Te Tusi Muamua ki te Kau Kolinito 7:1-40
7 E pelā mo mea kolā ne tusi mai ne koutou, se mea ‵lei ke mo a ma puke* se tagata ki se fafine;
2 kae ona ko te salalau o amioga fakatauavaga sē ‵tau, ko ‵tau ei mo tāgata taki tokotasi o a‵vaga,+ e pelā foki mo fāfine.+
3 Ke tuku atu ne te tagata ki tena avaga a te mea e ‵tau* o tuku ki ei, kae e penā foki te fafine ki tena avaga.+
4 E se pule te fafine i luga i tena foitino, kae ko tena avaga, e penā foki te tagata, e seai sena pule i luga i tena foitino, kae ko tena avaga.
5 Ke mo a ma se amanaia te suā tino ki te suā tino seiloga ko lotoma‵lie koulua ke se fai penā i se vaitaimi, ko te mea ke fakaaoga te taimi mō te faiga o ‵talo, ko toe fakatasi ei koulua, ko te mea ke mo a ma tofotofo faeloa koulua ne Satani ona ko te sē lava o te loto pulea.
6 E fai atu ne au a te mea tenei o fesoasoani atu ki a koutou kae e se fai pelā me se fakatonuga.
7 Aku muna eiloa ko tāgata katoa ke fai penei mo au. E tiga te feitu tenā, e tofu te tino mo tena meaalofa+ mai te Atua, e tasi ko te mea tenei, kae ko te suā tino ko te mea tenā.
8 Nei la, ko fai atu au ki tino seki a‵vaga mo fāfine ko ‵mate olotou avaga me e ‵lei atu ke ‵nofo latou e penei mo au.+
9 Kae kafai e seai se loto pulea i a latou, fai la ke a‵vaga latou, me e ‵lei atu ke a‵vaga i lō te ‵fonu o latou i manakoga penā.+
10 E tuku atu ne au a fakatonuga konei ki tino a‵vaga, e se i a aku kae i a te Aliki, me e se ‵tau o mavae te fafine mo tena avaga.+
11 Kafai e mavae lāua, e se ‵tau a ia o toe avaga kae e mafai o toe faka‵lei lāua mo tena avaga; kae e se ‵tau o tiaki ne te tagata tena avaga.+
12 Kae e fai atu au ki nisi tino, ao, ko au, kae e se ko te Aliki:+ Kafai se taina e avaga ki se fafine sē talitonu kae e lotomalie tou fafine ke ‵nofo fakatasi lāua, ke se tiaki la ne ia te fafine tenā;
13 kae kafai se fafine e avaga ki se tagata sē talitonu, kae e lotomalie tou tagata ke ‵nofo fakatasi lāua, ke se tiaki la ne te fafine tena avaga.
14 Me e faka‵malugina te tagata sē talitonu i tena fesokotakiga mo tena avaga, kae e faka‵malugina te fafine sē talitonu i tena fesokotakiga mo te taina; me kafai e se fai penā e se mafai o ‵ma otou tama‵liki, kae ko ‵ma latou i te faiga tenei.
15 Kae kafai e fakaiku aka ne te tino sē talitonu ke fano a ia kea‵tea, tuku loa ke fano; e se ligina se taina io me se tuagane mai lalo i fakanofonofoga penā, kae ko kalagagina koutou ne te Atua ke maua te filemu.+
16 Te fafine avaga, ko oi e iloa ne ia me ka fakasao ne koe tau avaga?+ Io me ko te tagata avaga, ko oi e iloa ne ia me ka fakasao ne koe tau avaga?
17 E tiga te feitu tenā, e pelā mo te tusaga ko oti ne avatu ne Ieova ki tino taki tokotasi, ke na sa‵sale a tino taki tokotasi e ‵tusa mo te kalagaga a te Atua.+ E avatu foki ne au a te fakatonuga tenei ki fakapotopotoga katoa.
18 E isi se tagata ko oti ne pilitome i te taimi ne kalagagina ei a ia?+ Ke mo a ma fakaseaoga ne ia tena pilitome. E isi se tagata ne kalagagina kae seki pilitome? Ke mo a ma pilitome a ia.+
19 E seai se uiga o te pilitome, kae ko te sē pilitome e seai foki sena uiga;+ a te mea telā e isi sena uiga ko te fakalogo ki fakatonuga a te Atua.+
20 I so se tulaga ne kalagagina ei a tino taki tokotasi, ke na tumau eiloa a ia i ei.+
21 E a, ne kalagagina koe i te taimi ne fai ei koe mo pologa? Sa manavase ki ei;+ kae kafai e mafai o saoloto koe, ke fakaaoga la ne koe te avanoaga tenā.
22 Me ko so se tino ne kalagagina i te Aliki i te taimi koi fai ei mo pologa, ko fai a ia mo tino ne fakasaoloto ne te Aliki;+ e penā foki so se tino ne kalagagina i te taimi koi saoloto ei, ko fai a ia mo pologa a Keliso.
23 A koutou ne ‵togi ki se ‵togi;+ sa toe fai la mo fai a pologa a tāgata.
24 I so se tulaga ne kalagagina ei a tino taki tokotasi, e oku taina, ke na tumau eiloa a ia i ei i mua o te Atua.
25 E pelā mo latou kolā e seki a‵vaga eiloa, e seai se fakatonuga ne tuku mai ne te Aliki ki a au, kae e tuku atu fua toku manatu+ e pelā me se tagata telā ne fakaasi atu ki ei te alofa fakamagalo o te Aliki ko te mea ke fakamaoni a ia.
26 Tela la, i taku faka‵tau e sili atu i te ‵lei ke tumau eiloa te tagata i tena tulaga tenā, ona ko te tulaga faigata ko nofo a ia i ei.
27 E isi sau avaga? Ke mo a ma ‵sala ki se auala ke tiaki a ia.+ E a, e seai sau avaga? Ke mo a ma ‵sala sau avaga.
28 Kae kafai foki e avaga koe, e se agasala koe. Kae kafai ko avaga te tino telā e seki avaga eiloa, e se agasala a te tino tenā. Kae ko latou kolā e a‵vaga ka maua ne latou a puapuaga i te foitino. Kae e fia faka‵sao fua ne au koutou mai i ei.
29 E se gata i ei, e fai atu ne au a te mea tenei, e oku taina, ko toetoe te taimi koi ‵toe.+ Mai te taimi nei o fano ki mua, ke fai a tino a‵vaga e pelā me ne tino e seki a‵vaga,
30 kae ko latou kolā e ‵tagi ke fai e pelā me ne tino e se ‵tagi, kae ko latou kolā e fia‵fia ke fai e pelā me ne tino e se fia‵fia, kae ko tino ‵togi mea ke fai e pelā me ne tino e se i a latou a mea konā,
31 mo latou kolā e fakaaoga ne latou te lalolagi ke se fakaaoga katoatoa ne latou; me e mafuli‵fuli a mea kolā e ‵tupu i te lalolagi tenei.
32 E tonu, au e manako ke saoloto koutou mai te manavase. A te tagata e seki avaga e manavase ki mea a te Aliki, ki te auala e mafai ei o fakafiafia ne ia te Aliki.
33 Kae ko te tagata avaga e manavase ki mea o te lalolagi nei,+ ki te auala e mafai ei o fakafiafia ne ia tena avaga,
34 kae e vaeluagina tena loto. E se gata i ei, e manavase a te fafine e seki avaga mo te tamafine ‵ma ki mea a te Aliki,+ ko te mea ke fakatapugina tena foitino mo tena loto.* Kae ko te fafine avaga e manavase ki mea o te lalolagi nei, ki te auala e mafai ei o fakafiafia ne ia tena avaga.
35 Kae e fai atu ne au te mea tenei mō te otou ‵lei eiloa, e se fai ke saisai ei koutou, kae ke fakamalosi koutou ke fai te mea e ‵tau kae ke tuku katoatoa ki te Aliki e aunoa mo se fakalavelave.
36 Kae kafai e manatu ifo se tino me ko se ‵lei ana amioga i tena nofo taka, kae kafai ko ‵seke a ia mo te tulaga o te talavou, tenei la te mea e ‵tau o fai: Ke fai te mea e manako a ia ki ei; e se agasala a ia. Ke na fai ke avaga a ia.+
37 Kae kafai ko oti ne fai se fakaikuga a se tino i tena loto, kae e se faigata ki a ia, kae e mafai o pule atu ki a ia eiloa kae e fakaiku aka i tena loto ke se avaga a ia, e ‵lei atu tenā.+
38 Tela la, so se tino telā e avaga e ‵lei foki, kae e sili atu te ‵lei o so se tino telā e se avaga.+
39 E ligina te fafine avaga i te taimi e ola ei tena avaga.+ Kae kafai ko moe tena avaga i te mate, ko saoloto ei a ia o avaga ki so se tino e manako a ia ki ei, kae ke avaga fua i te Aliki.+
40 Kae i taku faka‵tau, ka fiafia atu tou fafine māfai e tumau eiloa a ia penā; e talitonu eiloa au me e maua foki ne au te agaga o te Atua.
Fakamatalaga mai lalo
^ Ko tena uiga, ke ‵moe fakatauavaga.
^ Ko tena uiga, ko te fakama‵liega o lā manakoga fakatauavaga.
^ Eleni, “agaga.”