu ki ei ou fakalavelave. (Iakopo 1:13) I te taimi e fakapilipili atu ei koe ki a ia, ka fesoasoani atu a ia ki a koe i te ‵toe auala ‵lei. (Isaia 41:10) “Taku atu ki a ia otou puapuaga katoa.”—Salamo 62:8.

Ka maua foki ne koe a fakamafanafanaga i te taimi e faitau kae sukesuke ei koe ki tau Tusi Tapu i aso katoa. Ka lagona ei ne koe a te auala “telā e fakamafanafana mai [a Ieova ki a tatou i o‵tou] puapuaga katoa.” (2 Kolinito 1:3, 4; Loma 15:4) E folafola mai a ia ke tuku atu ki a koe “te filemu o te Atua telā e sili fakafia atu i mea katoa kolā e malamalama i ei.”—Filipi 4:6, 7, 13.

MEA E MAFAI NE KOE O FAI:

• ‵Talo mō te fesoasoani o Ieova ke mo a ma manavase vave koe kae ke mafaufau faka‵lei

• Mafaufau ki mea katoa e mafai o fai ne koe kae filifili aka te ‵toe auala ‵lei e avanoa ki a koe

FAKAMATALAGA MAI TE TUSI TAPU: “A tino ‵poto e ma‵nako faeloa o tauloto kae a‵koga.” (Faataoto 18:15) Ke ‵sala atu ki fakamatalaga ‵tonu katoa. Ke onoono aka me ne a mea e manakogina ne tino katoa o tou kāiga. Faipati atu ki a latou. Fakalogologo ki a latou.—Faataoto 20:5.

Kae e a māfai ko mate se tino pele? Sa mataku o fakaasi atu ou lagonaga ‵tonu. Masaua me i a Iesu ne “tagi.” (Ioane 11:35; Failauga 3:4) A te lava o te malōlō mo te moe e aoga foki. (Failauga 4:6) Ka fai ne te mea tenei ke faigofie koe o fakafesagai atu ki se tulaga faigata.

MEA E MAFAI NE KOE O FAI:

• A koi tuai o fepaki koe mo se tulaga faigata, ke fakamasani o fesokotaki atu ki tou kāiga. Kafai e ‵sae aka a fakalavelave, ka se ma‵taku latou o fai‵pati atu ki a koe

• Faipati atu ki nisi tino kolā ne fe‵paki foki mo se fakalavelave tai ‵pau

FAKAMATALAGA MAI TE TUSI TAPU: “A takaga e masani o fia‵fia fakatasi kae fakatau a‵lofa. A taina e ‵tau o fakatau fesoasoani i taimi o fakalavelave.” (Faataoto 17:17) Ka fia fesoasoani atu ou taugasoa ki a koe, kae kāti e se iloa ne latou a mea e ‵tau o fai. Ke na fakaasi atu ki a latou a mea e manako tonu koe ki ei. (Faataoto 12:25) ‵Sala atu foki ki se fesoasoani i te feitu faka-te-agaga mai tino kolā e malamalama i te Tusi Tapu. Ka fesoasoani atu ki a koe a fakatakitakiga kolā e mafai o tuku atu ne latou mai te Tusi Tapu.—Iakopo 5:14.

Ka maua eiloa ne koe a te fesoasoani māfai e kau atu faeloa koe ki tino kolā e fakatuanaki tonu ki te Atua kae tali‵tonu ki ana folafolaga. Ka maua foki ne koutou a te fakamafanafanaga māfai e fesoasoani atu ki nisi tino kolā e ma‵nako ki fakamalosiga. Ke fakaasi atu ki a latou tou fakatuanaki ki a Ieova mo ana folafolaga. Ke fakalavelave faeloa i te fesoasoani atu ki nisi tino, kae sa ‵vae keatea mai i tino kolā e a‵lofa kae atafai ki a koe.—Faataoto 18:1; 1 Kolinito 15:58.

MEA E MAFAI NE KOE O FAI:

• Faipati atu ki se taugasoa pili kae ke talia tena fesoasoani

• Fakaasi ‵tonu atu mo te fakamaoni a mea e manako koe ki ei