Isaya 43:1-28
43 Zvanzi naJehovha,Musiki wako, haiwa iwe Jakobho, iye akakuumba, haiwa iwe Israeri:+
“Usatya, nekuti ndakakudzikinura.+
Ndakakushevedza nezita rako.
Uri wangu.
2 Paunopfuura nemumvura, ndichava newe,+Uye paunopfuura nemunzizi, hadzizokuyeredzi.+
Paunofamba nemumoto, hauzopiswi,Uye rimi remoto harizokubvuraudzi.
3 Nekuti ndini Jehovha Mwari wako,Iye Mutsvene waIsraeri, Muponesi wako.
Ndakapa Ijipiti kuti ive rudzikinuro rwako,Itiopiya neSebha panzvimbo pako.
4 Nekuti wakava anokosha kwandiri,+Waikudzwa, uye ndakakuda.+
Saka ndichapa vanhu panzvimbo pakoUye marudzi panzvimbo peupenyu hwako.*
5 Usatya, nekuti ndinewe.+
Ndichaunza vana* vako kubva kumabvazuvaUye ndichakuunganidza kubva kumavirira.+
6 Ndichati kuchamhembe, ‘Varegedze!’+
Uye kumaodzanyemba, ‘Usavadzivisa.
Uyai nevanakomana vangu kubva kure, uye vanasikana vangu kubva kumigumo yenyika,+
7 Iye munhu wese anoshevedzwa nezita rangu+Uye wandakasikira kukudzwa kwangu,Wandakaumba uye wandakaita.’+
8 Budisai rudzi rune maziso asi ruri mapofu,Uye rune nzeve asi ruri matsi.+
9 Vanhu vese ngavaungane panzvimbo imwe chete,Uye marudzi ngaaungane.+
Ndiani pakati pawo angataura izvi?
Kana kuti iwo angaita kuti tinzwe zvinhu zvekutanga* here?+
Ngaaunze zvapupu zvawo kuti aratidze kuti akarurama,Kana kuti ngaanzwe ati, ‘Ndicho chokwadi!’”+
10 “Imi muri zvapupu zvangu,”+ ndizvo zvinotaurwa naJehovha,“Mushumiri wangu wandakasarudza,+Kuti muzive uye mutende mandiri,*Monzwisisa kuti ndini iye mumwe chete.+
Hapana mumwe Mwari akanditangira,Uye hapana mumwe akazotevera.+
11 Ini ndini Jehovha,+ uye hakuna mumwe muponesi kunze kwangu.”+
12 “Ndini ndakazivisa, ndakaponesa uye ndakaita kuti zvizivikanwePakwakanga kusina mwari wekumwe pakati penyu.+
Saka muri zvapupu zvangu,” ndizvo zvinotaurwa naJehovha, “uye ini ndini Mwari.+
13 Uyewo, ndinongoramba ndiri iye mumwe chete;+Uye hapana anogona kubvuta chinhu muruoko rwangu.+
Pandinoita chimwe chinhu, ndiani angachitadzisa kuitika?”+
14 Zvanzi naJehovha, Mudzikinuri wenyu,+ Mutsvene waIsraeri:+
“Ndichatuma vanhu kuBhabhironi ndichiitira imi, ndowisira pasi mazariro* ese emagedhi,+Uye vaKadheya vachashevedzera vachishungurudzika vari mungarava dzavo.+
15 Ndini Jehovha, Mutsvene wenyu,+ Musiki waIsraeri,+ Mambo wenyu.”+
16 Zvanzi naJehovha,Iye ari kugadzira nzira mugungwaKunyange gwara mumvura isina kugadzikana,+
17 Iye anobudisa ngoro yehondo nebhiza,+Uto pamwe chete nevarwi vane simba:
“Vacharara pasi uye havazomuki.+
Vachadzimwa; vachadzimwa vachiita zvekudimburwa setambo iri kubvira.”
18 “Musayeuka zvinhu zvekare,Uye musaramba muchifunga zvinhu zvakapfuura.
19 Onai! Ndiri kuita chinhu chitsva;+Kunyange iye zvino chatovapo.
Hamusi kuchiona here?Ndichagadzira nzira inopfuura nemurenje+Uye nzizi dzinopfuura nemugwenga.+
20 Mhuka yemusango ichandikudza,Hunguhwe* nemhou,Nekuti ndinoita kuti murenje muve nemvura,Mugwenga muve nenzizi,+Kuti vanhu vangu vandakasarudza+ vanwe,
21 Ivo vanhu vandakazviumbiraKuti vazivise kurumbidzwa kwangu.+
22 Asi hauna kudana kwandiri, haiwa iwe Jakobho,+Nekuti wakaneta neni, haiwa iwe Israeri.+
23 Hauna kundiunzira makwai ezvibayiro zvako zvinopiswaKana kundikudza nezvibayiro zvako.
Handina kukumanikidza kuti undiunzire chipo,Uye handina kukunetesa nekukuudza kuti undipe zvinonhuhwirira zvichena.+
24 Hauna kunditengera tsanga dzinonhuhwirira nemari yako,Uye hauna kundigutsa nemafuta ezvibayiro zvako.+
Asi wakatondiremedza nezvivi zvako,Ukandinetesa nekukanganisa kwako.+
25 Ini ndini iye ari kudzima kudarika kwako*+ ndichiitira zita rangu,+Uye handizoyeuki zvivi zvako.+
26 Ndiyeuchidze; ngatipinzei nyaya yedu mudare;Taura divi rako panyaya yacho kuti uratidze kuti wakarurama.
27 Tateguru vako vekutanga vakatadza,Uye vatauriri* vako vakandipandukira.+
28 Saka ndichasvibisa machinda enzvimbo tsvene,Uye ndichaita kuti Jakobho aparadzweUye ndichaita kuti Israeri atukwe.+
Mashoko Emuzasi
^ Kana kuti “pemweya wako.”
^ ChiHeb., “mbeu.”
^ Zvichida pari kureva kuti zvinhu zvichatanga kuuya mune ramangwana.
^ Kana kuti “muvimbe neni.”
^ Aya mapango kana kuti simbi dzaishandiswa sezvihuri.
^ Iyi imhuka yakada kufanana negava.
^ Kana kuti “mabasa ako ekupanduka.”
^ Zvichida pari kureva vadzidzisi veMutemo.
