•  Зошто такви промени

•  Што можеш да направиш

•  Што велат други млади

 За време на пубертетот честопати доаѓа до нагли промени во расположението. Но, дури и ако си во доцните тинејџерски години, твоите чувства сепак можат да бидат многу променливи и непредвидливи.

 Ако тоа те збунува, запомни дека повеќето вакви чувства се јавуваат поради хормоналните промени и поради чувствата на несигурност, кои се нормален дел од растењето. Но, ти можеш да ги разбереш своите чувства и да научиш да ги контролираш!

 Животна вистина: Добро е да научиш да си ги контролираш чувствата уште како млад, бидејќи тоа е нешто што ќе ти биде потребно во многу ситуации како возрасен.

 Зборувај. Библијата вели: „Вистинскиот пријател сака во секое време, и брат станува во неволја“ (Изреки 17:17).

 „Како семејство, имаме една пријателка која ми е како тетка. Секогаш ме слуша кога зборувам, и со неа сум слободна да си ги искажам чувствата. Кога гледам исправно на работите, многу се гордее со мене, а кога за нешто не сум во право, ме исправа на најдобар можен начин“ (Јоланда).

 Предлог: Наместо да зборуваш само со пријателите на твоја возраст — кои можеби и самите се соочуваат со слични промени во расположението како тебе — зборувај со родителите или со некој друг возрасен во кого имаш доверба.

 Пишувај. Во Библијата читаме за еден човек по име Јов кој, додека бил во очај, рекол: „Отворено ќе ја изразам грижата што ја чувствувам поради својата состојба. Ќе зборувам од горчина во душата“ (Јов 10:1). Освен што ќе зборуваш со некого, друг начин на кој можеш да ја изразиш грижата е така што ќе запишуваш како се чувствуваш.

 „Никаде не одам без тефтерче. Ако нешто ме вознемири, веднаш запишувам што се случило. Кога пишувам за моите чувства, тоа ми е како терапија“ (Илијана).

 Предлог: Води си дневник во кој ќе запишуваш какви чувства ти се јавиле, поради која причина и како би можел да се справиш со нив. Работниот лист кој е поврзан со оваа статија може да ти помогне во тоа.

 Моли се. Библијата вели: „Фрли го своето бреме на Јехова, и тој ќе те поткрепи. Никогаш нема да дозволи праведникот да се сопне“ (Псалм 55:22).

 „Често му се молам на Јехова кога ми е тешко. Секогаш ми е полесно кога ќе му го излеам срцето“ (Џасмин).

 Предлог: И покрај грижите што те мачат, помисли на три работи во животот за кои си благодарен. Кога му се молиш на Јехова, барај помош од него — но изразувај му ја и својата благодарност за убавите работи што ги имаш.