Faataoto 20:1-30
20 A te uaina se tino fakatauemu,+ a meainu ma‵losi e se mafai o taofi aka;+So se tino e takasēsē kea‵tea ona ko mea konā e se poto.+
2 A te mataku ki se tupu e pelā mo te ‵tagi o se leona;+So se tino e fakaoso aka ne ia tena kaitaua ko fai ne ia ke tu tena ola i se tulaga fakamataku.+
3 Se mea fakaaloalogina mō se tagata ke ‵kalo kea‵tea mai i se kinauga,+Kae ko so se tino valea ka aofia malosi i ei.+
4 A te tino paie e se fakamalū laukele i te tau ‵moko,Tela la, ka akai faeloa a ia i te taimi e tau ei a fuataga me ko seai ne ana mea.*+
5 A mafaufauga* i te loto o se tagata e pelā me ne vai ‵poko,Kae ko te tagata e atamai i te faiga o faka‵tauga ‵lei e aumai ne ia a mea konā ki tua.
6 E folafola atu ne tāgata e tokouke a te lotou a‵lofa fakamaoni,Kae ko oi e mafai o maua ne ia se tagata fakamaoni?
7 A te tino amiotonu e sasale i tena fakamaoni.+
E fia‵fia ana tama‵liki* kolā e olo atu i ana tua.+
8 Kafai ko sagasaga te tupu i te nofogaaliki o fai a fakamasinoga,+E faka‵ma kea‵tea ne ia a mea matagā katoa e lavea ne ia ki ana mata.+
9 Ko oi e mafai o fai atu: “Ko oti ne faka‵ma ne au toku loto;+Au ko ‵ma pakipaki mai i aku agasala”?+
10 A fua mea ‵mafa fakaloiloi mo fua sē ‵tonu*—A te avā mea konā ne mea fakatakalialia ki a Ieova.+
11 E lauiloa foki se tamaliki* i ana faifaiga,Faitalia me e ‵ma kae ‵tonu ana amioga.+
12 A te taliga logo mo te mata kite—Ne faite ne Ieova a te avā mea konā.+
13 Sa fiafia ki te moe, i a koe ma mativa.+
‵Pula ou mata, kae ka makona koe i meakai.+
14 “E se ‵lei te mea tenei, e se ‵lei te mea tenei!” ko pati a se tino ne ‵togi ana mea;Ko fano kea‵tea ei a ia o faipati fakamatamata e uiga ki a ia eiloa.+
15 E isi ne aulo, e uke foki a kamu,*Kae ko laugutu o te poto ne mea tāua.+
16 Puke se gatu o te tagata māfai ko oti ne tuku atu e pelā me se puipuiga o te tupe kaitalafu a se tino fakaa‵tea;+Taofi ‵mau ki te tautoga a ia māfai ne fai ne ia te mea tenā mō se fafine fakaa‵tea.+
17 A meakai ne maua i se auala faitogafiti e tami gali ki se tagata,Kae oti aka ko ‵fonu ei tena gutu i kilikili.+
18 E auala i te fai‵pati fakatasi,* ka manuia eiloa a palani,*+Kae e auala i fakatakitakiga atamai* e taua atu ei koe.+
19 A te tino gutu fatufatu e fano sāle fua o fakaasi a mea ‵funa kolā e se ‵tau o sautala ki ei;+Sa ‵kau fakatasi mo se tino e fiafia ki te gutu fai‵tala.*
20 So se tino e fetū ne ia tena tamana mo tena mātua,Ka tamate a tena moli māfai ko oko mai te pouliga.+
21 A te tofi telā ne maua muamua i auala kaimanakoKa se fai pelā me se fakamanuiaga i te fakaotiga.+
22 Ke mo a ma fai aka: “Ka toe taui atu ne au te mea matagā!”+
Fakamoemoe ki a Ieova,+ kae ka fakasao ne ia koe.+
23 A fua mea ‵mafa fakaloiloi* ne mea fakatakalialia ki a Ieova,A fua fakatautau sē ‵tonu e se ‵lei.
24 A kalafaga o se tagata e takitaki ne Ieova;+E mafai pefea ne se tagata o malamalama i tena auala?
25 Se malei eiloa ki se tagata ke tagi fakavave aka, “E tapu!”+
Kae fakamuli ifo loa ko toe mafaufau faka‵lei ei ki tena tautoga ne fai.+
26 A te tupu poto e faka‵ma kea‵tea ne ia a tino amio ma‵sei+Kae toso atu te teka o te mea tuki saito i luga i a latou.+
27 A te mānava o se tagata ko te moli a Ieova,E sukesuke ne ia a te ‵kano loto o te tino.
28 A te alofa fakamaoni mo te fakamaoni e puipui ei te tupu;+E auala i te alofa fakamaoni e fakatumau ei ne ia tena nofogaaliki.+
29 A te ‵malu o tamataene ko te lotou malosi,+Kae ko te gali o toeaina ko te lotou ulu sinā.+
30 A pa‵kiaga mo koga uliuli mai ‵kiniga e ave* kea‵tea ei a mea ma‵sei,+Kae ko te ‵ta e faka‵ma ei te ‵kano loto o se tino.
Fakamatalaga mai lalo
^ Io me kāti, “Ka salasala latou ki mea i te taimi e tau ei a fuataga kae seai ne olotou mea e maua.”
^ Io me “manakoga.” Epelu, “pati fakatonutonu.”
^ Epelu, “tama tāgata.”
^ Io me “Fatu fua mea ‵mafa e lua mo pōla e lua e fua ei a mea.”
^ Io me “se tamaliki tagata.”
^ Io me “pati fakatonutonu.”
^ Io me “faka‵mautakitaki.”
^ Io me “fakatonutonuga ‵poto.”
^ Io me “telā e takolekole ne ia tino ki ana laugutu.”
^ Io me “Fatu fua mea ‵mafa e lua.”
^ Io me “kana.”
