I te taimi e kamata fakatasi ei te lū olaga avaga, ka ‵sae aka eiloa a fakalavelave kese‵kese. E mafai o iku mai ona ko te kese‵kese o lū mafaufauga, lagonaga, mo te kilokiloga ki te olaga. Io me e mafai o māfua mai i nisi tino mo mea ‵tupu kolā e seki fakamoemoegina.

E mafai o tofotofogina ke ‵kalo kea‵tea mai manatu ‵tonu, kae e fakamalosi mai te Tusi Tapu ke fakafesagai atu tatou ki ‵tou fakalavelave. (Mataio 5:23, 24) Ka maua eiloa ne koe a toe faka‵leiga ‵lei ki ou fakalavelave māfai e fakagalue aka a akoakoga fakavae i te Tusi Tapu.

FAKAMATALAGA MAI TE TUSI TAPU: “Te taimi o te faipati.” (Failauga 3:1, 7) Masaua ke fakamāumāu ne koulua a taimi ke sau‵tala ki te fakalavelave. Ke fakaasi ‵tonu atu ki tau avaga ou lagonaga mo ou mafaufauga e uiga ki te mataupu. “Ke na faipati [faeloa] . . . ki te mea tonu” ki tau avaga. (Efeso 4:25) Kafai foki loa e aofia i ei a lagonaga kaitaua, ke ‵teke atu ki te fia kinau atu. A te tali i se leo filemu e puipui ei se sautalaga mai te iku atu ki se taua.—Faataoto 15:4; 26:20.

Kafai foki loa e se lotoma‵lie koulua, ke tumau i te mata fia‵fia, kae ke se puli o fakaasi atu te alofa mo te āva ki tau avaga. (Kolose 4:6) Ke taumafai o faka‵lei fakavave a te fakalavelave, kae ke mo a ma fakagata te lū fesokotakiga.—Efeso 4:26.

MEA E MAFAI NE KOE O FAI:

• Ke fakatoka se taimi ‵lei ke sau‵tala ki te fakalavelave

• Kafai ko ‵tau o fakalogologo koe, sa taumafai o faipati atu. E oko atu eiloa tou taimi ke faipati

FAKAMATALAGA MAI TE TUSI TAPU: “Ke fakatau a‵lofa koutou i te alofa fakataina te suā tino ki te suā tino. Ke mua o fakaasi atu te āva o te suā tino ki te suā tino.” (Loma 12:10) E tāua ‵ki eiloa a te auala e fakalogologo ei koe. Taumafai ke malamalama koe i te kilokiloga a tau avaga mo “lagonaga fakataina . . . mo te loto maulalo.” (1 Petelu 3:8; Iakopo 1:19) Sa fakalogologo fakaloiloi. Kafai e mafai, ke taofi aka au mea e fai kae saga katoatoa atu ki tau avaga, io me fakamolemole atu ke sau‵tala fakamuli ki ei. Kafai e mafaufau koe ki tau avaga e pelā me se taugasoa i lō se tino ‵teke, ka mafai ei o “taofiofi sāle tou kaitaua.”—Failauga 7:9.

MEA E MAFAI NE KOE O FAI:

• Ke tumau i te fakalogologo mo te loto fiafia, ke oko foki eiloa māfai e se fiafia koe ki mea kolā e lagona ne koe

• Sa saga ki pati kae ke fakalogologo ki te manatu tāua i ei. Onoono ki gasuesuega a tau avaga mo tena vaegā leo

FAKAMATALAGA MAI TE TUSI TAPU: “Galue ke maua mea e ola ei koe; kafai e sagasaga fua koe o gutu faipati e iku tou olaga ki te mativa.” (Faataoto 14:23) A te lotomalie ki se faka‵leiga o se fakalavelave e se lava fua i ei. E ‵tau o fakagalue aka a mea kolā ko oti ne lotoma‵lie koulua ki ei. E aofia i te mea tenei a te galue mo te taumafai malosi, kae ka aoga eiloa ke fai penā. (Faataoto 10:4) Kafai e ga‵lue fakatasi koulua e pelā me se tīmū, ka “lasi atu te aoga” o mea e maua ne koulua.—Failauga 4:9.

MEA E MAFAI NE KOE O FAI:

• Fakaiku aka a mea aoga ka fai ne koulua ke faka‵lei aka ei te lū fakalavelave

• Ke iloilo aka faeloa te lū gasolo ki mua