Te Tusi a Iakopo 3:1-18
3 E se tokouke a tino i a koutou e ‵tau o fai mo faiakoga, e oku taina, me e iloa ne tatou me ka ‵mafa* atu te ‵tou fakamasinoga.+
2 Me i a tatou katoa e ‵siga* i taimi e uke.+ Kafai se tino e se siga i ana pati, a ia se tino e ‵lei katoatoa, kae e mafai foki o pule atu ki tena foitino kātoa.
3 Kafai e faka‵mau ne tatou a fagutu ki gutu o solofanua ko te mea ke faka‵logo mai ki a tatou, e takitaki foki ne tatou olotou foitino kātoa.
4 Ke onoono foki ki vaka: E tiga eiloa te lotou ‵lasi kae e faka‵tele ne matagi ma‵losi, e uliuli fua ne se tamā foe ki so se koga e manako te tino e tu i te foe o fano ki ei.
5 E penā foki te alelo, se vaega foliki fua o te foitino kae e lasi tena fakamatamata. Onoono foki ki te foliki o te afi telā e mafai o ‵sunu ne ia se togavao lasi ‵ki!
6 A te alelo se afi foki.+ A te alelo se vaega o ‵tou foitino telā e ‵fonu i faifaiga sē amio‵tonu, me e fakalailai ne ia te foitino kātoa+ kae ‵sunu ne ia te olaga* kātoa o te tino ki te afi kae fakaseai atu i te afi i Kena.*
7 Me i vaegā manu fe‵kai mo manu eva mo manu ‵tolo mo ika ‵lasi i te tai e mafai o faka‵lata kae ko oti ne faka‵lata ne tino.
8 Kae e seai se tino e mafai o fakalata ne ia te alelo. E se mafai o pule atu ki ei kae e fakamasei tino, e ‵fonu i te poisini tamate tino.+
9 E tavae ne tatou ki ei a Ieova,* te Tamana, kae fakamalaia foki ne tatou ki ei a tino kolā ne faite ki “foliga o te Atua.”+
10 Mai te gutu eiloa e tasi e ‵to mai i ei a fakamanuiaga mo fakamalaiaga.
Oku taina, e se ‵tau o ‵tupu a mea i te auala tenei.+
11 E a, e isi se vaipuna e ‵sali mai i ei a vai ma‵galo mo vai ‵kona?
12 Oku taina, e a, e mafai o fua mai te lakau ko te mati ki olive io me ko te vine ki mati?+ E se mafai foki o maua a vai ma‵galo mai i vai ‵kona.
13 Ko oi te tino i a koutou e poto kae malamalama? Ke na fakaasi mai ne ia e auala i ana amioga ‵lei a galuega kolā e fai i te agamalu telā e maua mai i te poto.
14 Kae kafai a koutou e lasi te loto masei+ mo te faka‵tupu taua*+ i otou loto, ke mo a la koutou e fai‵pati fakamata‵mata+ kae ‵pelo e uiga ki te munatonu.
15 E se tenei te poto telā ne fanaifo mai te lagi; se mea faka-te-lalolagi,+ e liu manu, kae se mea fakatemoni.
16 Me ko so se koga telā e ‵nofo i ei te loto masei mo te faka‵tupu taua,* e maua foki i ei te fai valevale mo mea ma‵sei katoa.+
17 Kae ko te poto mai te lagi e tulaga muamua i te ‵ma,+ ‵tao atu ki ei ko te filemu,+ e loto malamalama,+ e toka o fakalogo, e ‵fonu i te alofa fakamagalo mo fuataga ‵lei,+ e se fakailoga tino,+ e se amio ‵pelo.+
18 E se gata i ei, a fuataga o te amiotonu e ‵toki i fakanofonofoga filemu+ mō* latou kolā e tausi te filemu.+
Fakamatalaga mai lalo
^ Io me “faigata.”
^ Io me “fai mea ‵se.”
^ Eleni, “te tamilosaga o te fanau mai (māfuaga).”
^ Io me kāti, “fia fai tofi.”
^ Io me kāti, “fia fai tofi.”
^ Io me kāti, “ne.”